បន្ទាប់ពីរក្សាភាពស្ងប់ស្ងាត់ ក្រោយពីបាត់បង់ឈ្មោះជាសមាជិកក្រុម NewJeans និងបញ្ហាជម្លោះផ្លូវច្បាប់ជាមួយ ADOR តារាខេប៉ុប Danielle នឹងភ្ជាប់ទំនាក់ទំនងជាមួយអ្នកគាំទ្រជាលើកដំបូង នៅយប់ថ្ងៃទី១២ ខែ១ វេលាម៉ោង ៧យប់នេះ ម៉ោងនៅក្នុងប្រទេសកូរ៉េខាងត្បូង។

ក្រុមហ៊ុនច្បាប់ HwaWoo ដែលជាតំណាងផ្លូវច្បាប់របស់ Danielle បានឱ្យដឹងថា តារាស្រីវ័យ២០ឆ្នាំ នឹងធ្វើការ “Live Message” ដែលជាការឆ្លើយឆ្លងជាសារភ្លាមៗជាមួយអ្នកគាំទ្រតាមរយៈគណនី YouTube និង Instagram ផ្ទាល់ខ្លួនរបស់នាង។
តំណាងរូបនេះបានឱ្យដឹងថា ការផ្សាយផ្ទាល់នេះគឺជាការជជែកគ្នាជាមួយនឹងអ្នកគាំទ្ររបស់ Danielle ដែលតែងតែគាំទ្រនាងរហូតមក និងចែករំលែកពីស្ថានភាពបច្ចុប្បន្នរបស់នាង ខណៈតំណាងរូបដដែលបានបញ្ជាក់ថា នឹងមិននិយាយអ្វីទាក់ទងនឹងបញ្ហាជម្លោះផ្លូវច្បាប់ជាមួយនឹងអតីតទីភ្នាក់ងារនោះឡើយ។

ផ្អែកតាម The Korea Herald កាលពីថ្ងៃទី២៩ ខែធ្នូ កន្លងទៅ ADOR បានប្រកាសបញ្ចប់កិច្ចសន្យាផ្ដាច់មុខជាមួយនឹង Danielle បន្តដោយការប្ដឹងទាមទារសំណងជាង ៣០លានដុល្លារអាមេរិកពីតារាស្រីផ្ទាល់ សមាជិកគ្រួសារ និងអតីត CEO របស់ ADOR គឺ Min Hee Jin ដោយចោទថា ចុងចោទបានរំលោភកិច្ចសន្យា និងនាំឱ្យទីភ្នាក់ងារខូចកេរ្តិ៍ឈ្មោះជាដើម។
បន្ថែមពីនេះ ទីភ្នាក់ងារក៏បានបញ្ជាក់ថា ខ្លួននឹងបកស្រាយមូលហេតុបន្ថែមទៀតនាពេលក្រោយ ដោយមិនទាន់កំណត់ថ្ងៃច្បាស់លាស់នៅឡើយទេ។ យ៉ាងណាមិញ Danielle នៅមិនទាន់មានសកម្មភាពណាមួយជាការតបតទៅវិញឡើយ។ បើទោះបីជាការភ្ជាប់ទំនាក់ទំនងជាមួយនឹងអ្នកគាំទ្រគ្រានេះ តារាស្រីរូបនេះនៅតែមិនមានគម្រោងលើកយករឿងនេះមកនិយាយជាសាធារណៈដូចគ្នា៕























Account
Security
Favourite Content