ផ្អែកតាមសារព័ត៌មាន New1 រដ្ឋាភិបាលកូរ៉េខាងត្បូងបានប្រគល់មេដាយមាសសម្រាប់ការចូលរួមរបស់លោក Lee Soon Jae នៅក្នុងវិស័យវប្បធម៌ ក្រោយពីតារាប្រុសវ័យ ៩១ឆ្នាំរូបទទួលមរណភាពកាលពីថ្ងៃទី២៥ ខែវិច្ឆិកានេះ។
ការប្រគល់ពានរង្វាន់លំដាប់លេខ ១ នេះ បានធ្វើឡើង ដោយរដ្ឋាភិបាលកូរ៉េខាងត្បូងបានទទួលស្គាល់នូវការរួមចំណែករបស់លោក Lee Soon Jae នៅក្នុងវិស័យវប្បធម៌ និងសម្រាប់ការបង្កើតស្នាដៃជាច្រើននាំយកភាពរីករាយដល់ទស្សនិកជន អស់ពេលជាងកន្លះសតវត្សរ៍មកនេះ។

ខណៈមេដាយមាសដែលមានឈ្មោះពេញថា Gold Crown Order of Cultural Merit គឺជាមេដាយកិត្តិយសលំដាប់ខ្ពស់បំផុត ដែលផ្ដល់ជូនសម្រាប់តែបុគ្គលណា ដែលបានរួមចំណែកក្នុងការអភិវឌ្ឍវិស័យវប្បធម៌ និងសិល្បៈជាពិសេសតែប៉ុណ្ណោះ។
លោក Choi Hwi Young តំណាងពីក្រសួងវប្បធម៌ កីឡា និងទេសចរណ៍ ជាអ្នកនាំយកមេដាយមាសនេះប្រគល់ជូនគ្រួសារសព ដោយលោកបាននិយាយផងដែរថា ស្នាដៃដែលលោក Lee Soon Jae បន្សល់ទុក ទាំងស្នាដៃសម្ដែង និងផ្លូវដែលគាត់បានដើរ នឹងក្លាយជាទីចងចាំរបស់ប្រជាជាតិអស់ពេលជាច្រើនឆ្នាំទៅមុខទៀត។
ទន្ទឹមគ្នានេះ តារាជាច្រើនរូបក៏បានបង្ហាញវត្តមានចូលរួមពិធីបុណ្យសពរបស់តារាប្រុសរូបនេះដែរ ដោយក្នុងនោះរួមមាន Song Seung Heon, Kim Young Ok, Choi Soo Jong, Ha Hiera, Jang Na Ra និង Choi Hyun Wook ជាដើម។

រំឭកដល់គ្រាដែលបានមកសួរសុខទុកលោក Lee Soon Jae នៅឯមន្ទីរពេទ្យ តារាប្រុស Lee Seung Gi បាននិយាយថា៖ “បើទោះបីជាគាត់មិនស្រួលខ្លួនក៏ដោយ តែគាត់នៅតែជូនដំណើរពួកយើងមកដល់ជណ្ដើរយន្ត។ ពេលវេលានោះនៅតែស្ថិតក្នុងការចងចាំរបស់ខ្ញុំនៅឡើយ។ ខ្ញុំសង្ឈឹមថាឥឡូវនេះគាត់បានស្ងប់សុខ និងបាននៅកន្លែងប្រសើរជាងមុន”។
គួរដឹងផងដែរថា លោក Lee Soon Jae បានចូលប្រឡូកក្នុងវិស័យសម្ដែងជាលើកដំបូងនៅក្នុងឆ្នាំ ១៩៥៦ តាមរយៈរឿង Beyond the Horizon។ លោកបានប្រើប្រាស់ពេលជាងកន្លះសតវត្សរ៍កសាងកេរ្តិ៍ឈ្មោះតាមរយៈស្នាដៃសម្ដែងចំនួន ១៤០ស្នាដៃ រហូតក្លាយជាតារាសម្ដែងដែលមានវ័យចំណាស់បំផុតនៅក្នុងវិស័យនេះ៕

























Account
Security
Favourite Content