ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
លោកជំទាវអ្នកឧកញ៉ា ម៉ៅ ចំណាន ភរិយាឆ្នើមរបស់អ្នកឧកញ៉ា គិត ម៉េង បានបំពេញគ្រប់លក្ខខណ្ឌឈរឈ្មោះបោះឆ្នោត ជាប្រធានសមាគមសិល្បករខ្មែរហើយ។ នេះបើយោងតាមគណៈកម្មការបណ្ដោះអាសន្នរៀបចំការបោះឆ្នោតជ្រើសរើសប្រធានសមាគមសិល្បករខ្មែរដឹកនាំដោយក្រសួងវប្បធម៌ និងវិចិត្រសិល្បៈ។
បើតាមគណៈកម្មការរៀបចំការបោះឆ្នោតបានបញ្ជាក់ថា លោកជំទាវអ្នកឧកញ៉ា ម៉ៅ ចំណាន បានបំពេញលក្ខខណ្ឌ ដែលគណៈកម្មការកំណត់រួចរាល់អស់ហើយដូចជាពាក្យស្នើសុំឈរឈ្មោះ និងការបំពេញប្រវត្តិរូបជាដើម។ ដោយឡែក អ្នកមានបំណងឈរឈ្មោះសម្រាប់ការបោះឆ្នោតមួយចំនួនទៀត បានសាកសួរព័ត៌មាន និងទទួលពាក្យពីគណៈកម្មការ ដើម្បីបំពេញក្នុងការចូលរួមផងដែរ ប៉ុន្តែក្រុមការងារមិនទាន់បានទទួលត្រឡប់មកវិញនៅឡើយ។
ទោះបីជាយ៉ាងណា គណៈកម្មការរៀបចំការបោះឆ្នោតជ្រើសរើសប្រធានសមាគមសិល្បករខ្មែរអាណត្តិទី៦ ការដាក់ពាក្យ និងទទួលពាក្យបន្តរហូតដល់ថ្ងៃទី ២៤ ខែមេសា ឆ្នាំ ២០២៤។ បើតាមគណៈកម្មការបានបន្តថា ប្រសិនបើអ្នកឧកញ៉ា ឧកញ៉ា ឯកឧត្ដមលោកជំទាវ អស់លោកលោកស្រី និងសិល្បករ សិល្បការិនីទាំងអស់ មានបំណងឈរឈ្មោះជាប្រធានសមាគមសិល្បករខ្មែរអាណត្តិទី៦ នេះ អាចទៅទទួលពាក្យស្នើសុំនៅទីស្នាក់ការបណ្ដោះអាសន្ននៃគណៈកម្មការដែលមានអាសយដ្ឋានផ្ទះលេខ២ មហាវិថី ម៉ៅសេទុង (ក្រោយក្រសួងកសិកម្ម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ចាប់ពីថ្ងៃចន្ទដល់ថ្ងៃសុក្ររៀងរាល់ម៉ោងធ្វើការ។ ឬអាចទំនាក់ទំនងតាមរយៈលេខទូរសព្ទ ០១៦ ២២២ ៩២៩)។
សូមជម្រាបជូនថា សមាគមសិល្បករខ្មែរ ត្រូវបានបង្កើតឡើងដំបូងនៅកាលពីឆ្នាំ ២០០៦ ដោយមានការផ្ដួចផ្ដើមគំនិតរបស់អ្នកស្នេហាវិស័យសិល្បៈមួយចំនួន ក្នុងគោលបំណង អភិរក្ស អភិវឌ្ឍន៍ លើកស្ទួយវិស័យសិល្បៈជាតិ និងជួយដោះស្រាយរាល់បញ្ហារបស់អ្នកសិល្បៈ ជាពិសេសជួយដល់អ្នកសិល្បៈចាស់ជរា ពិការបាត់បង់សមត្ថភាព និងបាត់បង់ជីវិត និងរួមចំណែកជួយដល់សង្គមជាតិជាដើម។
មួយរយៈកន្លងមកនេះ សមាគមសិល្បករខ្មែរក៏បានដើរតួនាទីដ៏សំខាន់មួយជាសេនាធិការឱ្យក្រសួងវប្បធម៌ និងវិចិត្រសិល្បៈក្នុងការចូលរួមបង្កើតសកម្មភាពសិល្បៈនានា ដើម្បីការលើកស្ទួយវប្បធម៌ជាតិ ក៏ដូចជាការជួយសម្រួលកិច្ចការលំបាកផ្សេងៗមួយចំនួនរបស់សិល្បករ សិល្បការិនីដែលជួបបញ្ហាដូចអ្វីដែលជាគោលការណ៍របស់សមាគមផងដែរ។
គណៈកម្មការដឹកនាំដោយក្រសួងវប្បធម៌ និងវិចិត្រសិល្បៈកំពុងដំណើរការរៀបចំការបោះឆ្នោតជាផ្លូវការជ្រើសប្រធានសមាគមសិល្បករខ្មែរអាណត្តិថ្មីនៅថ្ងៃទី២ ខែឧសភា ឆ្នាំ ២០២៤ ឆាប់ៗនេះ។ ដោយឡែកដោយយោងតាមសេចក្ដីជូនដំណឹងរបស់សមាគមកន្លងមកបញ្ជាក់ថា ការដាក់ពាក្យ និងទទួលពាក្យឈរឈ្មោះបោះឆ្នោតត្រូវបានគណៈកម្មការកំណត់យកពីថ្ងៃទី ៤ ដល់ថ្ងៃទី១៩ ខែមេសា ឆ្នាំ ២០២៤។ ទោះបីជាយ៉ាងណារហូតមកដល់ពេលនេះ ក្រៅពីលោកជំទាវអ្នកឧកញ៉ា ម៉ៅ ចំណាន នៅមិនទាន់មានបេក្ខភាពដទៃទៀតដាក់ពាក្យឈរឈ្មោះនៅឡើយ៕
Account
Security
Favourite Content