ថ្មីៗនេះតារាសម្ដែងប្រុស Lee Jung Jae បានឈ្នះពានរង្វាន់ Film Artist Award ជាមួយនឹងប្រាក់រង្វាន់ដល់ទៅ ៥០ លានវ៉ុនប្រហែលជាង ៣៨ ០០០ ដុល្លារអាមេរិក ក្នុងកម្មវិធី SACF Beautiful Artist Award លើកទី ១៣ ដែលរៀបចំដោយមូលនិធិសិល្បៈ និងវប្បធម៌ Shin Young Kyun។

អ្វីដែលធ្វើឱ្យមហាជនកាន់តែកោតសរសើរទៀតនោះគឺលោកបានបរិច្ចាគប្រាក់រង្វាន់ទាំងអស់ទៅកាន់សមាគមន៍ផលិតករភាពយន្តជាន់ខ្ពស់កូរ៉េ។ យោងតាមប្រព័ន្ធផ្សព្វផ្សាយកូរ៉េ KBIZoom តារាប្រុស Lee Jung Jae បានលើកឡើងថានៅពេលលោកបានឮពាក្យចចាមអារ៉ាមថាផលិតករភាពយន្តជើងចាស់ដែលបានលះបង់ទាំងកម្លាំងកាយចិត្ត និងយុវភាពដើម្បីផលិតភាពយន្តបែរកំពុងរស់នៅជាមួយភាពក្រីក្រ និងជំងឺបានធ្វើឱ្យលោកមានអារម្មណ៍សោកស្ដាយ ក្នុងនាមជាយុវជន និងផលិតករជំនាន់ក្រោយម្នាក់។ លោកបន្ថែមថាវាពិតជាឈឺចាប់មែនទែននៅពេលដែលលោកបានដឹងពីការចាកចេញដ៏ឯកោរបស់ពួកគេម្ដងម្នាក់ៗ។


មិនត្រឹមប៉ុណ្ណេះតារាសម្ដែងប្រុស Lee Jung Jae ដែលជាតារាម៉ូដែលផ្សព្វផ្សាយឱ្យក្រុមហ៊ុនចំណីអាហារក៏គ្រោងនឹងចែកអាហារខ្លះៗមានតម្លៃសរុបប្រមាណ ៣០ លានវ៉ុនរួមជាមួយឧបករណ៍ម៉ាស្សាមួយចំនួនដែលមានតម្លៃប្រហែល ៥ លានវ៉ុនផងដែរ។
គួរបញ្ជាក់ផងដែរថាតារាសម្ដែងប្រុស Lee Jung Jae បានចូលប្រឡូកក្នុងវិស័យសម្ដែងកុនតាំងពីឆ្នាំ ១៩៩៣ ក្នុងខ្សែភាពយន្តជាច្រើនដូចជា “The Young Man” “The Housemaid” “The Face Reader” និង “Assassination” ជាដើម។ រហូតមកដល់ឆ្នាំ ២០២១ ប្រជាប្រិយភាពរបស់លោកក៏បានកើនឡើងកាន់តែខ្លាំងក្រោយពេលលោកសម្ដែងជាតួឯកប្រុសក្នុងរឿង “Squid Game” ដែលធ្វើឱ្យលោកបានទទួលពានរង្វាន់តូឯកប្រុសឆ្នើម និងមានអ្នកគាំទ្រជាច្រើនកាន់តែស្រឡាញ់ចូលចិត្តលោកផងដែរ។ បច្ចុប្បន្នលោកក៏កំពុងធ្វើការជាអ្នកដឹកនាំរឿងដែរដោយរឿងនោះមានចំណងជើងថា “Hunt”៕





























Account
Security
Favourite Content