ចាប់តាំងពីចាក់បញ្ចាំងខ្សែភាពយន្ដ ‘Squid Game 2’ មក មានអ្នកទស្សនាក៏ដូចជាមហាជនជាច្រើនបាននាំគ្នាប្រតិកម្មទៅនឹងការជ្រើសរើសតួសម្ដែងដែលមានដូចជា TOP សមាជិកក្រុម BIGBANG និងតារាសម្ដែង Oh Dal Soo ដែលធ្វើឱ្យពួកគេមិនសប្បាយចិត្ត និងធ្វើពហិការមិនទស្សនាខ្សែភាពយន្ដមួយនេះ។
ស្របពេលនេះមានបញ្ហាចម្រូងចម្រាស អ្នកដឹកនាំរឿង Squid Game 2 លោក Hwang Dong Hyuk ក៏បានចេញមកឆ្លើយតបនឹងប្រតិកម្មរបស់អ្នកទស្សនាជុំវិញនឹងការជ្រើសរើសតួសម្ដែង។ នៅក្នុងបទសម្ភាសន៍នៅថ្ងៃទី២ ខែមករា ថ្មីៗនេះលោកបាននិយាយថា៖ “តាមច្បាប់វាមិនមានបញ្ហាអ្វីនោះទេ ហើយខ្ញុំក៏មិនមានតួនាទីវិនិច្ឆ័យពីភាពធ្ងន់ធ្ងរនៃឧប្បត្តិហេតុនោះដែរ។ ចំពោះករណីរបស់តារាសម្ដែង Oh Dal Soo លោកបានកត់សម្គាល់ថាវាត្រូវបានបញ្ចប់ដោយគ្មានការចោទប្រកាន់ទេ”។
ទន្ទឹមនឹងនេះ អ្នកដឹកនាំរឿងរូបនេះក៏ពន្យល់ច្បាស់ៗពីការសម្រេចចិត្តរបស់គាត់ក្នុងជ្រើសយកទាំង TOP និង Oh Dal Soo ដោយនិយាយថា៖ “ខ្ញុំជឿថាការរួមបញ្ចូលគ្នារបស់ពួកគេនឹងបង្កើតភាពស៊ីសង្វាក់គ្នា” ។ លោកបានបន្ថែមថា៖ “Oh Dal Soo គឺជាតារាសម្តែងដែលខ្ញុំចង់ធ្វើការជាមួយជាយូរមកហើយ ហើយខ្ញុំមានអារម្មណ៍ថាតួនាទីនេះសាកសមនឹងគាត់ណាស់។ ដូច្នេះហើយការសម្រេចចិត្តរបស់ខ្ញុំគឺផ្អែកលើភាពត្រូវគ្នារបស់តួអង្គ មិនមែនដើម្បីជួយក្នុងការត្រលប់មកវិញរបស់គាត់នោះទេ”។
ទាក់ទងនឹងភាពចម្រូងចម្រាសនេះ លោក Hwang Dong Hyuk បានប្រាប់ឱ្យដឹងថា៖ “នេះមិនមែនជាបញ្ហាជាមួយនឹងស្តង់ដារច្បាស់លាស់នោះទេ។ អ្នកខ្លះអាចលើកឡើងពីការព្រួយបារម្ភមួយចំនួន ខណៈពេលអ្នកផ្សេងទៀតអាចចាត់ទុកថាវាគឺរឿងអតីតដែលបានកន្លងហួសយូរណាស់ទៅហើយ”។
គួររំឭកដែរថាតារាសម្ដែង Oh Dal Soo បានប្រឈមមុខនឹងការចោទប្រកាន់ពីបទបៀតបៀនផ្លូវភេទ និងការរំលោភបំពានក្នុងអំឡុងពេលលោកនៅជាមួយក្រុម Yeonhee Street Theatre Troupe ក្នុងឆ្នាំ២០១៨។ ជាការឆ្លើយតប លោកបានសារភាពចំពោះកំហុសរបស់ខ្លួន ហើយចេញការសុំទោសជាសាធារណៈ ព្រមទាំងបានដកខ្លួនចេញពីរឿងភាគ ‘My Mister’ របស់ tvN ផងដែរ។ ហេតុនេះករណីនេះត្រូវបានបិទដោយគ្មានការស៊ើបអង្កេតជាផ្លូវការដោយសារតែលក្ខន្តិកៈនៃការកំណត់។
មួយវិញទៀតបញ្ហាចម្រូងចម្រាសមួយទៀតនៅក្នុងរឿង Squid Game Season 2 គឺ TOP សមាជិកក្រុមបុរស BIGBANG។ លោកត្រូវបានកាត់ទោសក្នុងឆ្នាំ២០១៧ ជាប់ពន្ធនាគាររយៈពេល ១០ ខែ និងព្យួររយៈពេល ២ ឆ្នាំពីបទជក់កញ្ឆាខុសច្បាប់នៅផ្ទះរបស់ខ្លួនក្នុងឆ្នាំ ២០១៦ ខណៈពេលដែលលោកជាប់កាតព្វកិច្ចបម្រើជាតិ ។
យ៉ាងណាមិញបើទោះជាមានបញ្ហាចម្រូងចម្រាសបែបណាក៏ដោយ ក៏រឿង Squid Game Season 2 នៅទទួលបានការគាំទ្រយ៉ាងខ្លាំងដោយចាប់តាំងពីការចេញផ្សាយនៅថ្ងៃទី២៦ ខែធ្នូ ស៊េរីរឿងនេះបានជាប់ចំណាត់ថ្នាក់កំពូលរបស់ Netflix មានអ្នកតាមដានជាងគេនៅក្នុងប្រទេសទាំង ៩៣ ដែលជាការកត់សម្គាល់ក្នុងប្រវត្តិសាស្ត្រដំបូងសម្រាប់ស៊េរីដើម Netflix ៕