Gigi Lai ជាតារាស្រី TVB លេចធ្លោម្នាក់កំឡុងឆ្នាំ ២០០០ ក្រោយមកនាងក៏បានប្រកាសលាឈប់ពីសិល្បៈដែលធ្វើឲ្យមហាជន និងអ្នកគាំទ្រជាច្រើនហាក់មានការសោកស្ដាយ។ ការសម្រេចចិត្ដនេះគឺក្រោយពេលដែលរូបនាងរៀបការសាងគ្រួសារជាមួយស្វាមីលោក Patrick Ma ក្នុងឆ្នាំ ២០០៨។



តារាស្រី Gigi Lai ធ្លាប់បានបញ្ជាក់ពីមូលហេតុពិតពីក្រោយ ការលាឈប់ពីអាជីពសិល្បៈគឺដោយសាររូបនាងត្រូវផ្ដោតលើមុខជំនួញក្នុងដៃ និងមើលថែទាំគ្រួសារ។ មួយវិញទៀត ប្អូនប្រុសរបស់នាងបានជួបគ្រោះថ្នាក់ចរាចរណ៍យ៉ាងធ្ងន់ធ្ងរដែលធ្វើឲ្យនាងត្រូវងាកមកផ្ដោតលើការងារជំនួញតែម្ដង។
មែនទែន បើទោះជាបាត់មុខពីសិល្បៈជាច្រើនឆ្នាំក៏ដោយ រូបនាងនៅតែជាតារាស្រីហុងកុងជើងចាស់ម្នាក់ដែលមហាជន មិនអាចបំភ្លេចបាន និងតែងនៅរំឮកជារឿយៗ។ មកទល់ពេលនេះ តារាស្រី Gigi Lai មានវ័យ ៥២ ឆ្នាំហើយ ទោះជាមមាញឹកខ្លាំងក្នុងរឿងជំនួញ និងគ្រួសារ តែអ្វីដែលមហាជនចាប់អារម្មណ៍គឺ រូបនាងពូកែថែខ្លួនយ៉ាងខ្លាំង។ កាលពីអំឡុងឆ្នាំ ២០០០ Gigi ទទួលបានការគាំទ្រខ្លាំង ដោយសារការរឿង «The Heaven Sword and Dragon Saber» ដែលប្រជាជនខ្មែរស្គាល់យ៉ាងច្បាស់ថាជាតួឯកស្រីរបស់ ចាង អ៊ូជី ឈ្មោះ ចាវ មៀន។



ថ្មីៗនេះ តារាស្រី Gigi Lai និងស្វាមី បានបង្ហាញខ្លួនក្នុងកម្មវិធីខួបកំណើតរបស់មិត្ដជិតស្និទ្ធ ខណៈរូបភាពរបស់នាងត្រូវបានបង្ហោះលើបណ្ដាញសង្គម និងក្លាយជាប្រធានបទគេលើកមកពិភាក្សា។ សម្រស់របស់តារាស្រី Gigi Lai ធ្វើឲ្យមនុស្សជាច្រើនស្ទើរតែទាយមិនដឹងពីអាយុរបស់នាងឡើយ។ រហូតដល់អ្នកខ្លះលាន់មាត់ថា សម្រស់របស់នាងដូចនារីទើបមានវ័យជាង ៣០ ឆ្នាំប៉ុណ្ណោះ។ នាងពូកែទាំងការគ្រប់គ្រងការងារក្នុងដៃ មើលថែទាំគ្រួសារ និងថែខ្លួនបានយ៉ាងល្អ។ ទោះតារាស្រី Gigi Lai មិនបានបញ្ជាក់ប្រាប់ច្បាស់ពីវិធីថែសម្រស់របស់នាង តែការហាត់ប្រាណគឺត្រូវបានគេចាត់ទុកជាផ្នែកមួយ ដោយសាររូបនាងជាមនុស្សចូលចិត្ដហាត់ប្រាណ។


គួរបញ្ជាក់ថា តារាស្រី Gigi Lai បានចេញប្រឡូកក្នុងពិភពសិល្បៈនៅអាយុ ១៤ ឆ្នាំ។ ក្នុងឆ្នាំ ១៩៩០ នាងបានក្លាយខ្លួនជាតារាចម្រៀងម្នាក់ ក្រោយមកនាងបានជ្រៀតចូលធ្វើជាតារាសម្ដែង។ នាងបានបង្ហាញខ្លួនក្នុងរឿងល្បីៗដូចជា “Young And Dangerous” និង “The Legend Of Heaven and Sword Of The Dragon”។ បច្ចុប្បន្ន តារាស្រីវ័យ ៥២ ឆ្នាំរូបនេះ ត្រូវបានគេរាយការណ៍ មានទ្រព្យសម្បត្ដិច្រើនជាង ៤១ លានដុល្លារអាមេរិក៕























Account
Security
Favourite Content