តារាខេប៉ុបជើងចាស់ G-Dragon បានក្លាយជាសិល្បករកូរ៉េដំបូងគេដែលចេញបទចម្រៀងនិង MV នៅទីអវកាស បន្ទាប់ពីក្រុមចម្រៀងអង់គ្លេស The Beatles។


កាលពីថ្ងៃទី ៩ ខែមេសា ក្រុមហ៊ុន Galaxy Corporation ដែលជាទីភ្នាក់ងាររបស់តារារូបនេះ បានប្រកាសថា G-Dragon គ្រោងនឹងបង្កើតប្រវត្តិសាស្ត្រដំបូងសម្រាប់សិល្បករកូរ៉េ តាមរយៈការបញ្ជូនតន្ត្រីនិងវីដេអូចម្រៀងថ្មីរបស់ខ្លួនទៅកាន់ទីអវកាស។ តាមនោះដែរ តារាប្រុសវ័យ ៣៦ឆ្នាំរូបនេះបានសហការជាមួយវិទ្យាស្ថានវិទ្យាសាស្ត្រ និងបច្ចេកវិទ្យាកម្រិតខ្ពស់របស់ប្រទេសកូរ៉េហៅកាត់ KAIST ដើម្បីចាប់ផ្តើមគម្រោងនេះដោយប្រើសេវាកម្មបញ្ញាសិប្បនិម្មិតកម្រិតខ្ពស់ Sora របស់ក្រុមហ៊ុន Azure OpenAI ដែលជាបុត្រសម្ព័ន្ធរបស់ ក្រុមហ៊ុន Microsoft ។
មានតួនាទីជាសាស្ត្រាចារ្យកិត្តិយសមួយរូបដែរនៅក្នុងនាយកដ្ឋានវិស្វកម្មមេកានិករបស់វិទ្យស្ថាន KAIST តារាចម្រៀង G-Dragon បាននិយាយថា លោកមានបំណងធ្វើការផ្សាភ្ជាប់រវាងពិភពនៃវិទ្យាសាស្ត្រអវកាស ពិភពបញ្ញាសិប្បនិម្មិត និងវិស័យសិល្បៈ។ ទីភ្នាក់ងាររបស់លោកបានពណ៌នាគម្រោងនេះថាជាព្រឹត្តិការណ៍ដ៏សំខាន់មួយសម្រាប់អនាគតនៃ ‘បច្ចេកវិទ្យាសិល្បៈ’ ។
ព្រឹត្តិការណ៍បញ្ជូនចម្រៀងទៅកាន់ទីអវកាសនេះត្រូវបានគេកំណត់ពេលវេលានៅម៉ោង ៨ យប់ ថ្ងៃទី៩ ខែមេសា នៅមជ្ឈមណ្ឌលស្រាវជ្រាវបច្ចេកវិទ្យាផ្កាយរណបរបស់វិទ្យាស្ថាន KAIST ។ គម្រោងនេះដែរក៏ត្រូវបានភ្ជាប់ជាមួយនឹងគំនិតផ្តួចផ្តើមស្រាវជ្រាវភាពវៃឆ្លាតក្នុងទីអវកាសហៅកាត់ SETI របស់អង្គការ NASA ផងឌេរ។
មុនគម្រោងរបស់ G-Dragon កន្លងមកគំនិតផ្ដួចផ្ដើម SETI ក៏បានបញ្ជូនតន្ត្រីពីក្រុមតន្រ្តីរ៉ុកអង់គ្លេស The Beatles ទៅកាន់លំហអវកាសផងដែរ ខណៈ G-Dragon ក្លាយជាសិល្បករកូរ៉េដំបូងគេដែលបានចូលរួមក្នុងគម្រោងដ៏ទំនើបនេះ ៕


























Account
Security
Favourite Content