ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
DJ Koo ឬ Koo Jun-yup ដែលជាអតីតសិល្បករ K-POP ជំនាន់ទី១និងជាសមាជិកក្រុម CLON គឺជាស្នេហាដំបូង និងចុងក្រោយរបស់តួឯកស្រីសាន់ឆាយ Barbie Hsu ដោយពួកគេបានជួបគ្នាដំបូងក្នុងឆ្នាំ ១៩៩៧ នៅពេល Koo កំពុងប្រគំតន្ត្រីនៅតៃវ៉ាន់ ហើយនៅពេលដែលពួកគេបានជួបគ្នាម្តងទៀតក្នុងឆ្នាំ ១៩៩៨ ពួកគេបានយល់ព្រមសេពគប់គ្នាជាសង្សារ។
ទោះជាយ៉ាងណា បន្ទាប់ពីទាក់ទងគ្នាបានប្រហែលមួយឆ្នាំ អ្នកទាំងពីរក៏ត្រូវបង្ខំចិត្តចែកផ្លូវគ្នា ដោយសារតែភាពល្បីល្បាញ និងច្បាប់ទម្លាប់រឹតត្បិតរឿងស្នេហាសម្រាប់សិល្បករកូរ៉េខាងត្បូង។ ពួកគេបានឱបគ្នាយំពេញមួយយប់ មុននឹងបញ្ចប់ទំនាក់ទំនងស្នេហាដោយបង្ខំចិត្ត។
រហូតដល់ឆ្នាំ២០០១ Barbie Hsu ក៏មានឈ្មោះល្បីល្បាញខ្លាំងនៅក្នុងរឿងភាគ F4 Meteor Garden ផ្លូវជីវិតរបស់ពួកគេក៏មិនអាចវៀងមកជួបគ្នាបានទៀត ដោយសារតែប្រជាប្រិយភាពរៀងៗខ្លួន។
រយៈពេលកន្លងមក Barbie Hsu បានបង្កើតទំនាក់ទំនងស្នេហាជាមួយតារាសម្ដែងតៃវ៉ាន់ Lan Cheng-lung ប្រហែល ៥ ឆ្នាំមុនពេលបែកគ្នា ហើយក៏សេពគប់ជាមួយ Vic សមាជិកក្រុម F4 ដែលធ្លាប់ធ្វើការជាមួយក្នុងរឿងភាគដ៏ល្បីនោះ ប៉ុន្តែបានត្រឹម ២ ឆ្នាំប៉ុណ្ណោះ ហើយនៅឆ្នាំ២០១១ Barbie Hsu បានសម្រេចចិត្តរៀបការជាមួយ Wang Xiaofei ជាអ្នកជំនួញជនជាតិចិន ដែលក្រោយមកពួកគេមានកូនជាមួយគ្នាពីរនាក់។
ប៉ុន្តែដោយសារបញ្ហាភាគីស្វាមីក្បត់ចិត្ត និងបញ្ហាទស្សនៈនយោបាយរវាងចិននិងតៃវ៉ាន់ផង ធ្វើឱ្យពួកគេមានរឿងឈ្លោះគ្នារហូតដល់ទីបំផុតក្នុងឆ្នាំ ២០២១ ពួកគេបានលែងលះគ្នា។
នៅពេលដឹងដំណឹងលែងលះនេះ DJ Koo បានស្វែងរកលេខទូរស័ព្ទរបស់ Barbie Hsu ដើម្បីផ្តល់កម្លាំងចិត្តដល់នាងក្នុងនាមជាមិត្តចាស់ម្នាក់។ រយៈពេល ២០ឆ្នាំកន្លងមក លោកមិនដែលបំភ្លេចនាងបាននោះឡើយ។ ជាភ័ព្វសំណាងនិងភ្ញាក់ផ្អើលមែនទែនសម្រាប់លោក ដែលនាងនៅតែប្រើលេខដដែល។ ក្រោយមកពួកគេចាប់ផ្ដើមនិយាយជាមួយគ្នាជាថ្មី ហើយចំណាយពេលមិនយូរប៉ុន្មានក៏សម្រេចចិត្តស្រលាញ់គ្នាម្ដងទៀត។
