អតីតសមាជិកក្រុមចម្រៀង Crayon Pop តារាស្រី SoYul និងស្វាមីតារាប្រុស Moon HeeJoon បានចាប់ដៃគ្នាចូលរោងមង្គលសាងគ្រួសារក្នុងឆ្នាំ ២០១៧។ អ្នកទាំងពីរជាគូស្នេហ៍សាមញ្ញមួយ តែតែងត្រូវបានមហាជនជាច្រើនលើកឡើងថា ជាគូស្នេហ៍ផ្អែមល្ហែម និងមានចំណងស្នេហ៍រឹងមាំខ្លាំង។ បច្ចុប្បន្ន ពួកគេទទួលបានចំណងដៃកូនពីរនាក់គឺប្រុសមួយ និងស្រីមួយ។
ក្នុងឱកាសបង្ហាញខ្លួនក្នុងកម្មវិធី “The Return of Superman” គូស្វាមីភរិយាមួយគូនេះ និយាយរៀបរាប់ពីរឿងរ៉ាវស្នេហាដំបូងរបស់ខ្លួន។ តារាស្រី SoYul និងស្វាមីតារាប្រុស Moon HeeJoon បានជួបគ្នាចៃដន្យនៅហាងទំនិញមួយកន្លែងក្នុងតំបន់ Apgujeong ទីក្រុង សេអ៊ូល ហើយអ្នកទាំងពីរក៏ចាប់ផ្ដើមទាក់ទងគ្នាទៅវិញទៅមក។
តារាស្រី SoYul បានទម្លាយថា៖ មានម្ដងនាងពិតជាឃ្លាននំ pastries តែដោយសារនាងជាប់រវល់ខ្លាំងពេក សូម្បីតែពេលទៅទិញយកមកញ៉ាំក៏នាងគ្មានពេលដែរ។ ស្វាមីរបស់នាង បានចងចាំពីចំណុចបន្ដិចបន្ដួចដែលនាងចូលចិត្ដ និងទៅទិញនំនោះមកឲ្យនាង ទាំងដែលពេលនោះពួកយើងទាំងពីរមិនទាន់ក្លាយជាគូស្នេហ៍។ ទង្វើតិចតួចៗ តែផ្អែមល្ហែម និងយកចិត្ដទុកដាក់ធ្វើឲ្យនាងមានអារម្មណ៍រំភើបខ្លាំង។ នាងជឿថា បុរសម្នាក់នេះ នឹងអាចមើលថែនាង និងក្រុមគ្រួសារបានយ៉ាងល្អ ដូច្នេះទើបនាងសម្រេចចិត្ដ សារភាពប្រាប់ស្វាមីរបស់នាង ពីអារម្មណ៍ក្នុងចិត្ដ។
គួរបញ្ជាក់ថា ទោះជាមានអាយុខុសគ្នាដល់ទៅ ១៣ ឆ្នាំ តែគូស្នេហ៍មួយគូនេះ នៅតែមានភាពផ្អែមល្ហែម និងនិយាយរំឮកពីគ្នាជារឿយៗ។ តារាស្រី SoYul ធ្លាប់បានបញ្ជាក់ថា ស្វាមីរបស់នាងក៏ជាអ្នកគាំទ្រក្រុមចម្រៀងនារី Crayon Pop ផងដែរ៕