បន្ទាប់ពីបានរៀបមង្គលការបែបប្រពៃណីនិងលក្ខណៈគ្រួសាររួចរាល់កាលពីថ្ងៃទី១៩ ខែធ្នូកន្លងទៅ ថ្មីៗនេះតារាសម្ដែងថៃ James Jirayu និងកូនក្រមុំក្រៅសិល្បៈ Foam Benjamas ក៏បានរៀបចំពិធីជប់លៀងអាពាហ៍ពិពាហ៍ធំមួយទៀតដោយមានការចូលរួមពីមិត្តរួមអាជីពជាច្រើន។
ពិធីជប់លៀងនេះដែរត្រូវបានរៀបចំឡើងយ៉ាងអធិកអធមកាលពីថ្ងៃសៅរ៍ចុងសប្ដាហ៍កន្លងទៅ ក្រោមវត្តមានក្រុមគ្រួសារ មិត្តភ័ក្ដិ និងមិត្តរួមអាជីពជាច្រើននៅឯស្រុកសួនភឹង ខេត្តរ៉ាតបុរី ជាទីកន្លែងតែមួយដែល James Jirayu បានសុំមិត្តស្រីរបស់ខ្លួនរៀបការ។ បរិយាកាសនៃពិធីជប់លៀងមង្គលការលើកនេះពិតជាមានភាពរ៉ូមែនទិកជាខ្លាំង អមដោយទេសភាពភ្នំ វាលស្មៅ និងហ្វូងចៀម ខណៈតារាល្បីៗដែលបានចូលរួមក្នុងកម្មវិធីនេះមានដូចជា Mario Maurer, Great Warintorn, Boy Pakorn, Toey Jarinporn, Ann Thongprasom, Alex Teeradet និង Bow Maylada ជាដើម។
នៅថ្ងៃទី១៤ ខែមករានេះ James Jirayu ក៏បានបង្ហោះវីដេអូអំពីកម្មវិធីមង្គលនេះនៅលើឆានែលយូធូបរបស់ខ្លួនឈ្មោះ Jirayu Tangsrisuk ដែលបង្ហាញឱ្យឃើញនូវទិដ្ឋភាពដ៏រីករាយ ពោរពេញដោយស្នាមញញឹម និងទឹកភ្នែកនៃក្ដីរំភើបទាំងកូនកំលោះកូនក្រមុំ និងភ្ញៀវកិត្តិយស។ ក្នុងនោះ តារាប្រុសវ័យ ៣១ ឆ្នាំរូបនេះក៏បាននិយាយរឿងក្នុងចិត្តថា រឿងដែលធ្វើឱ្យរូបលោកខូចចិត្តបំផុតនៅក្នុងទំនាក់ទំនងជាមួយ Foam គឺដោយសារអាជីពរបស់លោក បានធ្វើឱ្យ Foam ត្រូវរងភាពឈឺចាប់ជាច្រើន ទាំងការដែលត្រូវលាក់បាំង និងសម្ពាធរិះគន់ពីក្រុមអ្នកគាំទ្រ។ Foam ធ្លាប់មានបំណងចង់រៀបការដោយមានវត្តមានរបស់ម្ដាយចូលរួម ប៉ុន្តែទម្រាំនាងបានរៀបការ ម្ដាយរបស់នាងបានចែកឋានបាត់ទៅហើយ។ មិនដឹងថាថ្ងៃអនាគតនឹងទៅជាយ៉ាងណា តែលោកសង្ឃឹមថាភាពឈឺចាប់ទាំងនោះនឹងអាចរលាយបាត់តាមពេលវេលា។
ដោយឡែកកូនក្រមុំ Foam Benjamas ក៏បាននិយាយពី James ថានាងពិតជាមានសំណាងដែលបាន James Ji ជាគូជីវិត មិនមែន James ដែលជាតារាល្បី ប៉ុន្តែគឺ James ដែលជាបុរសធម្មតាម្នាក់ដែលអាចមើលថែនារីម្នាក់ដូចជានាងបានល្អបំផុត។ នាងមិនធ្លាប់រំពឹងថានឹងមានពិធីមង្គលការកើតឡើងនោះទេ ប៉ុន្តែទីបំផុតថ្ងៃនេះវាក៏កើតឡើងដោយមានមនុស្សជាទីស្រលាញ់គ្រប់គ្នាចូលរួមអបអរសាទរ។
បើរំឭកទៅក្រោយវិញ ចំណងស្នេហារយៈពេល ១០ឆ្នាំកន្លងមករបស់អ្នកទាំងពីរត្រូវឆ្លងកាត់ឧបសគ្គផ្សេងៗជាច្រើន ដោយ Foam ធ្លាប់ទទួលបានមតិវាយប្រហារច្រើន និងត្រូវគេគាស់កកាយរឿងរ៉ាវផ្សេងៗរបស់ខ្លួន រហូតដល់នាងត្រូវបិទគណនីបណ្ដាញសង្គមទាំងអ៊ិនស្តាក្រាមនិងហ្វេសប៊ុក ៕