Tzuyu សមាជិក Twice បានជាប់ឈ្មោះក្នុងបញ្ជីបណ្ឌិត K-pop ម្នាក់ទៀតហើយដោយ តារាចម្រៀងដើមកំណើតតៃវ៉ាន់វ័យ ២៥ ឆ្នាំរូបនេះបានបញ្ជាក់ថានាងបានបញ្ចប់ការសិក្សាថ្នាក់អនុបណ្ឌិតហើយជាមួយមុខជំនាញចិត្តវិទ្យា។
ពាក្យចចាមអារ៉ាមអំពីសមិទ្ធិផលសិក្សារបស់ Tzuyu បានលេចឡើងជាលើកដំបូងបន្ទាប់ពីខិត្តប័ណ្ណមួយអំពីសមិទ្ធិផលធំៗរបស់នាងត្រូវបានបង្ហោះតាមអ៊ីនធឺណិត។ ខិត្តប័ណ្ណនេះត្រូវបានរាយការណ៍ថាធ្វើឡើងដោយសាលាបឋមសិក្សា Fuxing ដែលនាងធ្លាប់សិក្សា ក្នុងការប្រារព្ធខួបលើកទី ៣០ របស់សាលានេះ។ ដោយមានការលើកឡើងពីសិស្សានុសិស្សលេចធ្លោដែលបានបញ្ចប់ការសិក្សាពីសាលា ស្ថាប័នមានមូលដ្ឋាននៅតៃប៉ិខាងលើក៏បានចុះបញ្ជីសមិទ្ធផលធំៗរបស់ Tzuyu ដែលមានឈ្មោះពិតថា Chou Tzu-yu។

សមិទ្ធផលទាំងនោះរួមមានការក្លាយជាសមាជិកទីបីក្នុងក្រុម Twice ដែលបានចេញអាល់ប៊ុមទោល (បន្ទាប់ពី Nayeon និង Jihyo) ការបញ្ចប់ការសិក្សាពីវិទ្យាល័យ Hanlim Arts និងបានជាប់ក្នុងបញ្ជីស្រីស្អាតបំផុតរបស់ទស្សនាវដ្ដី TC Candler។ យ៉ាងណាក៏ដោយ សមិទ្ធិផលដែលទទួលបានការចាប់អារម្មណ៍ជាងគេគឺ ការបញ្ចប់ថ្នាក់អនុបណ្ឌិតរបស់ Tzuyu ផ្នែកចិត្តវិទ្យាអនុវត្តពីសាកលវិទ្យាល័យ Miguel de Cervantes European ក្នុងប្រទេសអេស្ប៉ាញ។
ខណៈមហាជនមួយចំនួនបានបង្ហាញការសង្ស័យពីភាពត្រឹមត្រូវនៃខិត្តប័ណ្ណនេះ ដោយសារការរវល់របស់ Tzuyu ប៉ុន្មានឆ្នាំកន្លងទៅ ម្ចាស់បទ “Run Away” រូបនេះជម្រះមន្ទិលសង្ស័យនេះកំលុងពេលនិយាយទូរស័ព្ទជាមួយអ្នកគាំទ្រក្នុង live។
នៅពេលត្រូវបានសួរថាតើព័ត៌មានពីការបញ្ចប់ថ្នាក់អនុបណ្ឌិតរបស់នាងពិតឬអត់នោះ Tzuyu បានឆ្លើយថា៖ “ចាស ពេលណាក៏ដោយដែលខ្ញុំទំនេរ ខ្ញុំនឹងរៀនតាមអនឡាញ”។ នាងបានបន្ថែមថា នាងបានសិក្សាថ្នាក់បរិញ្ញាបត្រជាន់ខ្ពស់នេះអស់រយៈពេលជាងមួយឆ្នាំ។
លទ្ធផលសិក្សារបស់ Tzuyu ទទួលបានការសរសើរពីអ្នកលេងអ៊ីនធឺណិតជាច្រើន ដែលហៅនាងថា “ស្រីស្អាតដែលមានចំណេះដឹង”។ អ្នកលេងបណ្ដាញសង្គមម្នាក់បានសរសេរថា “លើសពីការរៀននៅសកលវិទ្យាល័យសម្រាប់ថ្នាក់អនុបណ្ឌិត Tzuyu ក៏ឆ្លៀតពេលទំនេររបស់នាងដើម្បីធ្វើកិច្ចការមនុស្សធម៌ផងដែរ។ ទាំងភាពស្រស់ស្អាត ចំណេះដឹង ទេពកោសល្យ និងបេះដូង Tzuyu មានគ្រប់ទាំងកញ្ចប់តែម្ដង”។
ថ្មីៗនេះដែរ Twice ក៏ទើបតែចេញផ្សាយមីនីអាល់ប៊ុមទី ១៤ របស់ពួកគេមានចំណងជើងថា “Strategy” ដោយមានការសហការជាមួយតារាចម្រៀងរ៉េបអាមេរិក Megan Thee Stallion ។ អាល់ប៊ុមនេះបានបង្ហាញខ្លួនជាលើកដំបូងនៅលេខ ៤ នៅលើតារាង Billboard 200 ធ្វើឱ្យ Twice ក្លាយជាក្រុមចម្រៀងនារី K-pop ដំបូងគេដែលមានអាល់ប៊ុមចំនួន ៦ បានជាប់ក្នុងចំណាត់ថ្នាក់ Top 10 នៃតារាងនោះ ៕

























Account
Security
Favourite Content