កាលពីប៉ុន្មានខែមុនដំណឹងនៃការបន្ដ ឬបញ្ចប់កិច្ចសន្យាផ្ដាច់មុខរវាង Soyeon សមាជិកក្រុម (G)I-DLEនិង ក្រុមហ៊ុន CUBE Entertainment ត្រូវបានអ្នកគាំទ្រទន្ទឹងរង់ចាំអ៊ុតមើលលទ្ធផលយ៉ាងអន្ទះសា។
យោងតាមសារព័ត៌មាន Xports News បានបង្ហើបថាការពិភាក្សាទាក់ទងនឹងការបន្ដកិច្ចសន្យារវាងភាគីទាំងពីរបានឈានមកដល់ទីបញ្ចប់ហើយ។ ជាលទ្ធផលនៃការពិភាក្សាគឺមិនទទួលបានជោគជ័យនោះទេដោយ Soyeon បានសម្រេចចិត្តចែកផ្លូវគ្នាជាមួយក្រុមហ៊ុន CUBE Entertainment។

មែនទែនទៅកុងត្រារបស់ Soyeon នឹងត្រូវផុតកំណត់នៅក្នុងខែវិច្ឆិកាខាងមុខនេះ ហើយនាងក៏ធ្លាប់បានឱ្យតម្រុយតាមរយៈការកែបារ៉ូលចម្រៀងកំលុងពេលសម្ដែងនៅក្នុងការប្រគំតន្ដ្រីរបស់ (G)I-DLE នៅទីក្រុងសេអ៊ូលកាលពីខែសីហាដោយបានច្រៀងថា៖ “កិច្ចសន្យាបញ្ចប់នៅខែវិច្ឆិកា។ អ្នកណាទៅអាចឃាត់ខ្ញុំ?”
រំឭកទៅកាលនោះក្រុមហ៊ុន CUBE ដំបូងឡើយបានអះអាងថាសមាជិកទាំងអស់នឹងត្រៀមខ្លួនសម្រាប់ការបន្ដកិច្ចសន្យា ហើយនោះគ្រាន់តែជាផ្នែកមួយនៃការសម្ដែងនៅលើឆាកប៉ុណ្ណោះ។ ក្រោយមកពួកគេក៏បានផ្លាស់ប្ដូរជំហរដោយបញ្ជាក់ថាកិច្ចសន្យាផ្ដាច់មុខរបស់ Soyeon ពិតជានឹងផុតកំណត់នៅខែវិច្ឆិកាមែន។ ចាប់តាំងពីការឱ្យតម្រុយលើកមុនមក Soyeon ក៏បានបង្ហាញគោលជំហរការមិនពេញចិត្តរបស់នាងចំពោះក្រុមហ៊ុន ថែមទាំងធ្លាប់បានរិះគន់ជាសាធារណៈទៀតផង។ បន្ទាប់ពីបានសម្រេចចិត្តចាកចេញពីក្រោមន្រនំ CUBE Entertainment ពេលនេះនាងត្រូវបានគេរាយការណ៍ថានឹងចាប់ផ្ដើមស្វែងរកភ្នាក់ងារថ្មីក្នុងនាមជាតារាចម្រៀងទោល។


មកដល់ពេលនេះសំណួរ និងចម្ងល់ជាច្រើនអំពីសកម្មភាពជាក្រុមនាពេលអនាគតបានកើនឡើងជាលំដាប់ ខណៈកុងត្រារបស់សមាជិកផ្សេងទៀតនៃក្រុម (G)I-DLE នៅមិនទាន់ផុតកំណត់នៅឡើយ។ យ៉ាងណាមិញ នៅព្រឹកថ្ងៃដដែលនោះអ្នកតំណាងក្រុមហ៊ុន CUBE Entertainment ក៏បានចេញមកបញ្ជាក់ម្ដងទៀតថា៖ ពេលនេះពួកគេកំពុងស្ថិតនៅក្នុងដំណើរការពិភាក្សាអំពីកុងត្រាជាមួយ Soyeon យ៉ាងរលូន។ ដូច្នេះចំពោះដំណឹងជាផ្លូវការថាអ្នកទាំងពីរភាគីបន្ដ ឬបញ្ចប់ក្រុមហ៊ុននឹងជូនដំណឹងឆាប់ៗនេះ។ គួរបញ្ជាក់ផងដែរ ពេលវេលានៃកុងត្រារបស់ Soyeon ខុសពីសមាជិកផ្សេងទៀតដោយសារតែនាងបានបង្ហាញខ្លួនជាសិល្បករទោលក្នុងក្រុមហ៊ុន CUBE Entertainment នៅខែវិច្ឆិកា ឆ្នាំ២០១៧ ខណៈក្រុម (G)I-DLE បង្ហាញខ្លួនក្នុងខែឧសភា ឆ្នាំ២០១៨ ជាមួយសមាជិក ៦ នាក់៕


























Account
Security
Favourite Content