កាលពីថ្ងៃទី២៦ ខែសីហា កន្លងទៅ Taylor Swift ទើបតែបានផ្ដល់ដំណឹងល្អទៅដល់ Swiftie នៅជុំវិញពិភពលោក ដោយនាងនឹងមិត្តប្រុស Travis Kelce បានប្រកាសតាមរយៈបណ្ដាញទំនាក់ទំនងសង្គមថា អ្នកទាំងពីរបានសម្រេចចិត្តភ្ជាប់ពាក្យជាមួយគ្នាហើយ។


រូបភាពបំពាក់ចិញ្ចៀននៅក្នុងសួនច្បារ ដែលមានទីតាំងស្ថិតនៅក្នុងផ្ទះរបស់ Travis Kelce បានចែករំលែកបន្តដោយអ្នកគាំទ្រ និងសារព័ត៌មានពាសពេញបណ្ដាញទំនាក់ទំនងសង្គម សូម្បីតែប្រធានាធិបតី Donald Trumps ក៏បានដឹងឮពីដំណឹងល្អនេះ ថែមទាំងបានជូនពរឱ្យអ្នកទាំងពីរមានសំណាងល្អផងដែរ។
យ៉ាងណាមិញ Taylor Swift និង Travis Kelce មិនមែនជាគូស្នេហ៍បុគ្គលល្បីតែមួយគូទេ ដែលផ្លាស់ប្ដូរឋានៈពីគូសង្សារ ទៅជាគូដណ្ដឹងដូច្នេះ ព្រោះថ្មីៗនេះនៅមានគូស្នេហ៍ចំនួន ៣គូទៀត ដែលបានបញ្ចប់ភាពនៅលីវ ត្រៀមខ្លួនចូលរោងអាពាហ៍ពិពាហ៍ដូចគ្នា។


តួយ៉ាង គូស្នេហ៍តារាចម្រៀង Selena Gomez និងផលិតករ Benny Blanco ក៏ទើបតែបានភ្ជាប់ពាក្យជាមួយគ្នានៅក្នុងខែឆ្នូ ឆ្នាំ២០២៤ កន្លងទៅដែរ ក្រោយពីបានទាក់ទងមើលចិត្តគ្នាអស់ពេលជាង ១ឆ្នាំ។ ដំណឹងនេះ Selena Gomez ផ្ទាល់ គឺជាអ្នកចែករំលែកជូនអ្នកគាំទ្រ ដោយនាងបានបង្ហោះរូបភាពចិញ្ចៀនពេជ្រ ៨ ការ៉ាត់ ភ្ជាប់ជាមួយនឹងសារខ្លីថា៖ “ជារៀងរហូតបានចាប់ផ្ដើមពីពេលនេះ…”។


លុះចូលមកដល់ខែមករា ឆ្នាំ២០២៥ គូស្នេហ៍តារាភាពយន្ត Tom Holland ក៏បានសុំ Zendaya រៀបការម្ដង។ ផ្អែកតាមសម្ដីឪពុកបង្កើតរបស់ Tom Holland បានឱ្យដឹងថា តារាប្រុសតួអង្គ Spider Man រូបនេះ បានរកឪកាសចូលទៅនិយាយជាមួយនឹងឪពុករបស់មិត្តស្រីខ្លួនដោយផ្ទាល់ ថែមទាំងបានតាំងចិត្តរើសចិញ្ចៀន មុនឈានដល់ការសុំមិត្តស្រីដែលទាក់ទងគ្នាតាំងតែពីឆ្នាំ ២០១៦ មករួមរស់ជុំគ្នា។


ដោយឡែក សម្រាប់ពាក្យចចាមអារ៉ាមដែលលេចឮថា Dua Lipa ត្រូវបានតារាភាពយន្ត Callum Turner សុំរៀបការវិញនោះ នៅក្នុងខែមិថុនា ឆ្នាំនេះ តារាស្រីវ័យ ៣០ឆ្នាំបានចេញមកបញ្ជាក់ហើយថា នាងពិតជាបានភ្ជាប់ពាក្យជាមួយនឹងគ្នាពិតមែន។
ជាក់ស្ដែង មានការយល់ឃើញថា អ្នកទាំងពីរទំនងជាបានភ្ជាប់ពាក្យជាមួយគ្នាតាំងតែពីរដូវកាលបុណ្យណូអែល ឆ្នាំ២០២៤មកម៉្លេះ ដោយមានការសន្និដ្ឋានបន្ថែមថា ហេតុការរ៉ូមេនទិកមួយនេះ ប្រហែលជាកើតឡើងនៅក្នុងទីក្រុងប៉ារីស ប្រទេសបារាំង បើផ្អែកតាមរូបភាពដែលអ្នកគាំទ្របានផ្ដិតយក។


ចុងក្រោយនោះ គឺគូស្នេហាតារាបាល់ទាត់ Cristiano Ronaldo និង Georgina Rodríguez។ ជាក់ស្ដែង អ្នកទាំងពីរបានរួមរស់ជាមួយគ្នាអស់ពេល ៨ឆ្នាំមកហើយ តែក្នុងខែសីហា នេះ Ronaldo ទើបតែបានបំពាក់ចិញ្ចៀនពេជ្រទំហំក្បែរ ៣៥ការ៉ាត់ និងមានតម្លៃប្រមាណ ៥លានដុល្លារអាមេរិក ទៅឱ្យអ្នកម្ដាយកូនទាំង ៥របស់ខ្លួន។
សំណេរនៅលើគណនី Instagram របស់ Georgina Rodríguez បានរៀបរាប់ជាភាសាអេស្ប៉ាញ ដែលមានអត្ថន័យជាខេមរភាសាថា៖ “ខ្ញុំយល់ព្រមរៀបការក្នុងជីវិតនេះ និងក្នុងគ្រប់ជីវិតទាំងអស់ដែលខ្ញុំមាន”៕



















































Account
Security
Favourite Content