មកុដ Miss Grand Cambodia 2024 ពិតជាធ្លាក់ទៅលើ ប៊ី សុធារី ដូចការរំពឹងទុកពីសំណាក់ហ្វេនៗជាច្រើនប្រាកដមែន។ សម្រាប់ការត្រឡប់មកឆាកបវរកញ្ញាលើកនេះ សុធារី ពិតជាធ្វើបានល្អខ្លាំង តាំងពីការស្លៀកពាក់ ម៉ូដសក់ ដូចការលើកឡើងរបស់នាងថា ត្រៀមរួចជាស្រេច សម្រាប់ការប្រកួតប្រជែងដ៏ស្វិតស្វាញដណ្ដើមមកុដតម្លៃរាប់ម៉ឺនដុល្លារ។



ប៊ី សុធារី ស្គាល់ច្បាស់ពីពាក្យថា «បវរកញ្ញា» ព្រោះឆាក Miss Grand Cambodia 2024 មិនមែនឆាកដំបូងឡើយដែលតារាស្រីរូបនេះចូលរួមប្រកួត និងត្រូវតំណាងជាតិចេញទៅកម្មវិធីក្រៅប្រទេសឆាប់ៗ។ អតីតកីឡាការិនីបាល់ទះប្រចាំសាលាវិទ្យាល័យមួយកន្លែងនៅក្នុងទីក្រុងភ្នំពេញរូបនេះ ក៏មានអាជីពម៉ូដែល នាងមានបទពិសោធន៍ពេញខ្លួនប៉ឹបទៅហើយ។ ដូចនេះហើយនាងអះអាងយ៉ាងច្បាស់ថា ការត្រឡប់មកឆាកបវរកញ្ញាលើកនេះ គឺមកដើម្បីមកុដតែម្ដង។
មុនការពាក់មកុដ Miss Grand Cambodia 2024 ប៊ី សុធារី គឺជាម្ចាស់ជើងឯក Miss Grand Kampong Chhnang ដោយបានផ្តួលបេក្ខភាពខ្លាំងៗជាច្រើន ទើបឡើងមកប្រកួត Miss Grand Cambodia 2024 និងទទួលបានជោគជ័យដូចការរំពឹងទុក។


តើបទពិសោធន៍អ្វីខ្លះដែលម្ចាស់ Miss Grand Cambodia 2024 ថ្មីថ្មោងរូបនេះ មានពីមុនមកនោះ ខាងក្រោមគឺជាប្រវត្តិប្រកួតកន្លងមករបស់ សុធារី៖
១. ឆ្នាំ ២០១៣
Asia New Star Model Contest 2013 ដែលជាកម្មវិធីប្រកួតបង្ហាញម៉ូដលំដាប់អាស៊ី ហើយមានបេក្ខភាព៣រូបពីកម្ពុជាចូលរួម តែកាលណោះនាងមិនទទួលបានជោគជ័យនោះទេ។ នៅឆ្នាំដដែល តួឯកស្រីក្នុងរឿង «បាបប្រពន្ធដើម» បានបង្ហាញខ្លួន ក្នុងកម្មវិធីប្រកួតសម្រស់មួយទៀត មានឈ្មោះថា Miss ASEAN 2013 ដែលធ្វើឡើងនៅ ខេត្តឈាងរ៉ៃប្រទេសថៃ ហើយនាងនៅតែមិនទទួលបានលទ្ធផលល្អណាមួយ។

២. ឆ្នាំ ២០១៤
ចូលមកដល់ឆ្នាំ ២០១៤ ស្រីស្អាតកម្ពស់បានរូបនេះ ចេញដំណើរទៅប្រទេសថៃម្ដងទៀត ដើម្បីប្រកួតកម្មវិធី Miss Southeast Asian 2014។ តែលើកទី៣នៅថៃនេះ នាងទទួលបានពានដល់ទៅ២ គឺ Miss Elegance និង Best in Evening Wear។


