ការប្រកួតវគ្គផ្ដាច់ព្រ័ត្រនៃកម្មវិធី Miss Mera Cambodia បានបញ្ចប់យ៉ាងរលូនកាលពីរាត្រីម្សិលមិញ ដោយម្ចាស់ជយលាភីបានទៅលើកញ្ញា ថាន រតនា ក្នុងនោះដែរ បវរកញ្ញា ៣ រូបមកពីកម្មវិធីផ្សេងគ្នា ក៏បានចូលរួម និងបានដើរបង្ហាញខ្លួនយ៉ាងស្រស់ស្អាតនៅលើឆាកបើកវគ្គ SPOTWEAR។
នារាត្រីថ្ងៃ ៣ ខែធ្នូ ២០២៤ បវរកញ្ញាទាំង ៣ ត្រូវបានកម្មវិធីប្រកួតសម្រស់ Miss Mera Cambodia អញ្ជើញជាគណៈកម្មការកិត្តិយសក្នុងការដាក់ពិន្ទុជូនដល់បេក្ខភាពប្រកួតនៅក្នុងវគ្គផ្ដាច់ព្រ័ត្រ។ មិនត្រឹមចូលរួមជាគណៈកម្មការដាក់ពិន្ទុប៉ុណ្ណោះទេ បវរកញ្ញាទាំង ៣ រូបថែមទាំងបានដើរបើកឆាកជាមួយឈុតសម្លៀកបំពាក់យ៉ាងទាក់ទាញ និងរំលេចនូវភាពស្រស់ស្អាតរៀងៗខ្លួនទៀតផង។
បវរកញ្ញាទាំង ៣ រូបរួមមាន៖ ចន សុទីម៉ា Miss Universe Cambodia 2023 កម្ពស់ ១,៨០ ម៉ែត្រ បានស្លៀករ៉ូបពណ៌ស ស្លាបសមានបន្ថែមឌិតជាច្រើនស្អេកស្កះ ហើយម្នាក់ទៀត ពេជ្រ វត្តីសារ៉ាវឌ្ឍី Miss Grand Cambodia 2022 បានស្លៀកឈុត Bikini ពណ៌ស ហើយឈុត សៃ ហ្វុន Miss Queen Cambodia 2020 ក៏មិនសូវខុសពី វត្តី ដែរ។
បវរកញ្ញាទាំងបីរូបនេះសុទ្ធសឹងតែជាជើងខ្លាំងដែលអាចដណ្ដើមមកុដជយលាភី និងក្លាយជាបវរកញ្ញាតំណាងប្រទេសចូលរួមនៅក្នុងការប្រកួតនៅលើឆាកអន្តរជាតិ។ មិនតែប៉ុណ្ណោះអ្នកទាំងបីសុទ្ធតែមានសម្រស់ស្រស់ស្អាត ភាពទាក់ទាញ និងទេពកោសល្យរៀងៗខ្លួនក្នុងការកាន់ដំណែងរបស់ពួកគេ៕
ប្រភពរូបភាព ៖ ផេកផ្លូវការ Miss Mera Cambodia និងផេកបវរកញ្ញាទាំង៣រូប