បន្ទាប់ពីចាកចេញពីផលិតកម្ម YG Entertainment ពេលនេះតារាចម្រៀងខេប៉ុប G-Dragon កំពុងរកឃើញទ្រនំថ្មីហើយ ដោយសេចក្ដីរាយការណ៍ពីសារព័ត៌មានកូរ៉េនៅថ្ងៃទី ៥ ខែធ្នូ បង្ហាញថា តារាវ័យ ៣៥ឆ្នាំរូបនេះកំពុងចុះកិច្ចសន្យាផ្តាច់មុខជាមួយក្រុមហ៊ុន Galaxy Corporation ដែលជាក្រុមហ៊ុនឯកទេសក្នុងការគ្រប់គ្រងកម្មសិទ្ធិបញ្ញា និងការផលិតមាតិកានៅកូរ៉េ។

ប្រភពផ្ទៃក្នុងម្នាក់បង្ហើបថា “G-Dragon បានឈានដល់កិច្ចព្រមព្រៀងលើកិច្ចសន្យាផ្តាច់មុខរបស់គាត់ជាមួយ Galaxy ហើយ” និងថាការប្រកាសជាផ្លូវការនឹងមកដល់នាពេលខាងមុខ។
បង្កើតឡើងនៅថ្ងៃទី ៩ ខែសីហា ឆ្នាំ ២០១៩ ក្រុមហ៊ុន Galaxy ផ្តោតជាចម្បងលើការអភិវឌ្ឍន៍ IP និងការគ្រប់គ្រងកម្មសិទ្ធិបញ្ញា ប៉ុន្តែក្រោយមកក៏បានពង្រីកខ្លួនឈានទៅដល់ការផលិតកម្មវិធីកម្សាន្ត ការគ្រប់គ្រងសិល្បករ និងពាណិជ្ជកម្មតាមរយៈក្រុមហ៊ុនបុត្រសម្ព័ន្ធរបស់ខ្លួន។
អ្នកជំនាញរំពឹងថាក្រុមហ៊ុន Galaxy នឹងពង្រឹងវត្តមានរបស់ខ្លួនយ៉ាងខ្លាំងតាមរយៈការចាប់ដៃគូជាមួយតារាល្បីដូចជា G-Dragon ព្រោះប្រជាប្រិយភាពរបស់គេអាចពង្រឹងសមត្ថភាពរបស់ក្រុមហ៊ុន ដែលអាចពាក់ព័ន្ធនឹងការចុះហត្ថលេខាជាមួយតារាល្បីៗផ្សេងទៀត និងការបណ្ដុះបណ្ដាលក្រុមចម្រៀងថ្មីៗផងដែរ។
ពាក់ព័ន្ធដំណឹងចុះកុងត្រានេះ តំណាងក្រុមហ៊ុន Galaxy បានឆ្លើយតបបែប50/50ថា៖ “យើងមិនទាន់អាចផ្ដល់ចម្លើយអ្វីជាផ្លូវការបានទេនៅពេលនេះ ប៉ុន្តែយើងនឹងជូនដំណឹងនៅពេលដល់ពេលធ្វើការប្រកាសជាផ្លូវការ”។
គួររំឭកថា កិច្ចសន្យាផ្តាច់មុខរបស់ G-Dragon ជាមួយផលិតកម្ម YG Entertainment បានផុតកំណត់នៅក្នុងខែមិថុនា ហើយកាលពីខែមុន នៅថ្ងៃទី ២៩ ខែវិច្ឆិកា G-Dragon បានផ្តាច់ទំនាក់ទំនងជាផ្លូវការជាមួយ YG ដោយបានលុបតំណភ្ជាប់ទៅកាន់គេហទំព័រផ្លូវការរបស់ YG ចេញពីប្រវត្តិរូបឆានែល YouTube របស់ខ្លួន ៕
























Account
Security
Favourite Content