តារាសម្តែងវ័យក្មេងរូបស្រស់ អាង សុជាតា ហៅ ឈូឈូ ជាកូនស្រីរបស់តារាសម្តែងជើងចាស់ អ្នកនាង សឿន ផានផាភួង ដែលបានបោះជំហានចូលសិល្បៈសម្តែងតាំងពីអាយុ ៧ ឆ្នាំមកម៉្លេះ តាមរយៈស្នាដៃរឿង «ម្ចាស់គំនុំ ម្ចាស់ស្នេហ៍»។


គិតមកទល់ពេលនេះ រយៈពេលប្រមាណ ១០ ឆ្នាំហើយ ដែល ឈូឈូ ប្រឡូកវិស័យសិល្បៈ។ ទេពកោសល្យសិល្បៈ និងភាពប៉ិនប្រសព្វ បានជួយរុញច្រានឱ្យសោភារូបនេះក្លាយជាសិល្បការិនីលេចធ្លោម្នាក់ ហើយទទួលបានឱកាសការងារជាបន្តបន្ទាប់ ទាំងថតភាពយន្ត ស៉្បតពាណិជ្ជកម្ម ថតប្រ៉ូម៉ូតផ្សព្វផ្សាយផលិតផល ការងារ BA ការថតសម្អាងការ និងផ្សេងៗជាច្រើនទៀត ពោលគឺនាងបានឆ្លងកាត់ការងារសិល្បៈស្ទើរតែគ្រប់ផ្នែកទៅហើយ ខណៈដែលឆ្នាំនេះ ឈូឈូ ទើបអាយុ ១៩ ឆ្នាំតែប៉ុណ្ណោះ។
ភាពរីកចម្រើនលូតលាស់យ៉ាងឆាប់រហ័សក្នុងវិស័យសិល្បៈរបស់ អាង សុជាតា មិនមែនកើតឡើងដោយចៃដន្យឡើយ តែនាងខំប្រឹងតស៊ូខ្លាំងណាស់ទម្រាំមានថ្ងៃនេះ។ ម៉្យាង ក្នុងនាមជាសិល្បការិនីវ័យក្មេង កូនស្រី ផាភួង មានគោលជំហរច្បាស់លាស់ក្នុងការប្រតិបត្តិខ្លួនឱ្យស័ក្តិសមជាបុគ្គលគំរូសម្រាប់សាធារណជន។ មួយវិញទៀត នាងក៏កតញ្ញូលើសិល្បករ-សិល្បការិនីរៀមច្បង ចាស់ព្រឹទ្ធាចារ្យ។

ផ្តល់បទសម្ភាសន៍ឱ្យដឹងក្នុងកម្មវិធីមួយ ឈូឈូ ថា ចាប់តាំងពីបោះជំហានប្រឡូកវិស័យសិល្បៈ គឺនាងតាំងចិត្តថា ត្រូវតែលូកឱ្យកប់ និងមិនត្រូវរត់គេច ព្រោះបញ្ហាកើតឡើងតិចតួចនោះទេ។ វាជារឿងធម្មតាដែលយើងម្នាក់ៗត្រូវប្រឈមបញ្ហាផ្សេងៗគ្នាមិនថា វិស័យសិល្បៈ ឬការងារអ្វីនោះទេ ដែលសំខាន់គឺយើងត្រូវហ៊ានតស៊ូពុះពារ ជម្នះវាទៅឱ្យបាន។
សម្រាប់ ឈូឈូ គឺនាងមានការប្តេជ្ញាចិត្ត និងបានតាំងចិត្តតាំងពីប្រឡូកសិល្បៈដំបូងម៉្លេះថា ត្រូវតែធ្វើឱ្យបាន និងលូកឲ្យជ្រៅ ទៅដល់អ្វីដែលប៉ងចង់ធ្វើ។ ទោះជាយ៉ាងណាក៏ត្រូវតែពុះពារទៅមុខរហូតទទួលបានជោគជ័យ ព្រោះពាក្យថា សិល្បៈមិនមែនសម្រាប់នាងម្នាក់ឯងទេ តែសម្រាប់យើងគ្រប់គ្នា ហើយអ្វីសិល្បៈដែលយើងបង្ហាញទៅមិនមែនសម្រាប់ខ្លួនឯង តែយើងបង្ហាញពីសិល្បៈវប្បធម៌ខ្មែរទៅកាន់សកលលោកតែម្តង។


ថ្មីៗកន្លងទៅនេះ ស្នាដៃខ្សែភាពយន្តខ្នាតធំថ្មីរបស់ ឈូឈូ ទើបទម្លាក់តាមរោងភាពយន្តទំនើប ដើម្បីបម្រើអារម្មណ៍ប្រិយមិត្តទស្សនិកជន ហើយឆាប់ៗនេះលោកអ្នកក៏នឹងបានទស្សនាស្នាដៃរឿងភាគថ្មីរបស់តារាស្រីវ័យ ១៩ ឆ្នាំនេះលើកញ្ចក់ទូរទស្សន៍ហង្សមាសផងដែរ។ មិនតែប៉ុណ្ណោះ នាងក៏មានការងារសិល្បៈផ្សេងៗជាច្រើនទៀតតាមមកជាហូរហែ។ ឈានចូលវ័យ ១៩ ឆ្នាំ ឈូឈូ រឹតតែស្រស់ស្អាតខ្លាំងឡើង រីឯ ការងារក៏សម្រុករកនាងដូចទឹកបាក់ទំនប់ដូច្នោះដែរ៕

























Account
Security
Favourite Content