Tao អតីតសមាជិក EXO បានបង្ហាញថាទម្ងន់របស់លោកបានកើនឡើងដល់ ៩០ គីឡូក្រាមបន្ទាប់ពីរៀបការ ព្រមទាំងទទួលស្គាល់ត្រង់ៗគឺជាការ “ឡើងទម្ងន់ដែលពោរពេញដោយក្ដីសុខ”។

យោងតាមប្រព័ន្ធផ្សព្វផ្សាយចិនជាច្រើន នៅថ្ងៃទី ២៨ ខែធ្នូ តារាចម្រៀងនិងសម្ដែង Tao បានបង្ហាញខ្លួននៅក្នុងកម្មវិធីទូរទស្សន៍មួយ និងបានទម្លាយពីទម្ងន់បច្ចុប្បន្នរបស់ខ្លួន ដែលបង្កឱ្យមានការភ្ញាក់ផ្អើលយ៉ាងខ្លាំង។ មុននេះ គឺកាលពីខែតុលា Tao បានរៀបចំពិធីមង្គលការដ៏ប្រណីតមួយនៅខេត្តហៃណាន ប្រទេសចិន ជាមួយតារាចម្រៀង និងតារាសម្តែង Xu Yiyang ដែលជាអតីតអ្នកហ្វឹកហាត់ SM Entertainment។ មិនយូរប៉ុន្មានបន្ទាប់ពីពិធីមង្គលការ រូបថតបង្ហាញទម្រង់មុខឡើងគីឡូរបស់លោកក៏បានទទួលការចាប់អារម្មណ៍យ៉ាងខ្លាំងលើអ៊ិនធឺណិត។
ក្នុងកំលុងពេលកម្មវិធី Tao បានលាន់មាត់ថា៖ “ខ្ញុំធ្ងន់ណាស់! ខ្ញុំឡើងទម្ងន់ដល់ ៩០ ឯណោះ!” នាំឱ្យភ្ញៀវកិត្តិយសផ្សេងទៀតនាំគ្នាបង្អាប់ចំពោះការឡើងទម្ងន់របស់លោក និងសួរបែបលេងសើចថា៖ “តើនេះជាការឡើងទម្ងន់ព្រោះមានក្ដីសុខ បន្ទាប់ពីរៀបការមែនទេ?”។ Tao បានបញ្ជាក់យ៉ាងរហ័សថា៖ “តាមពិតទៅ ខ្ញុំបានព្យាយាមថែរក្សាខ្លួនឯង និងសម្រកទម្ងន់ខ្លះហើយ មិនធាត់ដល់ម្ល៉ឹងទេ”។
ក្រោយមកនៅក្នុងការ Live មួយ Tao បានពន្យល់ដោយរីករាយអំពីមូលហេតុនៃការឡើងទម្ងន់របស់ខ្លួនថា៖ “ម្ហូបដែលប្រពន្ធខ្ញុំធ្វើគឺឆ្ងាញ់ណាស់។ ខ្ញុំពិតជាសប្បាយចិត្តណាស់”។ ចម្លើយត្រង់ៗនេះបានធ្វើឱ្យអ្នកគាំទ្រជាច្រើននិយាយថាគួរឱ្យស្រលាញ់ និងបានចូលរួមអបអរសាទរលោក។
គួរបញ្ជាក់ថា Tao និង Xu Yiyang មានប្រវត្តិដូចគ្នា ដោយពួកគេទាំងពីរនាក់សុទ្ធតែធ្លាប់ស្ថិតនៅក្រោមក្រុមហ៊ុន SM Entertainment។ បច្ចុប្បន្ន ពួកគេទាំងពីរធ្វើការនៅក្រោមភ្នាក់ងារតែមួយនៅក្នុងប្រទេសចិន។ Tao បានបង្ហាញខ្លួនជាលើកដំបូងជាមួយ EXO ក្នុងឆ្នាំ ២០១២ មុនពេលចាកចេញពីក្រុមនៅឆ្នាំ ២០១៥ និងផ្តោតជាសំខាន់លើសកម្មភាពនៅក្នុងប្រទេសចិន។ ចំណែក Xu Yiyang គឺជាតារាហ្វឹកហាត់នៅ SM ពីឆ្នាំ ២០១៤ ហើយបានបង្ហាញខ្លួននៅក្នុងកម្មវិធី MY SMT ជាមួយ Ningning មុនពេលចាកចេញពីភ្នាក់ងារនៅឆ្នាំ ២០១៨ ៕

























Account
Security
Favourite Content