កាលពីពេលថ្មីៗ គូស្វាមីភរិយាហុងកុងគឺលោក Tony Hung និង Inez Leong បានចែករំលែកសារដ៏រីករាយមួយដោយអ្នកទាំងពីរបានទទួលសមាជិកថ្មីចូលមកក្នុងគ្រួសារតូចកក់ក្ដៅរបស់ខ្លួន។ ក្រោយទទួលបានសមាជិកថ្មីហើយ ពួកគេក៏ទទួលបានរហស្សនាមថាជាគ្រួសារ ៣ ឆ្នាំកូន ២ ទៀតផង។
កាលពីខែធ្នូ ឆ្នាំ២០២៣ គូស្វាមីភរិយាមួយគូបានប្រកាសពីដំណឹងនៃការពពោះសមាជិកថ្មីរបស់ពួកគេ ហើយ Inez ក៏បានចែករំលែកវីដេអូសកម្មភាពមុនសម្រាលនៅលើបណ្ដាញសង្គមអ៊ីនស្ដាក្រាមដូចជាការធ្វើលំហាត់ប្រាណងាយៗសាមញ្ញៗជាដើម។ រហូតដល់ពេលសម្រាល Inez ក៏បានបង្ហោះសារដ៏ផ្អែមល្ហែមស្វាគមន៍កូនស្រីទី ២ ដោយបង្កប់អត្ថន័យអបអរស្វាមីខ្លួនដែលទទួលបានគូស្នេហ៍អតីតជាតិម្នាក់ទៀត។
យ៉ាងណាមិញ សម្រាប់កូនទីពីរនេះនាងបានជ្រើសរើសការសម្រាលដោយវះកាត់ព្រោះមិនចង់ឱ្យមានភាពឈឺចាប់យូរដូចកាលពីកំណើតកូនស្រីដំបូងរបស់ពួកគេឡើយ។ នាងតូចមានទម្ងន់ ៣,២ គីឡូក្រាម ហើយក៏មានសុខភាពល្អខ្លាំងណាស់ដែរ។ អ្នកទាំងពីរបានឱ្យសារព័ត៌មានហុងកុងដឹងបន្ថែមទៀតថាក្រោយឮសំឡេងកូនតូចយំ អ្នកទាំងពីរពិតជារំភើបថែមទាំងគិតថានេះហាក់ដូចជាសុបិនដ៏កក់ក្ដៅ និងមានសុភមង្គលខ្លាំងមួយផងដែរ។ មិនត្រឹមប៉ុណ្ណេះ នៅថ្ងៃអនាគតពួកគេក៏មានគម្រោងបង្កើតគ្រួសារតូចមួយនេះដោយមានសមាជិក ៥ នាក់ផងដែរ។
គួរបញ្ជាក់ផងដែរថា Tony Hung និង Inez Leong បានរៀបការនៅក្នុងឆ្នាំ ២០២១ ហើយក៏ទទួលបានកូនស្រីច្បងនៅឆ្នាំដដែល។ Inez Leong បាននិយាយថាកន្លងមក Tony Hung បានក្លាយខ្លួនជាឪពុក និងស្វាមីដ៏ល្អហើយតែងតែផ្ដល់កក់ក្ដៅដល់គ្រួសារជានិច្ច៕