កំពូលតារាចម្រៀងប៉ុប Beyoncé បានក្លាយជា Billionaire ឬមហាសេដ្ឋីមានទ្រព្យពាន់លានដុល្លារជាផ្លូវការ បើយោងតាមសេចក្ដីរាយការណ៍របស់ទស្សនាវដ្ដីពាណិជ្ជកម្ម Forbes។

ទស្សនាវដ្ដី Forbes បានឱ្យដឹងថា ទ្រព្យសម្បត្តិសុទ្ធរបស់ភរិយាតារារ៉េប Jay-Z រូបនេះបានឈានដល់មួយពាន់លានដុល្លារជាផ្លូវការ គិតត្រឹមចុងខែធ្នូឆ្នាំ២០២៥ ធ្វើឱ្យនាងបានក្លាយជាតារាចម្រៀងមហាសេដ្ឋីទី ៥ បន្ទាប់ពីស្វាមីនិងតារាចម្រៀងផ្សេងទៀតរួមមាន Taylor Swift, Rihanna និង Bruce Springsteen។
គួរបញ្ជាក់ថា ឋានៈមហាសេដ្ឋីផ្លូវការរបស់ Beyoncé នៅឆ្នាំនេះកើតចេញពីភាពជោគជ័យយ៉ាងខ្លាំងនៃដំណើរប្រគំតន្ត្រីទេសចរណ៍ដ៏ធំរបស់នាងគឺ Renaissance World Tour ដែលបានចាប់ផ្តើមនៅឆ្នាំ ២០២៣ និងរកចំណូលបានជាង ៦០០ លានដុល្លារ រួមទាំងភាពជោគជ័យអាល់ប៊ុមចម្រៀងបែប Country ដំបូងរបស់នាងគឺ Cowboy Carter ដែលចេញផ្សាយនៅឆ្នាំ ២០២៤ និងបានឈ្នះពានរង្វាន់ GRAMMYs Album of the Year នៅឆ្នាំនេះ។
កាលពីខែកក្កដាកន្លងទៅ Beyoncé បានបញ្ចប់ដំណើរប្រគំតន្ត្រីទេសចរណ៍មួយទៀតគឺ Cowboy Carter World Tour ដោយជោគជ័យ បន្ទាប់ពីបានសម្តែងនៅក្នុងពហុកីឡដ្ឋានសំខាន់ៗចំនួន ៣២ នៅទូទាំងទ្វីបអឺរ៉ុប និងអាមេរិក។ ការប្រគំតន្ត្រីទេសចរណ៍នេះអាចរកចំណូលបានសរុបចំនួន ៤០០ លានដុល្លារ ដែលបានបង្កើតប្រវត្តិសាស្ត្រជាការប្រគំតន្ត្រីទេសចរណ៍ Country រកចំណូលបានខ្ពស់បំផុតមិនធ្លាប់មាន ថែមទាំងអាចរកបាន ៥០ លានដុល្លារទៀតពីការលក់វត្ថុអនុស្សាវរីយ៍ក្នុងពេលប្រគំតន្ត្រី។
របាយការណ៍ Forbes បានឱ្យដឹងទៀតថា ក្រៅពីអាជីពតន្ត្រី Beyoncé បានប្រឡូកក្នុងអាជីវកម្មជាច្រើនក្នុងរយៈពេលប៉ុន្មានឆ្នាំចុងក្រោយនេះ រួមទាំងកិច្ចសហការស្រាវីស្គី SirDavis ព្រមជាមួយយុទ្ធនាការផ្សេងទៀតដូចជាការសហការជាមួយក្រុមហ៊ុន Levi’s។ ត្បិតថា Beyonce បានពង្រីកអាណាចក្រអាជីវកម្មរបស់នាងជាមួយនឹងការបណ្តាក់ទុនច្រើនយ៉ាងនេះក៏ដោយ ប៉ុន្តែទ្រព្យសម្បត្តិផ្ទាល់ខ្លួនភាគច្រើនរបស់នាងបានមកពីអាជីពតន្ត្រី រួមជាមួយនឹងដំណើរប្រគំទេសចរណ៍ទូទាំងពិភពលោក និងការគ្រប់គ្រងសិទ្ធិចំពោះបទចម្រៀងរបស់នាង ៕

























Account
Security
Favourite Content