ជារឿងដ៏ភ្ញាក់ផ្អើលសម្រាប់អ្នកស្នេហាវិស័យបវរកញ្ញា ក្រោយពី ខាត់ ស្រីច័ន្ទ ហៅ Kate Cat ត្រូវប្រកាសជាអ្នកគ្រប់គ្រងថ្មី នៃស្ថាប័ន Miss Planet Cambodia 2024 ជាមួយស្រ្តីឆ្នើមក្នុងវិស័យគ្រឿងអលង្ការ អ្នកនាង លឹម សុធាលីកា ជា CEO ហាងរចនាគ្រឿងអលង្ការ ជាងហេងវណ្ណអាន។
ជាការស្វាគមន៍ដំណើរឆ្ពោះទៅការរៀបចំកម្មវិធីថ្នាក់ជាតតិនាពេលឆាប់ៗខាងមុខ Kate Cat បានរៀបចំពិធីសន្និសីទកាសែតបើកប្រកាសជាផ្លូវការពីការបើកទទួលពាក្យចូលរួមប្រកួតប្រជែង Miss Planet Cambodia 2024 កាលពីរសៀលថ្ងៃទី១០ ខែឧសភា កន្លងទៅ និងបានបើកឱ្យបណ្តា fan page ល្បីៗជាច្រើនសួរនាំអំពីការរៀបចំការប្រកួតថែមទៀតផង។ ក្នុងនោះ National Director ថ្មីទាំង២រូប ក៏បានបញ្ជាក់មូលហេតុច្បាស់ៗនៃការសម្រេចចិត្តទិញសិទ្ធិកម្មវិធី Miss Planet Cambodia 2024 ដើម្បីរៀបចំការប្រកួតនាពេលឆាប់ៗខាងមុខនេះ។
Kate Cat បានលើកឡើងថា មែនទែនទៅនាងបានសម្លឹងឃើញ និងមានបំណងទិញសិទ្ធិកម្មវិធីនេះតាំងពីឆ្នាំមុនមកម៉្លេះ តែដោយសារភាពយឺតយ៉ាវមួយចំនួនទើបខកខានមិនបានទិញកាលពីឆ្នាំមុន។ ឆ្នាំនេះ ហាក់អំណោយផលល្អសម្រាប់ការទិញសិទ្ធិកម្មវិធីនេះ ស្របពេលដែលនាងក៏មានក្រុមការងារល្អល្អះស័ក្តិសមសម្រាប់រៀបចំការប្រកួតថ្នាក់ជាតិ ដើម្បីចម្រាញ់យកបេក្ខនារីដ៏ស័ក្ដិសមសម្រាប់តំណាងប្រទេសកម្ពុជាចូលរួមការប្រកួតអន្តរជាតិ។
កត្តាជំរុញខ្លាំងឱ្យនាងទិញសិទ្ធិកម្មវិធីនេះ គឺដោយសារកម្មវិធី Miss Planet Cambodia បង្កើតឡើងដោយកូនខ្មែរ ការប្រកួតអន្តរជាតិក៏ធ្វើឡើងនៅខ្មែរ។ ដែលសំខាន់ជាងនេះ គឺនាងចង់ធ្វើកម្មវិធីមួយដែលគ្រប់គ្នាមើលរំលងឱ្យក្លាយជាកម្មវិធីដ៏មានសក្តានុពល និងអាចដាក់បញ្ចូលវប្បធម៌ អរិយធម៌ ដ៏សម្បូរបែបរបស់ខ្មែរទៅបង្ហាញអន្តរជាតិបានឃើញ។
ទោះបីកន្លងមកមានមតិអវិជ្ជមានលើកឡើងអំពីការដាក់បញ្ជ្រាបវប្បធម៌អរិយធម៌ខ្មែរក៏ពិតមែន តែ Kate Cat មានគោលជំហរច្បាស់លាស់ក្នុងការផ្លាស់ប្តូរផ្នត់គំនិតអវិជ្ជមានទាំងអស់នេះ ឱ្យគ្រប់គ្នាងាកមកធ្វើរឿងវិជ្ជមាន ហើយពួតគ្នាផ្សព្វផ្សាយពីភាពសម្បូរបែបរបស់កម្ពុជាបង្ហាញទៅឱ្យពិភពលោកបានឃើញ។
National Director ថ្មីនៃកម្មវិធី Miss Planet Cambodia 2024 សម្រេចចិត្តជ្រើសរើសខេត្តគោលដៅ ៣ សម្រាប់រៀបចំការប្រកួត រួមមានសៀមរាប ព្រះសីហនុ និងកំពង់ឆ្នាំង ដើម្បីឱ្យបេក្ខភាពទាំងអស់បានសិក្សាស្វែងយល់អំពីជីវចម្រុះ តំបន់ទេសចរណ៍ ធនធានធម្មជាតិ ម្ហូបអាហារ ការរស់នៅរបស់ប្រជាពលរដ្ឋ រួមទាំងបរិស្ថានផ្សេងៗផងដែរ។ មិនតែប៉ុណ្ណោះ Kate Cat ក៏មានគម្រោងផ្តល់ការ training បន្ថែមដល់បេក្ខភាពទាំងអស់ឱ្យគ្រប់គ្នាស្គាល់ច្បាស់ពី platform កម្មវិធី Miss Planet Cambodia 2024 និងអ្វីដែលកម្មវិធីចង់បាន។
សម្រាប់សុភាពនារីដែលមានចំណាប់អារម្មណ៍ចង់ដាក់ពាក្យប្រកួតកម្មវិធី Miss Planet Cambodia 2024 ពុំចាប់បាច់មានអ្វីច្រើនឡើយ សំខាន់បំផុត គឺការតាំងចិត្ត ទំនួលខុសត្រូវ និងការប្តេជ្ញាចិត្តខ្ពស់ក្នុងការប្រកួតប្រជែង រីឯស្តង់ដារសម្រស់ផ្សេងៗលោកអ្នកអាចចូលទៅមើលលើទំព័រហ្វេសប៊ុកផ្លូវការ Miss Planet Cambodia។ ND Miss Planet Cambodia ពុំទាន់អាចបញ្ជាក់ពីអត្ថប្រយោជន៍ដែលម្ចាស់ជយលាភីនឹងទទួលបានក្រោយចប់ការប្រកួត ព្រោះពេលនេះកំពុងស្ថិតក្នុងការពិចារណានៅឡើយ តែនាងហ៊ាននិយាយថា នាងនឹងធ្វើឱ្យទស្សនិកជនធុញទ្រាំមុខរបស់ជយលាភី Miss Planet Cambodia 2024 តែម្តង ដោយសារ activity ច្រើនខ្លាំងណាស់។
សម្រាប់ព័ត៌មានបន្ថែមពីការប្រកួត និងការទិញពាក្យលោកអ្នកអាចចូលទៅតាមដានលើទំព័រហ្វេសប៊ុកផ្លូវការ Miss Planet Cambodia ដែលមាន slogan ថា «PLANET CULTURE»៕