យប់មិញបណ្ដាតារាស្រី ប្រុសល្បីៗក្នុងប្រទេស អ្នកផលិតមាតិកាក្នុងស្រុកជាច្រើន តារាចម្រៀង តារាសម្ដែង បានមកប្រមូលផ្ដុំកកកុញចូលរួមជាភ្ញៀវកិត្តិយសក្នុងកម្មវិធីមង្គលការ Influencer ល្បីប្រចាំប្រទេស គឺ ហេងសុខវិសាល និង ជា ស្រីនា។
ក្នុងនោះតារាស្រីវ័យក្មេង ស៊ីន ជេននី ប្អូនស្រីបង្កើតតារាស្រីល្បីប្រចាំប្រទេស កញ្ញា ស៊ីន យូប៊ីន ក៏មានវត្តមានចូលរួមនៅក្នុងកម្មវិធីដែរ។ បងប្អូនស្រីទាំងពីរបណ្ដើរគ្នាយ៉ាងត្រសងចូលរួមនៅក្នុងកម្មវិធីធ្វើឱ្យអ្នកចូលរួមមិនតិចនាក់នោះទេចាប់ភ្លឹកពីសម្រស់របស់អ្នកទាំងពីរ។ បន្ថែមពីនេះ ស្រាប់តែដល់វគ្គដែលចាប់ផ្កាសុភមង្គល សំឡេងហ៊ោកញ្ជ្រៀវបានស្រែកឡើងកងរំពងពេញទាំងកម្មវិធី ពេលដឹងថាអ្នកដែលទទួលបានផ្កាសំណាងពីកូនកំលោះកូនក្រមុំគឺ ជេននី។
គ្រាន់តែចាប់ផ្កាបានភ្លាម ជេននី ត្រូវបានអញ្ជើញឱ្យឡើងទៅលើឆាក។ រាងតូចរំភើបពេលទទួលបានផ្កា តែអ្វីដែលកាន់តែរំភើប និងគួរឱ្យភ្ញាក់ផ្អើលសម្រាប់ ជេននី បន្ថែមពីលើអាំងប៉ាវសំណាង កញ្ញាក៏ទទួលបាននូវកុំព្យូទ័រយូរដៃម៉ាក Huewei មួយគ្រឿងតម្លៃប្រមាណ ៦០០ ទៅ ៨០០ ដុល្លាបន្ថែមទៀត តាមការបញ្ចាក់ជូនពីកូនកំលោះ។
គួរបញ្ជាក់ដែរថា កញ្ញា ស៊ីន ជេននី នៅមិនទាន់មានម្ចាស់ចិត្តនៅឡើយទេ នេះបើតាមការបញ្ជាក់ពីកញ្ញាផ្ទាល់ ក្រោយចាប់បានបាច់ផ្កាសំណាងពីគូរស្វាមីល្បីប្រចាំឆ្នាំ លោកវិសាល និង ស្រីនា៕