តារាសម្ដែងស្រីល្បីប្រចាំហូលីវូដ លោកស្រី Angelina Jolie បានចេញមុខជួយផ្ដល់ទីស្នាក់នៅដល់ មិត្តភ័ក្ដិដែលត្រូវជម្លៀសខ្លួនចេញពីហេតុភ្លើងឆេះធំក្នុងទីក្រុង Los Angeles រដ្ឋកាលីហ្វ័រញ៉ា សហរដ្ឋអាមេរិក។
តាមរយៈការនាំពាក្យពីមនុស្សជំនិតរបស់តារាស្រីវ័យ៤៩ឆ្នាំរូបនេះ សារព័ត៌មាន People បានរាយការណ៍ថា លោកស្រីមានការសោកស្ដាយជាខ្លាំងចំពោះរឿងហេតុដែលបានកើតឡើងនេះ និងព្យាយាមសម្រាលបន្ទុករបស់មិត្តៗរបស់លោកស្រី តាមអ្វីដែលខ្លួនអាចធ្វើបាន។
ដោយប្រើឈ្មោះហៅក្រៅ បុគ្គលរូបនេះបាននិយាយថា៖ “ Angie ពិបាកចិត្តមែនទែនសម្រាប់អ្នកដែលត្រូវបាត់បង់ផ្ទះ និងអ្នកដែលរងគ្រោះទាំងអស់ពីភ្លើងឆេះលើកនេះ។ គាត់ធ្វើគ្រប់យ៉ាងតាមដែលអាចធ្វើទៅបាន សូម្បីតែបើកផ្ទះទទួលមិត្តដែលបង្ខំចិត្តជម្លៀសចេញមកក៏ដោយ”។
ដោយឡែក ក្រៅពីអ្នកម្ដាយកូន ៦រូបនេះ នៅមានតារាជាច្រើនរូបទៀតដែលចេញមកផ្ដល់ជំនួយដល់ជនរងគ្រោះនានា។ តួយ៉ាង ព្រះអង្គម្ចាស់ Harry និងលោកស្រី Meghan Markle ក៏បានចូលរួមផ្ដល់ទីអាស្រ័យដល់មិត្តៗ និងមនុស្សជាទីស្រឡាញ់ដែរ។ ទន្ទឹមគ្នានឹង តារាស្រីជើងចាស់ Jamie Lee Curtis ជាមួយស្វាមីលោក Christopher Guest បានបរិច្ចាគទឹកប្រាក់ចំនួន ១លានដុល្លារអាមេរិក។ ឯ តារាស្រី Halle Berry និង Sharon Stone វិញក៏បានបរិច្ចាគជាសម្លៀកបំពាក់ផងដែរ។
គួរឱ្យដឹងដែរថា ភ្លើងឆេះព្រៃខាងលើនេះ មានដើមហេតុដំបូងកើតចេញពីតំបន់ Pacific Palisades កាលពីថ្ងៃទី៧ ខែមករា មុននឹងរាលដាលទៅផ្នែកផ្សេងៗទៀតនៃទីក្រុងមួយនេះ ក្លាយជាគ្រោះមហន្តរាយដ៏ធំបំផុតនៅក្នុងប្រវត្តិសាស្រ្តទីក្រុង Los Angeles និងបានឆក់យកជីវិតរបស់ប្រជាជនប្រមាណ១១នាក់។ នេះបានតាមរយៈការរាយការណ៍របស់ County of Los Angeles Department of Medical Examiner កាលពីថ្ងៃទី១០ កន្លងទៅ។
បន្ថែមពីនោះ គ្រោះមហន្តរាយលើនេះក៏បានលេបត្របាក់សំណង់អាគារជាង ១ម៉ឺនខ្នង ជាហេតុដែលធ្វើឱ្យប្រជាជនជាង ៨ម៉ឺននាក់ត្រូវបាត់បង់ទីជម្រក រួមគ្នានឹងបុគ្គលល្បីៗដូចជា Anna Faris, Ricki Lake, Cary Elwes, Cameron Mathison, Leighton Meester និង Adam Brody ជាដើម៕