នៅថ្ងៃទី២៥ ខែមីនានេះ 7-Eleven របស់តៃវ៉ាន់ ដែលជាអ្នករៀបចំកម្មវិធីជំនួបរវាង Kim Soo-hyun និងអ្នកគាំទ្រ បានប្រកាសលុបចោលកម្មវិធីទាំងស្រុង ក្រោយបញ្ហារឿងអាស្រូវពីទំនាក់ទំនងស្នេហារបស់តារាប្រុស និង Kim Sae Ron នៅមិនទាន់បញ្ចប់នៅឡើយ។

យោងតាមសារព័ត៌មាន Allkpop ក្រុមហ៊ុនខាងលើនេះបានប្រកាសនៅលើបណ្ដាញទំនាក់ទំនងសង្គមរបស់ខ្លួនថា៖ “យើងសូមសម្ដែងការសោកស្ដាយក្នុងការជូនដំណឹងដល់សាធារណជនថា Kim Soo Hyun មិនអាចចូលរួមកម្មវិធីជួបជុំអ្នកគាំទ្រដែលគ្រោងនឹងធ្វើឡើងនៅថ្ងៃទី៣០ ខែមីនានេះទេ ដោយសារតែមានការប្រែប្រួលកាលវិភាគការងារ”។
ដើមឡើយ តារាប្រុសវ័យ ៣៧ឆ្នាំរូបនេះត្រូវមកជួបជុំអ្នកគាំទ្ររយៈពេលប្រមាណ ៤០នាទី នៅឯទីក្រុងតៃវ៉ាន់ ដែលជាផ្នែកមួយនៃពិធីបុណ្យ Kaohsiung Cherry Blossom Festival។ បន្ថែមពីកម្មវិធីខាងលើនេះ ក្រុមហ៊ុន 7-Eleven ក៏បានរៀបចំបើកបង្ហាញផលិតផលដែលមានរូបភាពរបស់ Kim Soo Hyun ជាអ្នកតំណាងផងដែរ។
បច្ចុប្បន្ននេះ ក្រុមហ៊ុនកំពុងតែបង្វិលប្រាក់ថ្លៃសំបុត្រសងត្រឡប់ទៅកាន់អ្នកគាំទ្រវិញ ដោយហេតុការណ៍លើកនេះ អ្នកជំនាញបានប៉ាន់ស្មានថា Kim Soo Hyun អាចនឹងខាតបង់ប្រាក់ប្រមាណ ១.៣ពាន់លានវ៉ុន ឬប្រមាណ ៨៨ ៧០០០ ដុល្លារអាមេរិក។

សូមរំឭកផងដែរថា ការប្រែប្រួលខាងលើនេះ បានកើតឡើងក្រោយមានការចោទប្រកាន់ថា តារាប្រុសរូបនេះធ្លាប់មានទំនាក់ទំនងស្នេហាជាមួយនឹងតារាស្រី Kim Sae Ron កាលដែលនាងនៅជាអនីតិជននៅឡើយ ដោយភាគីម្ខាងៗបានបកស្រាយដោយមានអំណះអំណាងផ្ទាល់ខ្លួន រហូតឈានដល់ការប្ដឹងផ្ដល់គ្នាតាមផ្លូវច្បាប់។
ក្រៅពីការខូចខាតខាងលើនេះ ចាប់តាំងពីផ្ទុះរឿងអាស្រូវនេះកាលពីដើមខែមីនានេះមក Kim Soo Hyun ក៏ត្រូវផ្អាកសកម្មភាពក្នុងវិស័យសិល្បៈជាបណ្ដោះអាសន្ន។ ឯយីហោល្បីៗទាំងក្រុង និងក្រៅស្រុកជាច្រើនម៉ាក តួយ៉ាង Prada ក៏បានបញ្ចប់កិច្ចសន្យាផ្សាយពាណិជ្ជកម្មជាមួយនឹងតារាប្រុសរូបនេះ មុនកាលកំណត់ផងដែរ៕
























Account
Security
Favourite Content