ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
សម្ដេចតេជោ ហ៊ុន សែន បានសម្រេចឧបត្ថម្ភទ្រទ្រង់សមាគមសិល្បករខ្មែរក្នុងមួយឆ្នាំ ១០ ម៉ឺនដុល្លារអាមេរិករយៈពេល ៥ ឆ្នាំចាប់ពីឆ្នាំ ២០២៤ នៅក្នុងឱកាសនៃការអនុញ្ញាត្តិឱ្យជួបសម្ដែងការគួរសមនៃប្រតិភូសមាគមសិល្បករខ្មែរ ដែលដឹកនាំដោយលោកជំទាវអ្នកឧកញ៉ា ម៉ៅ ចំណាន។
នាព្រឹកថ្ងៃទី២៨ ខែឧសភា ឆ្នាំ ២០២៤ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា អនុញ្ញាតឱ្យប្រតិភូសមាគមសិល្បករខ្មែរ ដឹកនាំដោយលោកជំទាវអ្នកឧកញ៉ា ម៉ៅ ចំណាន ចូលជួបដើម្បីសម្ដែងការគួរសមនៅ វិមាន ៧ មករា រាជធានីភ្នំពេញ។ បង្ហាញវត្តមាននៅក្នុងការចូលរួមមានប្រធានសមាគមសិល្បករខ្មែរ និងមានសិល្បករជាច្រើនដូចជាលោក ទេព រិនដារ៉ូ, កញ្ញា ស៊ីន យូប៊ីន, តារាកំប្លែងនាយ ពែកមី ក៏ដូចជាថ្នាក់ដឹកនាំជាន់ខ្ពស់ជាច្រើនរូបទៀត។
ថ្លែងក្នុងឱកាសនៃការជួបសំណេះសំណាលនេះដែរ លោកជំទាវអ្នកឧកញ៉ា ម៉ៅ ចំណាន ក៏បានធ្វើរបាយការណ៍ជូនសម្ដេចតេជោអំពីសាវតារសង្ខេបរបស់សមាគមសិល្បករខ្មែរក្រោមការជួយទ្រទ្រង់ និងគាំទ្រពីសម្ដេចតេជោ និងសម្ដេចកិត្តិព្រឹទ្ធបណ្ឌិត ក៏ដូចជាសកម្មភាពនានាដែលត្រៀមរៀបចំនៅក្នុងអាណត្តិថ្មីនេះផងដែរ។ ភរិយាអ្នកឧកញ៉ា គិត ម៉េង ក៏បានគោរពថ្លែងអំណរគុណសម្ដេចតេជោ ដែលបានចំណាយពេលវេលាដ៏មានតម្លៃទទួលជួបសមាជិកក្រុមក្រុមប្រឹក្សាភិបាលនៃសមាគមសិល្បករខ្មែរ ដែលនេះជាសារវិជ្ជមានសម្រាប់សមាគម។
ជាកិច្ចឆ្លើយតប សម្ដេចតេជោ ហ៊ុន សែន បានកោតសរសើរចំពោះការរៀបចំសមាគមចាប់ពីការបោះឆ្នោតជ្រើសរើសប្រធានថ្មី។ សម្ដេចបានគូសបញ្ចាក់ថា ការកកើតឱ្យមានសមាគមជារឿងល្អហើយ ក៏ប៉ុន្តែការធានានិរន្តរភាពជាការលំបាក។ សម្ដេចជឿជាក់ថា នៅក្នុងអាណត្តិថ្មីនេះសមាគមអាចជៀសផុតពីការលំបាកកើតមានកន្លងមកតាមរយៈការរៀបចំរចនាសម្ព័ន្ធគ្រប់គ្រងឡើងវិញ និងការពង្រឹងសីលធម៌របស់សិល្បករសិល្បការិនី។ ជាចុងក្រោយប្រធានក្រុមឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុ បានជូនពរលោកជំទាវអ្នកឧកញ៉ា ម៉ៅ ចំណាន និងសមាជិកក្រុមប្រឹក្សាភិបាលនៃសមាគមឱ្យមានសុខភាពល្អ និងជោគជ័យជាបន្តបន្ទាប់ទៀត៕
Account
Security
Favourite Content