គណៈកម្មការ America’s Got Talent លោក Simon Cowell ប្រហែលត្រូវបានគេស្គាល់ច្រើនសម្រាប់ការផ្តល់ដំបូន្មានបែបចំៗមិនទុកមុខដល់គ្រប់បេក្ខជននៅក្នុងកម្មវិធីរបស់លោក។ ប៉ុន្តែមហាសេដ្ឋីក្នុងវិស័យតន្ត្រី និងកម្មវិធីកម្សាន្តរូបនេះបាននិយាយថា លោកអាចនឹងមិនបានមកដល់ចំណុចកំពូលដូចថ្ងៃនេះទេ ប្រសិនបើគ្មានការណែនាំពីឪពុក។

ថ្លែងនៅក្នុងព្រឹត្តិការណ៍មួយក្នុងទីក្រុងឡុងដ៍កាលពីពេលថ្មីៗ សហគ្រិនជនជាតិអង់គ្លេសរូបនេះបានរំលឹកពីកាលលោកអាយុ ១២ ឆ្នាំនៅពេលដែលឪពុករបស់លោកបានផ្តល់ដំបូន្មានដល់លោក។
“គាត់និយាយថា៖ មនុស្សគ្រប់គ្នាសុទ្ធមានស្លាកមួយនៅលើក្បាលរបស់ពួកគេ ដែលសរសេរថា “សុំធ្វើឱ្យខ្ញុំមានអារម្មណ៍ថាខ្លួនសំខាន់”។ លោក Simon Cowell បានរំឭកពីសម្ដីឪពុកបែបនេះនៅឯកម្មវិធី Advertising Week Europe ។
Cowell បន្ថែមថា ដំបូងឡើយ លោកមិនយល់សម្ដីនោះទេ ប៉ុន្តែក្រោយមកទើបលោកបានយល់ពីអ្វីដែលឪពុករបស់ខ្លួនចង់សំដៅ គឺ៖ “ប្រសិនបើអ្នកចូលរួមការងារអ្វីមួយ ចូរចាំថា សមាជិកក្រុមម្នាក់ៗសុទ្ធតែមានចំណែក មានតួនាទីនៅការងារនោះ”។

ផលិតករវ័យ ៦៣ឆ្នាំ ដែលដាក់រហស្សនាមខ្លួនឯងថាជា “មនុស្សគ្មានទេពកោសល្យ” បាននិយាយថាមេរៀននោះបានបង្កើតជោគជ័យដ៏ធំក្នុងអាជីពរបស់លោក។
នៅអាយុ ១៦ ឆ្នាំ លោកបានចាប់ផ្តើមធ្វើការនៅក្រុមហ៊ុនចែកចាយចម្រៀង EMI Music ជាកន្លែងដែលលោកនិយាយថាលោកចាប់អារម្មណ៍ចង់ដឹងពីការងាររបស់អ្នកគ្រប់គ្នានៅទីនោះ ហើយបានស្វែងយល់បន្ថែមអំពីឧស្សាហកម្មនេះ។
“ខ្ញុំចង់ដឹងចង់ឮខ្លាំងណាស់ រហូតធ្វើឱ្យគេធុញពេញអូហ្វីស។ ខ្ញុំធ្លាប់ចូលទៅក្នុងការិយាល័យរបស់អ្នកគ្រប់គ្នា ហើយសួរពួកគេរាប់លានសំណួរ ហើយនៅទីបំផុតខ្ញុំបានដឹងថាអ្នកមិនចាំបាច់មានលក្ខណៈសម្បត្តិច្រើននោះទេដើម្បីរកសិល្បករមកចុះកុងត្រា”។
ប៉ុន្មានឆ្នាំក្រោយមក បន្ទាប់ពីបានវិវត្តខ្លួនក្លាយអ្នកចាត់ការរបស់តារាចម្រៀងល្បីៗដូចជា Westlife និង Five លោក Cowell ក៏មានគំនិតបើកការស្វែងរកទេពកោសល្យក្នុងចំណោមសាធារណជន ដោយបានបង្កើតកម្មវិធីប្រកួតទេពកោសល្យតាមទូរទស្សន៍ដំបូងគឺកម្មវិធី Pop Idol នៅចក្រភពអង់គ្លេស ដែលត្រូវបានទិញសិទ្ធិយកផលិតជាច្រើនប្រទេស ហើយទីបំផុតក៏មានកម្មវិធីផ្សេងៗរួមទាំង The X Factor និង America’s Got Talent ។ លោកនិយាយថា៖ “ការពិតនោះគឺ ដើម្បីធ្វើការងារនេះឲ្យបានល្អ… អ្នកគ្រាន់តែត្រូវរៀន រៀនមើល ហើយរៀនស្តាប់” ៕


























Account
Security
Favourite Content