សមាជិកកូនពៅរបស់ក្រុម BLACKPINK គឺ Lisa បានឈានចូលវ័យ ២៧ ឆ្នាំហើយ នៅថ្ងៃទី ២៧ ខែមីនា ឆ្នាំ ២០២៤ ខណៈសមាជិក BLACKPINK និងអ្នកគាំទ្រជាច្រើនបានជូនពរដល់រូបនាងក្នុងថ្ងៃកំណើត។ ទន្ទឹមនេះ ដើម្បីជាចែករំលែកក្ដីរីករាយក្នុងថ្ងៃកំណើត និងជាកាដូជូនអ្នកគាំទ្រផងនោះ Lisa បានបង្ហោះវីដេអូលើបណ្ដាញសង្គមយូធូប LLOUD។
Lisa បានបង្ហាញពីសកម្មភាពមួយចំនួន អំឡុងពេលធ្វើកម្មវិធីខួបកំណើតរបស់ខ្លួន។ ជាមួយគ្នាដែរ នាងក៏បាន បង្ហាញពីផ្ទះថ្មីរបស់នាង និងរថយន្ដស៊េរីទំនើបរបស់ខ្លួនថែមទៀត។ កាលពីឆ្នាំ ២០២៣ Lisa ត្រូវបានគេរាយការណ៍ថា រូបនាងបានទិញផ្ទះថ្មី នៅតំបន់ Seongbuk-Dong ទីក្រុង សេអ៊ូល ប្រទេសកូរ៉េ ដោយវាជាផ្ទះទិញដោយប្រាក់សុទ្ធទាំងអស់តែម្ដង។ ផ្ទះនោះគឺមានតម្លៃប្រមាណ ៧.៥ ពាន់លានវ៉ុន ឬប្រហាក់ប្រហែលជាង ៥ លានដុល្លារអាមេរិក។ អមជាមួយគ្នា នាងក៏បង្ហាញពីរថយន្ដម៉ាក Mercedes-AMG G63-Mansory (G-Class) ដែលវារថយន្ដ មានការរចនាពិសេស និងផ្នែកឡានខាងក្នុងបានដាក់ពណ៌ លឿង ជាពណ៌ដែល Lisa ចូលចិត្ដ។ ដោយសាររថយន្ដនេះ មានការរចនាពិសេសជាងរថយន្ដទូទៅ ដូច្នេះវាត្រូវបានរាយការណ៍ថា មានតម្លៃចន្លោះពី ៩០ ម៉ឺន ទៅ ១.២ លានដុល្លារអាមេរិក។
ក្រៅពីនេះម្ចាស់ក្រុមហ៊ុន LLOUD បានបង្ហើបពីគម្រោងរបស់នាងសម្រាប់ឆ្នាំ ២០២៤ គឺរូបនាងចង់បញ្ចេញចម្រៀង និងអាល់ប៊ុមថ្មី។ ឆ្លៀតក្នុងឱកាសនេះដែរ នាងក៏បានលើកទឹកចិត្ដដល់អ្នកគាំទ្រ និងទម្លាយពីការសម្ងាត់ដែលតែងធ្វើឲ្យនាងមានភាពជឿជាក់ នោះគឺ មានការគិតវិជ្ជមាន នៅពេលដែលអ្នកមានគំនិតវិជ្ជមាន រឿងល្អៗនឹងកើតមានឡើង ដូច្នេះភាពជឿជាក់នឹងចេញមកដោយខ្លួនឯងពីក្នុងខ្លួន៕