តារាចម្រៀងកូរ៉េ Park Bom បានប្រកាសផ្អាកគ្រប់សកម្មភាពជាមួយក្រុម 2NE1 ជាបណ្តោះអាសន្ន ក្រោយមានការណែនាំពីសំណាក់គ្រូពេទ្យ។


កាលពីថ្ងៃទី៦ ខែសីហា ទីភ្នាក់ងាររបស់តារាស្រីវ័យ ៤១ឆ្នាំរូបនេះគឺ D-Nation Entertainment បានបង្ហោះសេចក្តីថ្លែងការណ៍ផ្លូវការមួយនៅលើប្រព័ន្ធផ្សព្វផ្សាយសង្គម ដោយបានរៀបរាប់ថា “យើងខ្ញុំសូមជូនដំណឹងដល់អ្នកគាំទ្រគ្រប់គ្នាថា Park Bom នឹងមិនអាចចូលរួមក្នុងសកម្មភាពនាពេលខាងមុខរបស់ 2NE1 នោះទេ” ។
ទីភ្នាក់ងារនេះបានពន្យល់ថាការសម្រេចចិត្តនេះត្រូវបានធ្វើឡើងបន្ទាប់ពីអ្នកជំនាញផ្នែកវេជ្ជសាស្រ្តបានណែនាំ Park Bom ថានាងត្រូវការសម្រាកបន្ថែម និងបញ្ជាក់ទៀតថា បន្ទាប់ពីការពិភាក្សាគ្នាយ៉ាងយូរ ពួកគេបានធ្វើការសម្រេចចិត្តបែបនេះដោយមិនអាចជៀសវាងបាន។
ទីភ្នាក់ងារនេះបានបន្ថែមថា “យើងស្នើសុំឱ្យអ្នកគាំទ្របន្តផ្ដល់ការគាំទ្រដ៏កក់ក្តៅសម្រាប់ការជាសះស្បើយរបស់ Park Bom។ យើងក៏សូមកោតសរសើរចំពោះការលើកទឹកចិត្តរបស់គ្រប់គ្នាចំពោះ Sandara Park, CL និង Gong Minzy ដែលនឹងប្រឹងប្រែងឱ្យអស់ពីសមត្ថភាពដើម្បីធានាថាការអវត្តមានរបស់ Park Bom នឹងមិនមានបញ្ហាអ្វីឡើយ”។
គួរបញ្ជាក់ថា ថ្មីៗនេះ Park Bom បានប្រឈមមុខនឹងភាពចម្រូងចម្រាសលើអ៊ីនធឺណិតជាច្រើន រួមមានការរំពឹងទុកជុំវិញការផ្លាស់ប្តូររូបរាង ព្រមទាំងមតិសាធារណៈទាក់ទងនឹងការសម្រកទម្ងន់ និងការឡើងទម្ងន់វិញរបស់នាង។ ត្បិតកំពុងមានបញ្ហាសុខភាព ប៉ុន្តែ Park Bom បានព្យាយាមចូលរួមសម្ដែងជាមួយ 2NE1 ជាហូរហែក្នុងរយៈពេលមួយខែកន្លងមក ដូចជាការសម្ដែងនៅប្រទេសកម្ពុជាកាលពីថ្ងៃទី៥ ខែកក្កដា ការសម្ដែងក្នុងកម្មវិធី Waterbomb នៅសេអ៊ូល និងចុងក្រោយគឺការសម្ដែងក្នុងការប្រកួតបាល់ទាត់ 2025 Coupang Play Series កាលពីថ្ងៃទី៣ ខែសីហា។
ខណៈលែងមានវត្តមាន Park Bom សមាជិកបីនាក់ទៀតរបស់ 2NE1 នឹងបន្តការសម្តែងនៅព្រឹត្តិការណ៍ Waterbomb Bali 2025 ក្នុងខែកញ្ញា នៅប្រទេសឥណ្ឌូនេស៊ី ៕

























Account
Security
Favourite Content