បើទោះបីជាពេលនេះអារម្មណ៍នៅសោកសៅ ដោយសារការបាត់បង់អ្នកម្តាយជាទីគោរពស្រលាញ់គ្មានថ្ងៃត្រឡប់វិញ ក៏ ដាំ សុភ័ក្រស៊ីនឌី Miss Planet Cambodia 2023 នៅតែបង្ហាញជំហររឹងមាំ និងការតាំងចិត្តខ្ពស់ដើរឆ្ពោះទៅមុខ ត្រៀមតំណាងជាតិលើឆាកអន្តរជាតិ ដែលកម្ពុជាយើងគ្រោងទទួលធ្វើជាម្ចាស់ផ្ទះនាពេលឆាប់ៗខាងមុខនេះ។

បន្ទាប់ពី ស៊ីនឌី បង្ហោះសារលើបណ្តាញសង្គមហ្វេសប៊ុកផ្លូវការនាងហើយនោះ គេឃើញមានហ្វេនៗជាច្រើនបានចូលទៅ Comment លើកទឹកចិត្តនាងបន្ថែមទៀត ធ្វើឱ្យបវរកញ្ញារូបនេះ មានអារម្មណ៍កក់ក្តៅឡើងវិញបន្តិច និងចាប់ផ្តើមងាកមកពង្រឹងសមត្ថភាព ពង្រីកសក្តានុពល ត្រៀមប្រកួតប្រជែងជាមួយបេក្ខភាពមកពីប្រទេសផ្សេងៗក្នុងកម្មវិធី Miss Planet International 2023។
តាមការឱ្យដឹងពីលោក អេង ស៊ីម៉េង អ្នកចាត់ការទូទៅក្រុមហ៊ុន CIM ពេលនេះផ្លូវចិត្តរបស់ ស៊ីនឌី បានល្អប្រសើរជាងមុនច្រើន ហើយក៏កំពុងត្រឡប់មកហ្វឹកហាត់វិញបណ្តើរៗ ដោយ ស៊ីនឌី នឹងត្រូវធ្វើការហ្វឹកហាត់ជាមួយគ្រូជនជាតិហ្វីលីពីន គឺ Mr. Romyr Libo-on ជា National Director ក្រុមហ៊ុន CIM ទៅលើ Q&A និងការដើរ Catwalk ជាដើម។


អ្នកចាត់ការទូទៅរូបនេះ បង្ហើបថា ឈុតតំណាងជាតិរបស់ Miss Planet Cambodia ឆ្នាំនេះ ធានាថាពិសេសតែម្តង ព្រោះទទួលបានការឧបត្ថម្ភពី ម៉ារីអូ ដំឡើងដោយ «ទឹកគ្រឿង» ជាអ្នកច្នៃឈុតតំណាងជាតិមានឈ្មោះបោះសំឡេងម្នាក់ក្នុងវិស័យ beauty pageant នាពេលបច្ចុប្បន្ន។ លោកសង្ឃឹមថា ឈុតតំណាងជាតិ Miss Planet Cambodia 2023 នឹងអាចឆក់យកពានរង្វាន់ Best National Costume ដូចកាលឆ្នាំមុនៗដែលកម្ពុជាយើងបានជាប់ Best National Costume ២ឆ្នាំជាប់ៗគ្នារួចមកហើយ។
ក្រឡេកទៅមើលការត្រៀមខ្លួនរបស់ ស៊ីនឌី វិញនោះ អ្នកចាត់ការទូទៅ CIM ថា ត្រឡប់មកលើកនេះ បវរកញ្ញាស្រអែមស្រស់កូនអ្នកខេត្តពោធិ៍សាត់ ត្រៀមខ្លួនជាស្រេចហើយ ទោះបីមានទុក្ខធំប៉ុនមហាសាគរក៏ពិតមែន តែនាងបានបង្វែរទុក្ខទាំងនោះមកជាកម្លាំងជំរុញចិត្តដ៏ខ្លាំងក្លា សម្រាប់ការប្រកួតប្រជែងលើឆាកអន្តរជាតិនេះ។ ស៊ីនឌី ពិតជាមានការតាំងចិត្តខ្ពស់ក្នុងការប្រកួតប្រជែង ពោលគឺនាងដុតដៃដុតជើងសម្រាប់ការប្រកួតនេះតែម្តង។ បច្ចុប្បន្ន ស៊ីនឌី កំពុងពង្រឹងសមត្ថភាពរបស់នាងបន្ថែម តាមរយៈការហ្វឹកហាត់យ៉ាងដិតដល់ជាមួយក្រុមហ៊ុន CIM។


សម្រាប់ឈុត Evening gown របស់ Miss Planet Cambodia 2023 គឺពិសេសខ្លាំងតែម្តង ដោយ concept នៃឈុតនីមួយៗត្រូវច្នៃឡើងតាមលំនាំ និងបែបផែននៃទម្រង់ខ្មែរយើង។ រីឯ ឈុតប្រើប្រាស់ប្រចាំថ្ងៃ ស៊ីនឌី ត្រៀមជាស្រេចតាំងពីដឹងថា ត្រូវទទួលភារៈកិច្ចតំណាងជាតិកម្ពុជាមកម៉្លេះ។ កុំភ្លេចចូលរួមគាំទ្រ និងលើកទឹកចិត្តដល់ ដាំ សុភ័ក្រស៊ីនឌី Miss Planet Cambodia 2023 ដែលនាងនឹងតំណាងកម្ពុជាចូលរួមប្រកួតកម្មវិធីMiss Planet International 2023 ដែលនឹងរៀបចំឡើងនៅថ្ងៃទី១៩ ខែវិច្ឆិកា ឆ្នាំ ២០២៣ នៅលើទឹកដីកម្ពុជាផ្ទាល់៕

























Account
Security
Favourite Content