ប្រិយមិត្តបានជ្រាបស្រាប់ហើយថា Miss Universe ជាកម្មវិធីប្រកួតប្រជែងសម្រស់ដ៏ធំលំដាប់ពិភពលោក។ ជារៀងរាល់ឆ្នាំ ប្រទេសជុំវិញពិភពលោកតែងតែបញ្ជូនបវរកញ្ញាចូលប្រកួតកម្មវិធីដ៏ធំនេះ។ ក្នុងនោះ ប្រទេសកម្ពុជាយើងបានបញ្ជូនបេក្ខភាពចូលប្រកួតកម្មវិធីនេះ ៦ឆ្នាំជាប់គ្នា គិតចាប់ពីឆ្នាំ២០១៧មក។
ក្រឡេកមកការប្រកួត Miss Universe លើកទី៧១ ទើបបញ្ចប់ទៅកាលពីពេលថ្មីៗនេះ ដោយមកុដ Miss Universe 2022 បានទៅលើ R’Bonney Gabriel ជា Miss Universe USA។ ចំណែក ហង្ស ម៉ានីតា បេក្ខភាពជើងខ្លាំងម្នាក់របស់កម្ពុជាមិនជាប់ក្នុងវគ្គ Top ចុងក្រោយដូចការរំពឹងទុកនោះទេ។ ទោះមិនទាន់អាចបំបែកកំណត់ត្រាសម្រាប់កម្ពុជាបានក៏ពិតមែន តែ ម៉ានីតា ធ្វើបានយ៉ាងល្អក្នុងការប្រកួតនេះ ដោយនាងបានបង្ហាញភាពក្លាហានអង់អាចរបស់ស្រ្តីខ្មែរលើឆាកអន្តរជាតិ ថែមទាំងបង្ហាញឱ្យពិភពលោកឃើញពីមោះមុតរបស់ស្រ្តីខ្មែរថែមទៀតផង។ ទោះមិនជាប់ដល់វគ្គ Top ចុងក្រោយ តែបវរកញ្ញារូបនេះបានជាប់ក្នុងដួងចិត្តអ្នកគាំទ្រកម្ពុជាទៅហើយ។
លោក ម៉ែន និមលរតន៍ នាយកប្រត្តិបត្តិ CIM ឱ្យដឹងថា ទោះ ម៉ានីតា មិនជាប់ដូចការរំពឹកទុក តែលោកនិងក្រុមការងារមានមោទកភាពលើរូបនាងខ្លាំងណាស់។ បើនិយាយពីអារម្មណ៍សោកស្តាយគឺតែងតែមាន តែយ៉ាងណាលោកស្កប់ស្កាល់ចិត្តណាស់ព្រោះ ម៉ានីតា ធ្វើបានល្អគ្រប់យ៉ាងហើយ តែដោយសារចន្លោះខ្វះខាតមួយចំនួនទើបកម្ពុជាយើងនៅមិនទាន់អាចចូលដល់វគ្គ Top បានយ៉ាងដូច្នេះ។ លោកនិងក្រុមការងារ CIM នៅតែទឹកចិត្ត និងឆន្ទៈមុតមាំក្នុងការបណ្តុះបណ្តាល MUC ជំនាន់ក្រោយៗឱ្យកាន់តែមានសមត្ថភាព និងពោរពេញដោយសក្ដានុពល ដើម្បីឈរជើងលើឆាកអន្តរជាតិនៅឆ្នាំក្រោយនេះ។
យ៉ាងណាមិញ ទន្ទឹមនឹងការខិតខំប្រឹងប្រែងរបស់ស្ថាប័ន អ្នកមានបំណងអ្នកពាក្យប្រកួតដាច់ខាតត្រូវតែដឹងពីចំណុចសំខាន់ទាំង ១០ នេះ៖
១. បេក្ខភាពមានបំណងមកដាក់ពាក្យប្រកួត ចាំបាច់ត្រូវស្វែងយល់ឱ្យបានច្បាស់ពី Concept របស់កម្មវិធី Miss Universe និងអ្វីដែលកម្មវិធីគេចង់បាន
២. ឆន្ទៈ និង ភាពក្លាហាន សំខាន់បំផុតសម្រាប់ការប្រកួតប្រជែង
៣. ចំណេះដឹងទូទៅ និង ភាសា ត្រូវតែល្អ ដើម្បីងាយស្រួលប្រាស្រ័យទាក់ទងជាមួយអ្នករៀបចំ និងបេក្ខភាពមកពីបណ្តាប្រទេសផ្សេងៗ
៤. កម្មវិធី Miss Universe មិនត្រូវការភាពស៊ិចស៊ីហួសហេតុពេកទេ (ទម្រង់អាសអាភាស) តែត្រូវការភាពថ្លៃថ្នូរ
៥. បេក្ខភាពដាក់ពាក្យចូលប្រកួត ចំបាច់ត្រូវមានពេលវេលាគ្រប់គ្រាន់ ក្នុងការធ្វើការជាមួយអ្នករៀបចំ (Organizer)
៦. បេក្ខភាពគ្រប់រូបត្រូវផ្តោតខ្លាំងលើការជួយសង្គម និងការងារផ្សេងពាក់ព័ន្ធសង្គមជាតិ (បើមានប្រវត្តិធ្លាប់ជួយការងារសង្គមច្រើនកាន់តែល្អ)
៧. អ្នកមានបំណងចូលប្រឡង MUC 2023 ចាំបាច់ត្រូវចេះប្រត្តិបត្តិខ្លួនឱ្យសមជាបវរកញ្ញាតំណាងប្រទេស ទោះស្ថិតក្នុងកាលៈទេសៈណាក៏ដោយ
៨. ត្រូវចេះរៀបចំតុបតែងខ្លួន និងសម្លៀកបំពាក់ឱ្យបានល្អល្អះរៀងរាល់ថ្ងៃ
៩. ត្រូវចេះប្រូម៉ូតខ្លួនឯងលើប្រព័ន្ធអ៊ីនធឺណិតឱ្យបានល្អ ដើម្បីទទួលបានការបោះឆ្នោត (Vote) គាំទ្រពីមហាជន
១០. ត្រូវជ្រើសរើសមតិតស៊ូឱ្យរឹងមាំ (advocacy) និងប្រត្តិបត្តិមតិតស៊ូនោះឱ្យបានខ្ជាប់ខ្ជួន ៕























Account
Security
Favourite Content