កំលោះសង្ហា ជា សុជាតិ សមាជិកក្រុមចម្រៀងក្មេងខ្មែរ (KmengKhmer) ដែលជាក្រុមចម្រៀងដ៏មានប្រជាប្រិយភាពក្នុងដួងចិត្តយុវវ័យនាពេលបច្ចុប្បន្ន។ ជារឿយអ្នកកំលោះរូបនេះ រមែងត្រូវគេលើកសរសើរពីទឹកដមសំនៀង និងការប្រើប្រាស់សំឡេង ដែលឱ្យអ្នកស្តាប់ហើយចង់ស្តាប់ទៀត ជាពិសេសពេលដែលលោកបកស្រាយចម្រៀងរួមគ្នាជាមួយ កៅ ពន្លឺ សមាជិកក្រុមក្មេងខ្មែរម្នាក់ទៀត។
មុនសាងកេរ្តិ៍ឈ្មោះលើវិថីសិល្បៈដូចសព្វថ្ងៃ ក្រុមក្មេងខ្មែរ បានតស៊ូពុះពារឧបសគ្គច្រើនរាប់មិនអស់ តែដោយសារក្រុមមានគោលដៅច្បាស់លាស់ គួបផ្សំសមត្ថភាពរបស់សិល្បករទាំង ២ ធ្វើឱ្យក្រុមចម្រៀងបុរសនេះល្បីសុះសាយរហូតសព្វថ្ងៃ។
មិនត្រឹមតែចូលចិត្តចែករំលែកអារម្មណ៍ មនោសញ្ចេតនាតាមរយៈឃ្លាឃ្លោងប្រយោគចម្រៀងប៉ុណ្ណោះទេ កន្លងមកសមាជិកក្រុមក្មេងខ្មែររូបនេះ តែងតែចែករំលែកបទពិសោធន៍ និងតិកនិចផ្សេងៗទៅកាន់អ្នកគាំទ្រ និងមនុស្សជុំវិញខ្លួន។ ក្នុងចំណោមនោះ កំលោះសង្ហា ជា សុជាតិ ក៏ធ្លាប់បានចែករំលែកចំណេះដឹង និងបទពិសោធន៍ខ្លះៗនៃការច្រៀងរបស់លោកទៅកាន់អ្នកគាំទ្រផងដែរ ដោយលោកបានលើកឡើងពីលំហាត់ ៥ ចំណុចងាយៗ ដែលអាចយកទៅហ្វឹកហាត់ ដើម្បីចេះច្រៀងដូចអ្នកចម្រៀងអាជីព។
១. ការហាត់ប្រាណកំដៅសាច់ដុំ៖ គឺជាការហាត់ប្រាណទូទៅដែលយើងតែងតែធ្វើវាមុនពេលលេងកីឡាអ្វីមួយ
២. ការសម្រួលរាងកាយតាមបច្ចេកទេសសំឡេង៖ គឺជាការសម្រួលខាងផ្នែកអវយវៈមួយចំនួនដែលចាំបាច់សម្រាប់ការច្រៀង (ឧហ៖ មុខ កញ្ចឹងក និងស្មា)
៣. ការស្រែកបើកសំឡេង៖ គឺជាការប្រើប្រាស់សំឡេងមួយចំនួន ដើម្បីស្រែកក្នុងការបើកបំពង់ក ក៏ដូចជាការស្រែកច្រៀងតាមណោតភ្លេង
៤. ការហាត់ដង្ហើម៖ គឺជាការហ្វឹកហាត់ ដើម្បីប្រមូលខ្យល់ឱ្យចូលទៅក្នុងខ្លួនឱ្យបានច្រើន ជាពិសេសធ្វើឱ្យដង្ហើមបានវែង
៥. ការច្រៀងបទចម្រៀងដែលអ្នកចេះ៖ គឺជាការច្រៀងបទចម្រៀងទូទៅ ដែលធ្វើឱ្យអ្នកមានអារម្មណ៍ថា អ្នកមានទំនុកចិត្តលើខ្លួនឯង ក៏ដូចជាបង្កើនសមត្ថភាពនៅក្នុងការច្រៀងរបស់អ្នកថែមទៀត។
ការលើកឡើងខាងលើនេះ ជាបទពិសោធន៍ផ្ទាល់់របស់សមាជិកក្រុមក្មេងខ្មែររូបនេះ ដែលលោកធ្លាប់បានចំណាយពេលធ្វើការសិក្សាស្រាវជ្រាវឯកសារ និងមេរៀនមួយចំនួនទាក់ទងអ្វីដែលអ្នកចម្រៀងត្រូវធ្វើ កាលពីអំឡុងឆ្នាំ ២០១៣។ សុជាតិ បានចំណាយពេលហាត់រៀនដោយយកចិត្តទុកដាក់រាល់ថ្ងៃ រយៈពេល១ ឆ្នាំពេញទើបសម្រេចចិត្តជាលទ្ធផល ប៉ុន្តែសម្រាប់អ្នកគ្រប់គ្នាអាចចំណាយលឿន ឬក៏យូរជាងនេះអាស្រ័យលើការចំណាយពេលផ្តោតលើវារៀងៗខ្លួន តែលោកសូមលើកទឹកចិត្តឱ្យធ្វើការហ្វឹកហាត់ជាប្រចាំ៕
សម្រាប់វីដេអូលម្អិតលោកអ្នកអាចចូលទៅទស្សនាក្នុងគណនី Tik Tok ផ្លូវការរបស់ ជា សុជាតិ ឈ្មោះថា @socheat_official