ជីវិតអាពាហ៍ពិពាហ៍ធ្លាប់ផ្អែមល្ហែមរបស់ តារាស្រី Barbie Hsu ឬ សាន់ ឆាយ និងអតីតស្វាមី Wang XiaoFei បានបញ្ចប់នៅដើមឆ្នាំ ២០២១។ ក្រោយពីប្រកាសលែងលះ អ្នកទាំងពីរនៅមិនទាន់ដាច់ស្រេចគ្នានៅឡើយ ដោយតែងតែឈ្លោះប្រកែកគ្នាជាញឹកញាប់ នៅលើបណ្ដាញសង្គម និងតែងក្លាយជាប្រធានបទក្ដៅត្រូវបានគេលើកយកមកពិភាក្សា។
ថ្មីៗ នេះ អតីតស្វាមីរបស់តារាស្រី Barbie Hsu បានចោទប្រកាន់រូបនាងរឿងចាយប្រាក់របស់លោកផ្ដេសផ្ដាស់ ដើម្បីទិញអីវ៉ាន់ផ្គាប់ចិត្ដស្វាមីថ្មី ជាពិសេសបង្ខាំងមិនឲ្យរូបលោកជួបមុខកូនៗ របស់ខ្លួន។ ជាការឆ្លើយតប Barbie Hsu ក៏បានបង្ហោះសារយ៉ាងវែងអន្លាយ និងបកអាក្រាតអតីតស្វាមីរបស់ខ្លួនលែងទុកមុខរាប់គ្នា។
Barbie Hsu បានលើកឡើងថា៖ លោក Wang XiaoFei បានផឹកស្រា និងរុញបងស្រីរបស់នាង។ នាងព្យាយាមចូលទៅជួយឃាត់ទាំងដែលខ្លួនកំពុងមានផ្ទៃពោះ នាងក៏ត្រូវបានអតីតស្វាមីរុញឲ្យដួលទៅដីដូចគ្នា។ លោកក៏បានយកសៀវភៅមានកម្រាស់ក្រាស់ និងរឹងគប់មកលើរូបនាងទៀតផង។
រូបនាងបានបន្ដថា៖ នាងទទួលបានរូបថតជាច្រើន ដែលលោកបានដើរលេងសប្បាយជាមួយស្រីផ្សេង និងប្លែកមុខរហូត ទាំងដែលនៅរស់ជួបជុំគ្នា មិនទាន់លែងលះ។ នាងពិតជាមានការភ្ញាក់ផ្អើល។ ជីវិតអាពាហ៍ពិពាហ៍ជាង ១០ ឆ្នាំ នាងមិនមានចំណេញអ្វីឡើយ។ នាងបានឲ្យប្រាក់លោក និងឲ្យលោកខ្ចី ច្រើនជាងអ្វីដែលលោកបានផ្ដល់ឲ្យនាង ហើយលោកបានជំពាក់ប្រាក់នាងរាប់លានដុល្លារទៀតមិនទាន់បានសងវិញផង។ លោកបន្ដផ្សព្វផ្សាយ រឿងមិនពិត និងពាក្យចចាមអារ៉ាមផ្ដេសផ្ដាស ដែលធ្វើឲ្យនាងខូចកេរ្ដិ៍ឈ្មោះ និងត្រូវមនុស្សជាច្រើនរិះគន់ពាសពេញអ៊ីនធើណេត។
ជាចុងក្រោយ Barbie Hsu លើកឡើងថា នាងនឹងឈប់តបតចំពោះរឿងគ្រប់យ៉ាង ចំពោះរឿងអាស្រូវ និងពាក្យចចាមអារ៉ាមដែលផ្សព្វផ្សាយផ្ដេសផ្ដាស។ នាងនឹងទុកឲ្យផ្លូវច្បាប់ជាអ្នកចាត់ការតែម្ដង។ តែយ៉ាងណាក្ដីរឿងនៅតែមិនចប់ ដោយសារតែអតីតស្វាមីរបស់នាងលោក Wang XiaoFei បានចេញមកតបត និងលើកឡើងថា លោកមិនបានធ្វើរឿងទាំងអស់នោះឡើយ ៕