កញ្ញា ម៉ាច ដាវី Miss Grand តំណាងខេត្តរតនគីរី ហាក់មានទំនុកចិត្តខ្ពស់លើខ្លួនឯង ក្នុងការប្រកួតប្រជែងដណ្តើមកុដ Miss Grand Cambodia 2024 ពីសំណាក់បេក្ខភាពជើងខ្លាំងជាច្រើនរូប។

តាមការកត់សម្គាល់ ក្រោយចប់ពិធីសន្និសីទកាសែត និងការបំពាក់ឆៀង កាលពីថ្ងៃ១០ ខែមេសា ឆ្នាំ ២០២៤ រួចមក បេក្ខភាពផ្លូវការទាំង ២៨ រូប រួមទាំង ម៉ាច ដាវី សុទ្ធសឹងតែមានសមត្ថភាពខ្ពស់ និងមានការត្រៀមខ្លួនល្អថែមទៀតផងក្នុងការដណ្ដើមមកុដ។
ទាំងបេក្ខភាពធ្លាប់មានបទពិសោធន៍ និងបេក្ខភាពថ្មីមើលទៅសុទ្ធតែឆន្ទៈខ្ពស់មិនចាញ់គ្នាប៉ុន្មានឡើយ ទាំងសម្រស់ សមត្ថភាព និងទេពកោសល្យ រហូតគ្រប់គ្នាលាន់មាត់ថា សមភូមិ Miss Grand Cambodia ឆ្នាំនេះ ពិតជាក្តៅដូចបាយពុះមិនខានទេ ព្រោះគ្រាន់តែថ្ងៃបំពាក់ឆៀង ម្នាក់ៗមើលទៅស្វាហាប់ក្នុងការសន្សំពិន្ទុខ្លាំងមែនទែន។

ក្រឡេកទៅមើល Miss Grand តំណាងខេត្តរតនគីរី ម៉ាច ដាវី ឯណោះវិញ មិនបន្ធូរដៃឱ្យបេក្ខភាពដទៃនាំមុខឡើយ ដោយបានបញ្ចេញសម្រស់ផូរផង់ជាមួយសមត្ថភាពដើរម៉ូដដ៏ទាក់ទាញ បង្ហាញឱ្យទស្សនិកជនឃើញពីការត្រៀមខ្លួនយ៉ាងល្អរបស់នាង។ មិនតែប៉ុណ្ណោះ ដាវី បានបង្ហោះរូបថតបែប fashion ជាច្រើនសន្លឹកលើបណ្តាញសង្គមហ្វេសប៊ុក ធ្វើឱ្យហ្វេនៗ និងអ្នកស្នេហាវិស័យបវរកញ្ញាងាក្រសែភ្នែកមកចាប់អារម្មណ៍លើរូបនាងគ្រប់ៗគ្នា។



គ្រប់បទសម្ភាសន៍ រួមទាំងការ live ផ្សេងៗលើបណ្តាញសង្គម ស្រីស្អាត ម៉ាច ដាវី តែងតែបង្ហាញជំនឿចិត្តខ្ពស់ ស្ទើរតែ ១០០% ក្នុងការប្រកួតដណ្តើមមកុដ Miss Grand Cambodia 2024 ដើម្បីមានឱកាសក្លាយជាបវរកញ្ញាតំណាងប្រទេសកម្ពុជាប្រកួតលើឆាកអន្តរជាតិ ទោះបីបេក្ខភាពឆ្នាំនេះសុទ្ធសឹងតែជើងខ្លាំងក៏នាងមិនរុញថយឡើយ។ ម៉្យាង ក្រោមការជ្រោមជ្រែងរបស់ លោក Ab Vanna អ្នកគ្រប់គ្រង Miss Grand រតនគីរី រឹតតែធ្វើឱ្យនាងមានកម្លាំងចិត្ត ភាពកក់ក្តៅ ព្រោះលោកមើលថែបេក្ខភាពយ៉ាងដិតដល់ មិនមានកន្លែងខ្វះចន្លោះត្រង់ណាឡើយ។
ចង់ដឹងថា សមត្ថភាពរបស់ កញ្ញា ម៉ាច ដាវី វិវត្តន៍ខ្លាំងកម្រិតណា រង់ចាំតាមដានការប្រកួត Miss Grand Cambodia 2024 ទាំងអស់គ្នា!


























Account
Security
Favourite Content