Park Seo Joon បានចែករំលែកចរិតជាមនុស្សជំនាន់ Gen Z របស់ Han So Hee ដោយប្រាប់ថានេះជាបទពិសោធន៍ថ្មីដែលលោកមិនដែលជួប នៅពេលសម្ដែងជាមួយគ្នានៅក្នុងរឿង Gyeongseong Creature។

កាលពីថ្ងៃទី៧ ខែតុលា នេះ តារាសម្ដែងកូរ៉េខាងត្បូងរូបនេះបានចូលរួមជាភ្ញៀវកិត្តិយសក្នុងកម្មវិធី We Would Meet ដែលមានលោក Sung Si Kyong ជាពិធីករ។ ជាកម្មវិធីសម្ភាស ទាំងពិធីករ និងភ្ញៀវកត្តិយសបាននិយាយពីរឿងរ៉ាវផ្សេងៗទាក់ទងនឹងជីវិតផ្ទាល់ខ្លួន ក៏ដូចជាជីវិតការងាររបស់ Park Seo Joon ផងដែរ។
ជាក់ស្ដែង អ្នកសម្របសម្រួលរូបនេះបានលើកសរសើរថា សមត្ថភាពសម្ដែង និងភាពស៊ីសង្វាក់គ្នារវាងតួអង្គទាំងពីរនាក់នេះ។ Sung Si Kyong បានបន្ថែមថា បើទោះបីជាមានឈុតឆាកខ្លះវាជាឈុតឆាកសមញ្ញដែលអ្នកដទៃធ្លាប់ធ្វើពីមុនហើយក៏ដោយ តែនៅពេលដែលអ្នកទាំងពីរសម្ដែងជាមួយគ្នា ឈុតឆាកនោះនៅតែអាចទាញយកបេះដូងរបស់ទស្សនិកជនបាន ហើយជាពិសេសសមត្ថភាពសម្ដែងរបស់ Han So Hee ពិតជាអស្ចារ្យ។

ក្រោយពីឮបែបនេះ ម្ចាស់ពានរង្វាន់ AFA Rising Star Award របស់ Asian Film Award រូបនេះ មិនបានប្រកែកទៅលើការលើកឡើងនេះទេ លោកក៏បានបន្ថែមដែរថា ការរួមការងារជាមួយនឹងតារាស្រីរូបនេះជាបទពិសោធន៍ថ្មីមួយសម្រាប់លោក មិនថានៅក្នុងតួអង្គសម្ដែង និងនៅក្នុងជីវិតពិតនោះទេ។
“មនុស្សជាច្រើនតែងតែថា Han So Hee ជាមនុស្សដែលមានចរិតជា Gen Z ហើយការធ្វើការជាមួយនាងក៏ធ្វើឱ្យខ្ញុំមានអារម្មណ៍ថាថ្មីប្លែកដែរ តែវាជារឿងល្អមែនទែន” Park Seo Joon លើកឡើងបែបនេះ។
មុននឹងបញ្ចប់កិច្ចសន្ទនាទាក់ទងនឹងមិត្តរួមអាជីពម្នាក់នេះ លោកក៏បានបន្ថែមទៀតថា Han So Hee ជាមនុស្សស្រីម្នាក់ដែលមានមន្តស្នេហ៍ ហើយលោកក៏រំពឹងថានឹងអាចស្វែងយល់បន្ថែមពីនាងផងដែរ ៕

























Account
Security
Favourite Content