អ្នកផលិតមាតិកាកម្សាន្តបែបប្លែកៗពីដំណើរកម្សាន្ត និងការរស់នៅប្រចាំថ្ងៃ សួន ធីតា កំពុងជំរុញលើកទឹកចិត្តកូនស្រីបណ្តូលចិត្ត គឹម អាយវីន អាយុ ៦ ឆ្នាំ ឱ្យដើរលើវិថីសិល្បៈ តាមរយៈការងារជាតារាបង្ហាញម៉ូដ។ អ្នកម្តាយរូបនេះបានឱ្យដឹងថា ដំបូងខ្លួនគ្រាន់តែចង់ស្វែងរកអ្វីថ្មីសម្រាប់កូនស្រីតែប៉ុណ្ណោះ ដោយសាកល្បងឱ្យនាងចូលហាត់រៀនដើរម៉ូដជាមួយលោកគ្រូ អូលីវ៉ា គង់ តែគួរឱ្យភ្ញាក់ផ្អើលខ្លាំងណាស់ កូនស្រីរបស់អ្នកនាងមានដុងលើការដើរម៉ូដខ្លាំងមែនទែន ថែមទាំងឆាប់ចាប់គន្លឹះនៃការដើរម៉ូដថែមទៀតផង។
វ័យទើប ៦ ឆ្នាំក៏ពិតមែន កុមារី គឹម អាយវីន ចេះដើរម៉ូដ និងកាច់ស្ទីល៍ pose មិនចាញ់តារាម៉ូដែលរៀមច្បងប៉ុន្មានឡើយ។ ឃើញកូនស្រីមានដុងលើការដើរម៉ូដបែបនេះ Content Creator រូបនេះ មិនបង្អាក់ដំណើរកូនស្រីឡើយ ផ្ទុយទៅវិញមានតែខំប្រឹងជួយជ្រោមជ្រែង និងជំរុញលើកទឹកចិត្តកូនស្រីបន្ថែម ដើម្បីឱ្យនាងមានឱកាសក្លាយជាតារាបង្ហាញម៉ូដអាជីពម្នាក់ ទៅថ្ងៃអនាគត។
អ្នកម្តាយសម័យថ្មីរូបនេះ បានប្រាប់ឱ្យអ្នកសារព័ត៌មានសិល្បៈក្នុងស្រុកដឹងថា ពេលនៅផ្ទះ អាយវីន គ្រាន់តែជាក្មេងស្រីម្នាក់ ចេះយំចេះទារលេងរបស់របរដូចកូនក្មេងដទៃ ប៉ុន្តែពេលដើរលើឆាកនាងប្រៀបបីដូចជាមនុស្សផ្សេងម្នាក់ទៀត ដែលយល់ច្បាស់ពីក្រឡាដែលត្រូវដើរ ទឹកមុខដែលត្រូវបញ្ចេញឱ្យទស្សនិកជនឃើញ។ ក្នុងនាមជាអ្នកម្តាយ អ្នកនាងពិតជាសប្បាយចិត្ត ហើយរំភើបខ្លាំងពេលឃើញកូនស្រីពូកែបែបនេះ។
អ្នកនាងបានចំណាយពេលជូនកូនស្រីទៅហាត់រៀនដើរម៉ូដនៅសាលារបស់ អូលីវ៉ា គង់ ពុំដែលខាន ហើយអ្វីដែលធ្វើឱ្យអ្នកនាង និងស្វាមីមានមោទនភាពបំផុតនោះគឺ កូនស្រីមានឱកាសបានចេញទៅដើរម៉ូដក្នុងព្រឹត្តិការណ៍ជាតិធំៗ និងកម្មវិធីលំដាប់អន្តរជាតិនៅក្រៅប្រទេសផងដែរ ទាំងដែលសព្វថ្ងៃ អាយវីន អាយុទើបតែ ៦ ឆ្នាំសោះ តែកុមារីគួរឱ្យស្រលាញ់នេះ ពិតជាក្លាហានខ្លាំងណាស់ ហ៊ានដើរលើឆាកបង្ហាញម៉ូដជាមួយតារាម៉ូដែលរៀមច្បងជាច្រើនរូប។
ដោយសារខ្លួនជាអ្នកស្រលាញ់ការផលិតវីដេអូ និងតែងតែផលិតវីដេអូកម្សាន្តប្លែកៗបង្ហោះលើបណ្តាញសង្គមហ្វេសប៊ុកជារឿយៗ Content Creator សួន ធីតា ប្តេជ្ញារិះរកគំនិតសិល្បៈថ្មីៗមកធ្វើវីដេអូប្រម៉ូតកូនស្រី គឹម អាយវីន ឱ្យបានច្រើន ដើម្បីឱ្យឆាប់មានគេស្គាល់ច្រើនជាងនេះ។ មួយវិញទៀត អ្នកនាងក៏ចង់ឱ្យកូនស្រីមានឱកាសចូលរួមសម្តែងភាពយន្តឱ្យផលិតករក្នុងស្រុក ព្រោះអ្នកនាងមើលឃើញថា ក្រៅពីការដើរម៉ូដ អាយវីន ក៏មានទេពកោសល្យលើការសម្តែងផងដែរ។ មិនតែប៉ុណ្ណោះ កុមារីឆ្លាតវ័យរូបនេះ ក៏កំពុងហាត់រៀនរាំជាការបន្ថែមសមត្ថភាពសិល្បៈទៀតផង។
អ្នកផលិតមាតិកាលេចធ្លោ សួន ធីតា នឹងបន្តជំរុញកូនស្រីឱ្យចូលរួមកម្មវិធីដើរបង្ហាញម៉ូដនានាបន្តបន្ទាប់ ឱ្យនាងកាន់តែមានបទពិសោធន៍ក្នុងដើរបង្ហាញម៉ូដ ហើយរឹតតែពិសេសប្រសិនមានឱកាសចេញទៅដើរម៉ូដនៅលើឆាកអន្តរជាតិបន្តទៀត។ ក្រៅពីការជួយជំរុញលើទឹកចិត្តកូនស្រី អ្នកម្តាយរូបនេះក៏បណ្តុះគំនិតកូនឱ្យចេះស្រលាញ់សិល្បៈវប្បធម៌ដ៏ផូរផង់របស់ខ្មែរ ធ្វើយ៉ាងណានាំសិល្បៈខ្មែរទៅបង្ហាញលើឆាកអន្តរជាតិតាមកាលៈទេសៈដែលអាចធ្វើទៅបាន៕