អ្នកប្រើប្រាស់បណ្តាញសង្គម ពិសេសអ្នកនិយមប្រើប្រាស់កម្មវិធី Tik Tok ពិតជាស្គាល់ច្បាស់ តារាសម្តែង និងជាអ្នកផលិតវីដេអូខ្លីវ័យក្មេង ឡូញ កេងហុង ហៅកឺកឺ ដែលភាគច្រើនលោកតែងផលិតវីដេអូខ្លីៗធ្វើឱ្យអ្នកទស្សនាផ្ទុះសំណើចក្អាកក្អាយ។

បន្ទាប់ពីសាងកេរ្តិ៍ឈ្មោះល្បីលើបណ្តាញសង្គម និងមានគេឯងស្គាល់ច្រើនតាមរយៈវីដេអូខ្លីប្លែកៗ លោកទទួលបានឱកាសធំមួយ ដោយលោកត្រូវផលិតកម្ម LD Entertainment ទុកចិត្តជ្រើសរើសជាតួអង្គសំខាន់ម្នាក់ក្នុងរឿងខ្នាតធំ «ក្រឡអីហ្នឹង» វគ្គ៣ ដោយលោកសម្តែងជាតួអង្គជំនាន់កូនជាមួយតារាល្បីៗជាច្រើននាក់ផ្សេងទៀតដូចជា ម៉េងឈុន អាង សុជាតា ហៅឈូឈូ ទីងតុង ជាដើម។
ប្រាប់ឱ្យដឹងក្នុងថ្ងៃក្នុងសម្ភោធរឿងខ្នាតធំ «ក្រឡអីហ្នឹង» វគ្គ៣ កេងហុង ថា នេះជាស្នាដៃរឿងខ្នាតធំទីមួយរបស់លោក ព្រោះកន្លងមកលោកធ្លាប់តែថតរឿង និងវីដេអូឃ្លីបខ្លីៗប៉ុណ្ណោះ។ វាពិតជាប្លែក និងមានផលលំបាកច្រើន តែលោកសប្បាយចិត្តខ្លាំងដែលបានភ្លក់រសជាតិថ្មីប្លែក ក្នុងរឿងខ្នាតធំបែបនេះ។ បើប្រៀបធៀបរវាងអ្វីដែលលោកធ្វើ និងការថតរឿងខា្នតធំ គឺខុសគ្នាខ្លាំងមែនទែន ព្រោះភាពយន្តត្រូវសម្រិតសម្រាំងខ្លាំង មិនមែនដូចដែលលោកធ្វើទេ។
និយាយដល់ការងារសិល្បៈ សព្វថ្ងៃ កេងហុង រវល់ខ្លាំងមែនទែនស្ទើររកពេលសម្រាកគ្មាន ចំណែកប្រាក់កម្រៃទទួលបានក៏ច្រើនជាងមុនដូចគ្នាដែរ។ តួយ៉ាង ខណៈស្នាដៃរឿងខ្នាតធំដំបូងកំពុងចាក់បញ្ចាំងតាមរោងកុន លោកក៏មានគម្រោងទទួលថតរឿងខ្នាតធំថ្មីមួយទៀតដែរ តែពេលនេះនៅមិនទាន់ច្បាស់ការនៅឡើយ។ ក្រៅពីនេះ គឺលោករវល់ខ្លាំងលើការផលិតភាពយន្តខ្លួនឯង ព្រោះត្រូវចំណាយពេលកាត់ និងសរសេរឆ្អឹងរឿង។
ទោះបីជាការងារសិល្បៈហូរចូលមកច្រើនពេញៗដៃក៏ពិតមែន តែក្នុងនាមអ្នកផលិតវីដេអូខ្លីៗ កេងហុង នៅមានគោលដៅធំ ២ ទៀតដែលចង់បានបំផុតនៅពេលនេះ នោះគឺ រកអ្នកឧបត្ថម្ភ (Sponsor) និងព្យាយាមស្វែករកអ្នកឧបត្ថម្ភពីផេកបន្ថែមទៀត។ ឆ្លៀតឱកាសនេះ ឡូញ កេងហុង ហៅកឺកឺ សូមថ្លែងអំណរគុណដល់ពុកម៉ែបងប្អូនដែលតែគាំទ្រវីដេអូសម្តែងរបស់លោក ហើយលោកសង្ឃឹមថា គ្រប់គ្នានឹងពេញចិត្តស្នាដៃសម្តែងរបស់លោកក្នុងរឿង «ក្រឡអីហ្នឹង» វគ្គ៣ ហើយទៅទស្សនារឿងនេះឱ្យបានគ្រប់ៗគ្នា៕
























Account
Security
Favourite Content