បំណែកអាចម៍ផ្កាយដ៏ធំបំផុត បានលក់ចេញក្នុងតម្លៃ ៥.៣ លានដុល្លារអាមេរិក នៅក្នុងការដេញថ្លៃឯទីក្រុងញូវយ៉ក កាលពីថ្ងៃទី១៦ ខែកក្កដា ឆ្នាំ ២០២៥ កន្លងទៅ។

យោងតាមក្រុមហ៊ុន Sotheby’s ដែលជាអ្នករៀបចំកម្មវិធីដេញថ្លៃនេះ អាចម៍ផ្កាយខាងលើមានឈ្មោះថា NWA 16788 ត្រូវបានរកឃើញដោយអ្នករុករកអាចម៍ផ្កាយម្នាក់ ឯវាលខ្សាច់សាហារ៉ា ប្រទេសនីហ្សេ កាលពីខែវិច្ឆិកា ឆ្នាំ២០២៣។ អាចម៍ផ្កាយដែលមានទម្ងន់ប្រហែល ២៥ គីឡូក្រាម ជាមួយនឹងទំហំ ១៥ x ១១ x៦អ៊ីង មួយដុំនេះ ចាត់ទុកថាជាអាចម៌ផ្កាយដែលធំបំផុត បើប្រៀបធៀបនឹងអាចផ្កាយ ៤០០ ផ្សេងទៀត ដែលធ្លាប់បានរកឃើញនៅលើពិភពលោក។
នៅក្នុងការដេញថ្លៃនៅពាក់កណ្ដាលខែកក្កដា កន្លងទៅ សំណាកពីទីអាវកាសមួយដុំនេះ បានលក់ចេញទៅឱ្យបុគ្គលមិនបង្ហាញអត្តសញ្ញាណម្នាក់ក្នុងតម្លៃដើម ៤.៣ លានដុល្លារអាមេរិក និងមានតម្លៃសរុប ៥.៣ លានដុល្លារអាមេរិក បន្ទាប់ពីបូករួមថ្លៃសេវាកម្មនានា ក្លាយជាអាចម៌ផ្កាយដែលថ្លៃបំផុត នៅក្នុងប្រវត្តិសាស្ត្រការដេញថ្លៃ។


យ៉ាងណាមិញ ការលក់វត្ថុដែលមានសក្ដានុពលដល់ការសិក្សាស្រាវជ្រាវឱ្យក្លាយទៅជាសម្បត្តិឯកជននេះ បានចោទជាការព្រួលបារម្ភកើតឡើងក្នុងចំណោមសារធារណៈជន ដោយយល់ថា អាចម៌ផ្កាយនេះគួរតែបរិច្ចាគទៅឱ្យមជ្ឈមណ្ឌលវិទ្យាសាស្ត្រសម្រាប់ជាប្រយោជន៍សាធារណៈ ទើបប្រសើរជាង។
លោក Steve Brusatte សាស្ត្រាចារ្យផ្នែកបុរាណវិទ្យា និងការវិវត្តនៅសាកលវិទ្យាល័យ Edinburgh ក្នុងប្រទេសស្កុតឡែន បានប្រាប់សារព័ត៌មាន CNN ថា៖ “វាជារឿងគួរឱ្យសោកស្ដាយមែនទែន ប្រសិនបើអាចម៍ផ្កាយនេះ ត្រូវបានយកទៅទុកចោលនៅក្នុងឃ្លាំងទ្រព្យសម្បត្តិរបស់មហាសេដ្ឋី។ វាគួរតែស្ថិតនៅក្នុងសារមន្ទីរ ដែលអនុញ្ញាតឱ្យសារធារណជន និងក្មេងទូទៅអាចទស្សនាបាន”។
ដោយឡែក Julia Cartwright អ្នកវិទ្យាសាស្ត្រផ្នែកពិភពលោក និងអ្នកស្រាវជ្រាវឯករាជ្យ នៅសាកលវិទ្យាល័យ Leicester ប្រទេសអង់គ្លេស យល់ឃើញផ្ទុយមកវិញថា បើសិនជាអាចម៌ផ្កាយមិនមានទីផ្សារ ដែលនាំឱ្យមនុស្សនាំគ្នាព្យាយាមស្វែងរកនោះទេ អ្នកវិទ្យាសាស្រ្តក៏ប្រហែលជាមិនមានអាចម៌ផ្កាយ ដើម្បីសិក្សាស្រាវជ្រាវច្រើនដូចសព្វថ្ងៃដែរ៕


























Account
Security
Favourite Content