៣. ឆ្នាំ ២០១៥
នៅឆ្នាំ ២០១៥ នាងក៏បានតំណាងកម្ពុជាចូលរួមកម្មវិធី Super Model International 2015 នៅហ្វីលីពីន ដែលមានបេក្ខភាពមក ៤០ ប្រទេសចូល ហើយនាងបានទទួលបានចំណាត់ថ្នាក់ទី៣ កំពូលម៉ូដែលទៀតផង។


៤. ឆ្នាំ ២០១៦
កាលពីដើមខែកញ្ញាឆ្នាំ ២០១៦ ប៊ី សុធារី បានទៅចូលរួមការប្រកួតមួយនៅឯប្រទេសចិន ដោយការប្រកួតខាងនោះមានឈ្មោះថា Miss Bikini Universe 2016។ កម្មវិធីនោះកញ្ញា បានចូលរួមប្រកួតជាមួយបេក្ខជនមកប្រទេសចំនួន ៥០ មកពីជុំវិញពិភពលោក ក្នុងនោះមានវិញ្ញាសាជាច្រើនផងដែរ។

៥. ឆ្នាំ ២០១៦ និង ២០១៧
ក្លាយជាម្ចាស់មកុដ Miss Cambodia ឆ្នាំ២០១៦។ ក្រោយទទួលបានជោគជ័យជា Miss Cambodia ឆ្នាំបន្ទាប់ សុធារី ក្លាយជា Miss Universe Cambodia 2017 ហើយនាងគឺជាស្ត្រីខ្មែរទី១ ដែលបានតំណាងឲ្យកម្ពុជាចេញទៅប្រកួតបវរកញ្ញាចក្រវាល នៅសហរដ្ឋអាមេរិកនាឆ្នាំ ២០១៧ នាទីក្រុង Las Vegas។ ក្រោយមកនាងផុតកុងត្រាជាមួយស្ថាប័នចាស់របស់ខ្លួន និងមានបញ្ហាបន្តិចបន្តួច ទើបធ្វើឲ្យ សុធារី អស់សិទ្ធិមិនអាចប្រើនាមជាបវរកញ្ញាចក្រវាលកម្ពុជា ២០១៧ ទៀតបានឡើយ តែមហាជននៅតែចងចាំតំណែងមួយនោះរហូត។




៦. ឆ្នាំ ២០២៣
កាលពីឆ្នាំមុនតារាស្រីវ័យ ២៦ ឆ្នាំរូបនេះ ក៏ជាមាននាម Miss Charm Cambodia ដែលមានភារកិច្ចតំណាងកម្ពុជាប្រកួត Miss Charm នៅវៀតណាម។ បើទោះមិនបានជាប់ចំណាត់ថ្នាក់ណាមួយ តែ ប៊ី សុធារី បានឈ្នះក្នុងឈុតតំណាងជាតិ ពីការប្រកួតវគ្គផ្ដាច់ព្រ័ត្រនៃកម្មវិធីMiss Charm International។


ក្រៅពីការចេញទៅប្រកួតនៅឆាកអន្តរជាតិហើយនោះ ប៊ី សុធារី ក៏ធ្លាប់ទៅកម្មវិធីធំៗជាច្រើនដូចជាទៅកូរ៉េ ដើម្បីចូលរួមក្នុងកម្មវិធី Asia Model Festival សម្រាប់ពាន Model Star Award។ ចំណែកការសម្ដែងវិញ ស្រីស្អាតកម្ពស់ ១,៧៥ ម៉ែត្ររូបនេះ បានប្រឡូកខ្លះៗហើយមានទាំងបែបបុរាណ និងសម័យ។ Bee ក៏ជាគ្រូដើរម៉ូដ ព្រមទាំងធ្លាប់ធ្វើជាគណៈកម្មការដាក់ពិន្ទុឲ្យបេក្ខភាពដើរបង្ហាញម៉ូដដទៃទៀតផង។ រឹតតែមិនបាច់និយាយដល់ការដើរបង្ហាញម៉ូដ សុធារី ដើរសឹងតែគ្រប់ Runway តូចធំក្នុងស្រុកទៅហើយ៕





































Account
Security
Favourite Content