T.O.P ដែលសម្ដែងជា Thanos នៅក្នុងរឿង Squid Game រដូវកាលទី២ បានចែករំលែកការយល់ឃើញផ្ទាល់ខ្លួនទៅលើតួអង្គដែលខ្លួនសម្ដែង ដោយបាននិយាយថា លោកចង់ធ្វើឱ្យតួមួយនេះមើលទៅគួរឱ្យធុញ និងគួរឱ្យស្អប់ម្នាក់។
នៅក្នុងវីដេអូដែល Netflix Korea បានបង្ហោះកាលពីថ្ងៃទី២៨ ខែមករានេះ តារាចម្រៀងនិងសម្ដែងដែលមានឈ្មោះពេញថា Choi Seung Hyun បានលេចវត្តមាន ដើម្បីទស្សនាស្នាដៃសម្ដែងរបស់ខ្លួនឡើងវិញ និងចែករំលែកពីបទពិសោធន៍ ទន្ទឹមគ្នានឹងការយល់ឃើញលើការងារមួយនេះ។
T.O.P បានបង្ហើបថា ខ្លួនបានពិភាក្សាគ្នាច្រើនជាមួយនឹងអ្នកដឹកនាំរឿងក្នុងការសម្ដែងតួអង្គ Thanos ដោយបាននិយាយថា៖ “ខ្ញុំចង់ច្នៃ និងបង្កើតតួអង្គដែលពិសេស និងមិនធ្លាប់មានពីមុនមក។ ខ្ញុំប្រើប្រាស់កាយវិការដែលហួសសម័យ និងហួសហេតុខុសធម្មជាតិដើម្បីឱ្យទស្សនិកជនមានអារម្មណ៍ថាមិនស្រណុកចិត្ត និងអាចមានអារម្មណ៍ថា តួមួយនេះជាតួដែលគួរឱ្យរំខាន ឬគួរឱ្យធុញទ្រាន់។ ខ្ញុំចង់ឱ្យអ្នកទស្សនាមានអារម្មណ៍ប្លែកពីតួអង្គមួយនេះ។
តារាប្រុសវ័យ ៣៧ឆ្នាំរូបនេះ បានរៀបរាប់បន្ថែមថា ខ្លួនបានប្រើប្រាស់ពាក្យដែលរាងចាស់គំរឹលបន្តិចនៅពេលដែលតួអង្គមួយនេះនិយាយម្ដងៗ ដើម្បីអាចឱ្យទស្សនិកជនទទួលបានអារម្មណ៍ថា Thanos ជាតារារ៉េបម្នាក់ដែលជាប់គាំងក្នុងអតីតកាលដែលខ្លួនធ្លាប់ល្បីកាលពីខ្ទង់ឆ្នាំ២០០០ មុននឹងអាជីពការងារលែងរុងរឿងដូចមុន។

នៅពេលដែលទស្សនាឈុតឆាកដែល Thanos បានរ៉េបទាក់ទាញចំណាប់អារម្មណ៍ពីតួអង្គ Kang Mi Na អតីតសមាជិកក្រុមចម្រៀង BigBang រូបនេះបានទទួលស្គាល់ថា វាជារឿងដែលគួរឱ្យស្អប់មែនទែនសម្រាប់លោក។ T.O.P បាននិយាយថា៖ “ខ្ញុំធ្វើជាអ្នករ៉េបមកជាង២០ឆ្នាំហើយ តែខ្ញុំមិនដែលរ៉េបនៅមុខមនុស្សស្រីដើម្បីចង់បានចំណាប់អារម្មណ៍ពីនាងទេ។ ដូច្នេះ ខ្ញុំស្ទើរតែបាត់បង់ស្មារតីម្ដងៗពេលដែលថតឆាកនេះ”។
តារាពហុជំនាញរូបនេះ បានព្យាយាមធ្វើយ៉ាងណាឱ្យតួអង្គមួយនេះធ្វើអ្វីហួសហេតុតាមដែលអាចធ្វើបាន ដើម្បីឱ្យត្រូវគ្នានឹងភាពជាតារារ៉េបដែលធ្លាក់ប្រជាប្រិយភាពរបស់ Thanos។ បន្ថែមពីនេះទៀត លោកក៏បានបង្ហើបដែលថា ក្នុងគម្រោងដំបូងតួនេះមិនមានលាបថ្នាំក្រចកទេ តែដោយសារតែលោកគិតថា វាប្រហែលជាល្អ និងទាក់ទាញទើបលាកសាកលាបថ្នាំក្រចក និងស្នើគំនិតនេះទៅកាន់ដឹកនាំ។
គួរបញ្ជាក់ផងដែរថា ខណៈ Squid Game រដូវកាលទី២ បានបញ្ចប់ទាំងបន្សល់មន្ទិលសម្រាប់ទស្សនិកជន រឿងរ៉ាវបន្ថែមនឹងបកស្រាយនៅក្នុង Squid Game រដូវកាលទី៣ ដែលអាចនឹងចាក់បញ្ចាំងជាផ្លូវការនៅក្នុងឆ្នាំ២០២៥ នេះ៕
























Account
Security
Favourite Content