៣ ថ្ងៃបន្ទាប់ពីដំឡើងរួចរាល់ ផ្លាកសញ្ញា «X» ដ៏ធំនៅលើទីស្នាក់ការកណ្តាល Twitter ត្រូវបានដកចេញវិញកាលពីថ្ងៃច័ន្ទ ក្រោយទទួលបានការរិះគន់ពីពលរដ្ឋក្រុង San Francisco ជុំវិញពន្លឺភ្លឺចាំងរបស់វាដែលបំភ្លឺដល់អគារនៅក្បែរនោះ។
នាយកដ្ឋានអធិការកិច្ចអគារក្រុង San Francisco បាននិយាយថាខ្លួនទទួលបានពាក្យរអ៊ូរទាំពីមនុស្ស ចំនួន ២៤នាក់ដែលបានមកត្អូញត្អែរអំពីស្លាក X របស់ក្រុមហ៊ុន Twitter នេះ ដោយព្រួយបារម្ភអំពីសុវត្ថិភាពផង និងដោយសារពន្លឺដ៏ចែងចាំងខ្លាំងពេករបស់វា។

ស្របពេលជាមួយគ្នានេះនាយកដ្ឋានខាងលើ ក៏បានដាក់ការជូនដំណឹងទៅដល់ក្រុមហ៊ុន Twitter ដែលគ្រប់គ្រងដោយ Elon Musk កាលពីថ្ងៃសុក្រ ថានាយកដ្ឋានមិនមានការអនុញ្ញាតសម្រាប់ការដំឡើងផ្លាកសញ្ញាលើដំបូលក្នុងទីក្រុងឡើយ និងអះអាងថាមានការព្រួយបារម្ភពីបញ្ហាសុវត្ថិភាព។
បើតាម Forbes បានឱ្យដឹងថា មន្ត្រីអធិការកិច្ចអគារម្នាក់ បានចុះទៅមើលទីស្នាក់ការកណ្តាល Twitter កាលពីថ្ងៃសុក្រ និងថ្ងៃសៅរ៍ ប៉ុន្តែមិនត្រូវបានអនុញ្ញាតឱ្យចូលទៅលើដំបូលទេ ដោយភាគីខាង Twitter បានប្រាប់ថាស្លាកសញ្ញា X ជា «សញ្ញាភ្លើងបណ្តោះអាសន្នសម្រាប់ព្រឹត្តិការណ៍មួយប៉ុណ្ណោះ»។
ទោះយ៉ាងណានៅទីបំផុតស្លាក X ត្រូវបានរុះរើរួចរាល់ហើយ។ ស្លាក X នេះទាញចំណាប់អារម្មណ៍ពលរដ្ឋមួយឆាវនៅចុងសប្តាហ៍នេះ ខ្លះបានថតវីដេអូនៃពន្លឺដ៏ធំរបស់ស្លាក X បញ្ចេញពន្លឺ លោតញាប់ បង្ហោះលើបណ្តាញសង្គម ខណៈពលរដ្ឋខ្លះបង្ហោះរិះគន់ដោយសារពន្លឺរបស់វាគួរឱ្យរំខាន៕
























Account
Security
Favourite Content