Kim TaeHee ជាតារាសម្ដែងស្រីមានប្រជាប្រិយភាពម្នាក់ក្នុងប្រទេសកូរ៉េ មិនត្រឹមតែមានសមត្ថភាពសម្ដែងយ៉ាងប៉ិនប្រសប់ និងចំណេះដឹងខ្ពង់ខ្ពស់ នាងក៏ជាកូនស្រីមកពីត្រកូលស្ដុកស្ភម្ភផងដែរ។ មែនទែនទៅ ប្រឡូកក្នុងសិល្បៈជិត ២៣ ឆ្នាំតាំងពីកុមារមក តារាស្រីរូបនេះត្រូវបានគេចាត់ទុកថាជាតារាគំរូម្នាក់ ព្រោះនាងស្ទើរតែគ្មានរឿងអាស្រូវអាក្រក់តែម្ដង។ លើសពីនេះ ថែមទាំងឧស្សាហ៍ធ្វើអំពើសប្បុរសទៀតផង។
តែថ្មីៗ នេះ រូបនាងបានធ្វើឱ្យមហាជនជាច្រើនភ្ញាក់ផ្អើលខ្លាំងក្រោយលេចដំណឹងថានាងជាប់ពាក់ព័ន្ធជាមួយរឿងគេចពន្ធ ដោយឈ្មោះរបស់នាងស្ថិតក្នុងបញ្ជីរបស់នាយកដ្ឋានពន្ធគយក្នុងប្រទេសកូរ៉េដែលត្រូវស៊ើបអង្កេតជាបន្ទាន់ទាក់ទិននឹងការបង់ពន្ធលើអចលនទ្រព្យ និងប្រាក់ចំណូលរបស់នាង។ មិនតែប៉ុណ្ណោះ រូបនាងថែមទាំងត្រូវផាកពិន័យប្រាក់រាប់រយលានវ៉ុនទៀតផង។
ដំណឹងនេះ បានធ្វើឱ្យមហាជនជាច្រើនហាក់មានការភ្ញាក់ផ្អើលខ្លាំង ដោយសារតែ Kim TaeHee ជាតារាស្រីដែលស្ងប់ស្ងាត់ម្នាក់ និងកម្រមានរឿងអាស្រូវ។ រឿងនេះក៏បានក្លាយជាប្រធានបទយ៉ាងក្ដៅគគុកលើបណ្ដាញសង្គម ជាពិសេសសម្រាប់ក្រុមអ្នកគាំទ្រនៅប្រទេសកូរ៉េតែម្ដង។
ជាការឆ្លើយតប ក្រុមហ៊ុន Story J Company ដែលជាទ្រនំរបស់តារាស្រី Kim Tae Hee ក៏បានចេញសេចក្តីថ្លែងការណ៍បដិសេធថា៖ តារាស្រីរូបនេះមិនបានគេចពន្ធ ឬប្រព្រឹត្ដិអំពើខុសច្បាប់ណាមួយឡើយ។ វាគ្រាន់តែជាពាក្យចចាមអារ៉ាមប៉ុណ្ណោះ។
បន្ថែមពីលើនោះ ក្រុមហ៊ុនក៏បានបន្ដថា៖ Kim Tae Hee ជាតារាស្រីម្នាក់ដែលតែងតែគោរពច្បាប់ និងបង់ពន្ធជូនរដ្ឋមិនដែលខកខានឡើយជារៀងរាល់ឆ្នាំ ដូច្នេះសូមកុំចែកចាយព័ត៌មានផ្ដេសផ្ដាស់ដែលអាចធ្វើឱ្យប៉ះពាល់ដល់រូបនាង។
ក្រោយពីបានដឹងដំណឹងនេះ អ្នកគាំទ្រជាច្រើនហាក់មានអារម្មណ៍ធូរចិត្ត ព្រោះវាជារឿងល្អមួយដែលនាងមិនបានធ្វើរឿងខុសច្បាប់ បើមិនអ៊ីចឹងទេច្បាស់ជាត្រូវមហាជនស្ដីបន្ទោស និងត្រូវជាប់បញ្ជីខ្មៅអស់ការងារសិល្បៈធ្វើជាមិនខាន៕























Account
Security
Favourite Content