ក្រោយពិភាក្សាយ៉ាងម៉ត់ចត់ និងព្រមព្រៀងគ្នាជាមួយសមាជិកទាំងអស់របស់ Pentagon ផលិតកម្ម Cube Entertainment បានចេញប្រកាសអំពីការបញ្ចប់កុងត្រារបស់សមាជិក ៥ នាក់ដែលមាន Yeo One, Yan An, Yuto, Kino និង Wooseok។

ជាមួយការប្រកាសដំណឹងមួយនេះភ្លាមៗបានបង្កើតឱ្យមានពាក្យចចាមអារ៉ាមថា Pentagon អាចនឹងបំបែកក្រុមឆាប់ៗនេះដែលធ្វើឱ្យអ្នកគាំទ្រជាច្រើនព្រួយបារម្ភយ៉ាងខ្លាំង។ យ៉ាងណាមិញ ក៏មានសមាជិកបានចេញមុខបដិសេធចំពោះពាក្យចចាមអារ៉ាមនេះ។
សមាជិក Yeo One បានផ្ញើរសារទៅកាន់អ្នកគាំទ្រថាការផ្លាស់ប្ដូរតែងតែនាំមកនូវឱកាសថ្មីៗជានិច្ច ហើយវាក៏ជាពេលវេលាត្រឹមត្រូវមួយដើម្បីទទួលយកការប្រកួតប្រជែងថ្មីដើម្បីបង្កើនគុណភាពតន្រ្តីសម្រាប់អ្នកគាំទ្រជាទីស្រឡាញ់។ លោកបានបន្តថាបើទោះបីជាលោកបានចាកចេញពី Cube Entertainment មែន ប៉ុន្តែការលះបង់ក្នុងនាមជាសមាជិក Pentagon នៅតែមិនផ្លាស់ប្ដូរ។



បើទោះបីជាលោកមិនបាននៅក្នុងក្រុមតែមួយពិតមែន ក៏លោកនៅតែពង្រីកក្ដីស្រឡាញ់ចំពោះអ្នកគាំទ្រឱ្យកាន់តែធំជាងមុនដោយសន្យាថានឹងបន្តចែករំលែកពេលវេលាដ៏ស្រស់ស្អាត និងរីករាយជាមួយពួកគេក្នុងនាមជាសមាជិក Pentagon ហើយលោកនឹងខិតខំប្រឹងប្រែងឱ្យបានល្អបំផុត មិនថាលោកនៅទីណានោះទេ។


អ្វីដែលសំខាន់គឺ Yeo One បានសង្កត់ធ្ងន់ថាក្រុម Pentagon មិនបានរំសាយនោះទេ ហើយនេះក៏មិនមែនជាការដកខ្លួន ឬការរំសាយដែរ។ ជាមួយគ្នានេះ ដើម្បីឱ្យកាន់តែច្បាស់ Kino ដែលជាសមាជិកម្នាក់ទៀតក៏បានបង្ហោះរូបមួយសន្លឹកដោយមានភ្ជាប់ជាមួយពាក្យថា “តើអ្វីគឺជាការរំសាយក្រុម?” ។ ដូច្នេះហើយទាំងនេះគឺជាសញ្ញាថាពួកគេ ក្រុម Pentagon មិនបានបំបែកក្រុមនោះទេ ប៉ុន្តែគ្រាន់តែបន្តជាមួយសមាជិកដែលនៅសល់ប៉ុណ្ណោះ ៕























Account
Security
Favourite Content