ផ្អែកតាមការរាយការណ៍របស់ MyDaily នៅថ្ងៃទី ៣០ ខែមិថុនា Jimin និង Jungkook បានបញ្ចប់ការថតកម្មវិធី Are you sure?! រដូវកាលទី ២ រួចរាល់ហើយ ក៏ប៉ុន្តែថ្ងៃចាក់ផ្សាយផ្លូវការ នៅមិនទាន់បានឱ្យដឹងនៅឡើយទេ។

ជាក់ស្ដែង រដូវកាលថ្មីនេះ តារាប្រុសសមាជិក BTS ទាំង ២រូប បានទៅថតនៅក្នុងប្រទេស ស្វីស និងវៀតណាម ដោយចំណាយពេលត្រឹមតែ ១៩ថ្ងៃប៉ុណ្ណោះ បន្ទាប់ពីបញ្ចប់កាតព្វកិច្ចក្នុងជួរយោធា ពោលគឺកាលពីថ្ងៃទី១១ ខែមិថុនា កន្លងទៅ។
នៅក្នុងរដូវកាលមុន ដែលបានចាក់ផ្សាយកាលពីខែសីហា ឆ្នាំ២០២៤ Jimin និង Jungkook បានធ្វើដំណើរកម្សាន្តឥតព្រៀងទុក បង្កើតអនុស្សាវរីយ៍ជុំគ្នាមុនពេលចូលបម្រើទាហាន ដោយចាប់ផ្ដើមចេញដំណើរពីសហរដ្ឋអាមេរិក មកដល់កោះ Jeju ក្នុងទឹកដីកំណើត និង Sapporo ប្រទេសជប៉ុន។

នៅក្នុងរដូវកាលដំបូង មិត្តរួមក្រុមទាំងពីរ ២ ក៏បានបបួលមិត្តរួមក្រុមម្នាក់ទៀតដែរ គឺ V ឱ្យមករួមដំណើរទៅកោះ Jeju។ ហេតុនេះហើយ ARMY ក៏កំពុងតែរង់ចាំមើលដូចគ្នាថា សមាជិក BTS រូបណា នឹងក្លាយជាភ្ញៀវពិសេស នៅក្នុងរដូវកាលថ្មីនៃកម្មវិធី Jimin និង Jungkook។
សូមរំឭកផងដែរថា Jimin និង Jungkook បានចូលបំពេញកាតព្វកិច្ចបម្រើជាតិ កាលពីខែធ្នូ ឆ្នាំ២០២៣ និងបានបញ្ចប់ជាស្ថាពរនៅថ្ងៃទី១១ ខែមិថុនា នេះ។ ទាំងគូរបានជ្រើសរើសកម្មវិធី Are you sure?! រដូវកាលទី ២ ជាសកម្មភាពការងារដំបូង ក្រោយត្រឡប់ចូលមកប្រឡូកការងារសិល្បៈពេញទីវិញ៕
























Account
Security
Favourite Content