បកត្រលប់ទៅកាលពីខែ មិថុនា ឆ្នាំ ២០២៤សមាជិករបស់ 2NE1 ទាំងបួនរួមមាន CL, Minzy, Park Bom និង Sandara Park ត្រូវបានរាយការណ៍ថា នឹងត្រៀមខ្លួនជួបជាមួយផលិតកម្ម YG ក្នុងពេលឆាប់ៗ នេះ ដើម្បីរៀបចំបញ្ចេញបទចម្រៀងថ្មី សម្រាប់ជាកាដូជូនអ្នកគាំទ្រ សម្រាប់គម្រប់ខួបក្រុម 2NE1 មានអាយុកាល ១៥ ឆ្នាំ។

ក្រោយមកផលិតកម្ម YG ក៏បានប្រកាសថា ក្រុមចម្រៀង 2NE1 នឹងធ្វើការប្រគំតន្ដ្រីទេសចរណ៍របស់ខ្លួនជាថ្មីម្ដងទៀត ដើម្បីជួបជុំអ្នកគាំទ្ររបស់ខ្លួន។ ថ្មីៗ នេះ សំបុត្រប្រគំតន្ដ្រី 2NE1 នៅឯប្រទេសកូរ៉េខាងត្បូង បានដាក់លក់ជាផ្លូវការ។ អ្វីដែលកាន់តែបញ្ជាក់ថា ក្រុមចម្រៀងនារីមួយនេះនៅតែមានឥទ្ធិពល និងល្បីល្បាញខ្លាំង នៅពេលដែលសំបុត្រត្រូវបានដាក់លក់ភ្លាម គឺមានអ្នកចុចដណ្ដើមគ្នាទិញរហូតដល់ជាង ៤៣ ម៉ឺននាក់។ វាជាចំនួនដ៏ច្រើនមួយសម្រាប់ក្រុមនារីដែលខានបង្ហាញសកម្មភាពជុំគ្នាយូរ។ ការប្រគំតន្ដ្រីទេសចរណ៍របស់ 2NE1 នឹងចាប់ផ្ដើមដំបូងពីប្រទេសកូរ៉េខាងត្បូង និងធ្វើឡើងរយៈពេល ២ ថ្ងៃ គឺថ្ងៃ ៥ និង ៦ ខែ តុលា ឆ្នាំ ២០២៤។ សំបុត្រសរុបសម្រាប់ការប្រគំតន្ដ្រីរយៈពេល ២ ថ្ងៃ មានតែត្រឹម ៨ ពាន់សំបុត្រប៉ុណ្ណោះ។


បើតាមសម្ដីរបស់តារាស្រី Sandara បានបញ្ជាក់ថា៖ សមាជិកម្នាក់ៗ សម្រេចផ្អាកសកម្មភាពទោលរបស់ខ្លួនសិន ដើម្បីមកផ្ដោតលើការប្រគំតន្ដ្រីរបស់ 2NE1។ សមាជិកម្នាក់ៗ ក៏បានហ្វឹកហាត់យ៉ាងយកចិត្ដទុកដាក់ ដោយមួយថ្ងៃ រាំរហូតដល់ទៅ ៧ ម៉ោង។ ពួកយើងមិនខ្លាចហត់នឿយទេ ព្រោះវាជាពេលវេលាដ៏មានតម្លៃមួយ។

គួរបញ្ជាក់ថា កាលពីថ្ងៃទី ២២ ខែ កក្កដា ឆ្នាំ ២០២៤ កន្លងទៅ លោក Yang HyunSuk បានប្រកាសផ្លូវការពីគម្រោង 2NE1។ ក្រុមនារីជំនាន់ទី ២ មួយនេះនឹងធ្វើការប្រគំតន្ដ្រីទេសចរណ៍ចាប់ពីខែ តុលា ឆ្នាំ ២០២៤ រហូតដល់ពាក់កណ្ដាលឆ្នាំ ២០២៥ ខាងមុខ។ ដំណឹងនេះ ធ្វើឲ្យមហាជន និងអ្នកគាំទ្រខេប៉ុបជាច្រើនមានអារម្មណ៍រំភើប និងសប្បាយរីករាយខ្លាំង។ 2NE1 ជាក្រុមចម្រៀងនារីខេប៉ុបជំនាន់ទី ២ ដ៏ល្បីល្បាញមួយ ហើយវាប្រៀបដូចជាសុបិន្ដដ៏អស្ចារ្យមួយដែលក្រុមចម្រៀងនារីមួយនេះ នៅអាចមកជុំជួបគ្នាម្ដងទៀត ដោយសមាជិកទាំង ៤ សុទ្ធតែមានវត្ដមាន៕























Account
Security
Favourite Content