DJ Koo បានផ្ដល់សម្ភាសជាមួយសារព័ត៌មានថារវាងលោកនិងនាងគឺបានខាតបង់ពេលវេលាច្រើនគ្រប់គ្រាន់ហើយ ដូច្នេះហើយទើបលោកសម្រេចចិត្តសុំនាងរៀបការនៅឆ្នាំ ២០២២ ហើយនាងក៏យល់ព្រមភ្លាមៗ។ រងើកភ្លើងស្នេហាដែលមិនទាន់រលត់កាលពី២០ឆ្នាំមុនក៏ចាប់ផ្ដើមមានដង្ហើមឡើងវិញ ដោយគិតថាចាប់ពីពេលនេះតទៅ ពួកគេនឹងលែងបែកគ្នាទៀតហើយ ហើយនឹងរស់នៅប្រកបដោយសុភមង្គលទាំងនៅតៃវ៉ាន់ និងទីក្រុងសេអ៊ូល។
ប៉ុន្តែខណៈពេលដែលអ្នកទាំងពីរកំពុងរីករាយនឹងជីវិតគូក្នុងក្ដីស្រមៃ ជោគជតា និងការស្លាប់ក៏បានបំបែកពួកគេម្តងទៀត ដែលលើកនេះជាការចាកលាជារៀងរហូត។ Barbie Hsu បានទទួលមរណភាពនៅដើមខែកុម្ភៈនេះក្រោយមានការរលាកសួតធ្ងន់ធ្ងរ ដែលបណ្ដាលមកពីឆ្លងផ្ដាសាយធំក្នុងពេលធ្វើដំណើរកម្សាន្តបុណ្យចូលឆ្នាំចិននៅប្រទេសជប៉ុន។
ត្រលប់ថយក្រោយបន្តិច ការរៀបការម្ដងទៀតក្នុងរយៈពេលត្រឹមតែ ៣ ខែបន្ទាប់ពីលែងលះគឺនាំឱ្យមានមតិចម្រូងចម្រាសជាច្រើនមកលើ Barbie Hsu ប៉ុន្តែពេលនោះនាងបានបង្ហោះសារលើបណ្ដាញសង្គមរបស់ខ្លួនដោយសរសេរថា៖ “ជីវិតមនុស្សគឺជាអ្វីដែលមិនទៀងទាត់ ខ្ញុំនឹងថែរក្សាក្ដីសុខមួយនេះឱ្យបានល្អ និងរស់នៅជាមួយបច្ចុប្បន្ន និងសូមអរគុណគ្រប់យ៉ាងដែលធ្វើឱ្យខ្ញុំបានដើរមកដល់ចំណុចនេះ”។ មកដល់ថ្ងៃនេះ គឺពិតដូចជានាងនិយាយមែន ជីវិតគ្មានអ្វីទៀងទាត់នោះឡើយ គ្មានអ្នកណាអាចដឹងមុនឡើយថានឹងមានរឿងអ្វីកើតឡើងចំពោះខ្លួនឯងទៅអនាគត ដូច្នេះអ្វីដែលល្អបំផុតគឺត្រូវរស់នៅជាមួយបច្ចុប្បន្ន ធ្វើអ្វីដែលជាក្ដីសុខសម្រាប់ខ្លួនឯង មិនបៀតបៀនខ្លួនឯង មិនបៀតបៀនដល់អ្នកដទៃគឺគ្រប់គ្រាន់ហើយ។ ខណៈពេលនេះ Barbie Hsu បានលាគ្រប់គ្នាជារៀងរហូតមែន ប៉ុន្តែតួអង្គសាន់ឆាយនិងស្នាដៃទាំងឡាយរបស់នាងនឹងស្ថិតនៅក្នុងចិត្តអ្នកគាំទ្រជារៀងរហូត ចំណែករឿងរ៉ាវជីវិតរបស់នាងក៏ជាមេរៀនដាស់តឿនមនុស្សគ្រប់គ្នាឱ្យចេះផ្ដល់តម្លៃគ្រប់ពេលវេលាក្នុងជីវិត និងរស់នៅក្នុងបច្ចុប្បន្នឱ្យបានច្រើន ៕
Account
Security
Favourite Content