ទំព័រហ្វេសប៊ុកផ្លូវការ Miss Universe Cambodia 2023 បានបើកបង្ហាញបេក្ខភាពផ្លូវការទាំង ៣៥ រូប ដែលត្រៀមប្រកួតប្រជែងកម្មវិធីបវរកញ្ញាចក្កវាឡកម្ពុជាឆ្នាំ ២០២៣ នាពេលឆាប់ៗមុខនេះ។ ប៉ុន្តែដោយសារ កញ្ញា ផៃ រ៉ាវី បានប្រកាសដកខ្លួនចេញពីការប្រកួត ទើបបេក្ខភាពលើផេកផ្លូវការមានតែ ៣៤ រូបប៉ុណ្ណោះ ហើយគេមិនទាន់ដឹងថា ស្រីស្អាតណាម្នាក់ដែលនឹងមកជំនួសលេខរៀងទី ៣៥ របស់ រ៉ាវី នោះឡើយ។
ឆ្នាំនេះគេឃើញមានបវរកញ្ញាភេទទី៣ បានដាក់ពាក្យចូលរួមប្រកួតផងដែរ ដោយសារស្ថាប័នអន្តរជាតិបានបើកឱកាសឱ្យស្ត្រីកែភេទ កាន់អត្តសញ្ញាណប័ណ្ណ និងលិខិតឆ្លងដែនដែលមានបញ្ជាក់ថាភេទស្រីអាចចូលរួមប្រកួតប្រជែងនៅលើវេទិការបស់ Miss Universe បាន។ ក្នុងចំណោមបេក្ខភាពផ្លូវការ ៣៤ រូបដែលផេកផ្លូវការបានបើកបង្ហាញគេប្រទះឃើញមានបវរកញ្ញាភេទទីបី ចំនួន ២ រូប ដែលត្រៀមបើកប្រវត្តិសាស្រ្តឡើងអង្រួនវេទិកា Miss Universe Cambodia 2023 ដូចជា បវរកញ្ញាភេទទីបី សៃហ្វុន និងបវរកញ្ញាភេទទី៣ An Jolyden (ឈ្មោះពិត រ៉ា ពៅ)។


ដំណឹងនៃការចូលរួមប្រកួត Miss Universe Cambodia 2023 របស់ សៃហ្វុន និង An Jolyden ធ្វើឱ្យវិស័យបវរកញ្ញា និងបណ្តាហ្វេនផេកធំៗភ្ញាក់ផ្អើលជាខ្លាំង ព្រោះនេះជាលើកដំបូងបង្អស់ដែល Miss Queen មានឱកាសចូលរួមប្រកួតបវរកញ្ញាចក្កវាឡកម្ពុជា។ ពេលនេះគេកំពុងរង់ចាំមើលសមរភូមិប្រកួតដ៏ក្តៅគគុករបស់ Miss Universe Cambodia 2023 និងកំពុងអ៊ុតមើលថា តើបវរកញ្ញាភេទទីបី ទាំង ២ រូប អាចបើកទ្វារប្រវត្តិសាស្រ្តលើទង់ជាតិខ្មែរទៅស្រែកលើឆាកអន្តរជាតិបានឬក៏អត់?


គេនៅចាំថា កាលដើមខែមិថុនាកន្លងទៅ សៃហ្វុន ធ្លាប់បង្ហោះលើហ្វេសប៊ុកផ្លូវការនាងថា «Dear LGBTQ ខ្ញុំពិតជាមានសេចក្ដីរំភើបខ្លាំងណាស់ដែលតំណាងឲ្យអ្នកទាំងអស់គ្នាពេលនេះពួកយើងចាប់ផ្ដើមរះនៅលើចក្រវាឡហើយពិភពលោកកំពុងតែសង្កេតមើលពួកយើងហើយខ្ញុំសន្យាក្នុងនាមខ្ញុំជាLGBTQខ្ញុំនឹងធ្វើឲ្យអ្នកទាំងអស់គ្នាមានមោទនភាពមកកាន់ខ្ញុំនឹងបង្កើតប្រវត្តិសាស្រ្តថ្មីសំរាប់ពួកយើង»។
ចំណែក An Jolyden ក៏បានបង្ហាញឆន្ទៈក្នុងការចូលរួមប្រកួតយ៉ាងដូច្នេះថា «នាងខ្ញុំមកម្ដងនេះ គឺមកដេីប្បីបំពេញក្ដីក្ដីស្រមៃ នឹងការស្រលាញ់ វិសយ័មួយនេះនឹងចង់ចូលរួម លេីកស្ទួយវិសយ័មួយនេះ អោយកាន់តែទូលំទូលាយ នឹងពិភពលោកអោយកាន់តែស្គាល់ ពីកម្ពុជា នឹងឈរជាសំឡេង និងកម្លាំងចិត្តដល់ក្មេងជំនាន់ក្រោយអោយរៀន ក្លាហាននឹងដេីរបំពេញក្ដីស្រមៃ របស់ខ្លួន»។ ការប្ដេជ្ញារបស់អ្នកទាំង ២ ធ្វើឱ្យអ្នកគាំទ្រស្ញប់ស្ញែងបវរកញ្ញាភេទទីបី ២ រូបនេះ ជាពន់ពេក។




សូមជម្រាបថា បេក្ខភាពទាំង ៣៥ រូប នឹងធ្វើការបង្ហាញខ្លួនជាផ្លូវការតំណាងឱ្យ ៣៥ រាជធានី-ខេត្តក្រុង និង ប្រទេសដែលមានប្រជាជនកម្ពុជារស់នៅច្រើន នៅថ្ងៃទី ២៧ ខែកក្កដា ឆ្នាំ២០២៣ ខាងមុខនេះ។ កុំភ្លេចរង់ចាំទស្សនាការប្រកួតដ៏ក្តៅគគុកនេះទាំងអស់គ្នា!























Account
Security
Favourite Content