Chaeyoung រៀបរាប់ថា នៅគ្រាដែលអាជីពជាអាយដលខេប៉ុបកំពុងតែទទួលបានជោគជ័យខ្លាំង នាងធ្លាប់ពិចារណាចង់ចេញពីក្រុម TWICE ព្រោះតែមានបញ្ហាពិបាក ស្ទើរទ្រាំមិនបាន។

នៅល្ងាចថ្ងៃទី៩ ខែតុលានេះ Chaeyoung បានជជែកស៊ីជម្រៅអំពីដំណើរលើវិថីខេប៉ុប ជាមួយនឹងកម្មវិធីផតខាស SPNS។ នៅពេលដែលពិធីករបានរំឭកដល់ភាពជោគជ័យដែល Chaeyoung ទទួលបានទាំងវ័យក្មេង តារាស្រីវ័យ ២៦ឆ្នាំបានរៀបរាប់ថា នៅគ្រានោះជាគ្រាដែលក្រុមរវល់ខ្លំាង រហូតនាងពេលគេងបានត្រឹមតែ កន្លះម៉ោងប៉ុណ្ណោះក្នុងមួយថ្ងៃ និងយូរបំផុតបាន ២ទៅ ៣ម៉ោង។
តារាស្រីទទួលស្គាល់ថា ការគេងមិនគ្រប់នេះ គឺជារឿងដ៏លំបាកបំផុតក្នុងអាជីពនេះ។ ជាពិសេសនៅពេលដែលចេញបទ Cheer Up និង TT នាងគឺជាសមាជិកដែលមមាញឹកបំផុតក្នុងក្រុម ព្រោះនាងត្រូវទៅរៀនផង និងចូលរួមសកម្មភាពផ្សព្វផ្សាយចម្រៀងថ្មីផង។ ជាដើមហេតុដែលធ្វើឱ្យតារារ៉េបរូបនេះគិតថា ខ្លួនមិនអាចបន្តធ្វើបែបនេះបានទៀតទេ និងចង់បោះបង់អាជីពក្នុងក្ដីស្រមៃចោល។

Chaeyoung បានឱ្យដឹងបន្ថែមថា នៅពេលដែលនាងយករឿងនេះទៅនិយាយជាមួយម្ដាយ នាងនិងម្ដាយបានឈ្លោះគ្នាជាច្រើនដង តែដោយសារតែម្ដាយបានបញ្ចុះបញ្ចូល ដោយលើកពីការខិតខំហ្វឹកហាត់យ៉ាងលំបាកអស់ពេល ៣ឆ្នាំ និង៦ខែ ទើបនាងនៅតែបន្តមកដល់សព្វថ្ងៃនេះ។
យ៉ាងណាមិញ បច្ចុប្បន្ន Chaeyoung បានរួមដំណើរជាមួយនឹងក្រុម TWICE អស់ពេល ១០ឆ្នាំដោយជោគជ័យ ខណៈសមាជិកទាំង ៩នាក់នឹងបញ្ចេញអាល់ប៊ុមសម្រាប់ខួបមួយទសវត្សរ៍ TEN: The Story Goes On នៅថ្ងៃទី១០ ខែតុលានេះ។
ក្រៅតែពីការងារក្រុម Chaeyoung ក៏បានខិតខំកសាងស្នាដៃជារឿយៗ រហូតអាចបញ្ចេញនូវអាល់ប៊ុមទោល Lil Fantasy Vol. 1 កាលពីថ្ងៃទី១២ ខែកញ្ញាកន្លងទៅនេះ៕

























Account
Security
Favourite Content