ព្រឹត្តិការណ៍កីឡាអាស៊ីអាគ្នេយ៍ ឬអាចហៅបានថា ស៊ីហ្គេម គឺជាព្រឹត្តិការណ៍កីឡាចម្រុះដែលរៀបចំឡើងរៀងរាល់ ២ឆ្នាំម្ដង និងមានប្រទេសចូលរួមចំនួន ១១។ ព្រឹត្តិការណ៍កីឡាដ៏ធំបំផុតប្រចាំតំបន់អាស៊ីអាគ្នេយ៍នេះ ស្ថិតនៅក្រោមបទប្បញ្ញត្តិរបស់សហព័ន្ធកីឡាអាស៊ីអាគ្នេយ៍ និងការត្រួតពិនិត្យដោយគណៈកម្មាធិការអូឡាំពិកអន្តរជាតិ (IOC) និងក្រុមប្រឹក្សាអូឡាំពិកអាស៊ី (OCA)។ មកទល់ពេលនេះ ស៊ីហ្គេមត្រូវបានរៀបចំឡើងចំនួន ៣១ឡើកមកហើយ ខណៈស៊ីហ្គេមលើកទី៣២ ឆ្នាំ២០២៣ នេះនឹងមកដល់កម្ពុជា ក្នុងរយៈពេលជាង ៦០ថ្ងៃទៀត ក្រោយរង់ចាំធ្វើជាម្ចាស់ផ្ទះលើកដំបូងអស់រយៈពេល ៦៤ឆ្នាំ។

ប្រវត្តិស៊ីហ្គេម
SEA Games គឺជាព្រឹត្តិការណ៍កីឡាដែលបានផ្លាស់ប្ដូរឈ្មោះមកពី South East Asian Peninsular Games ឬSEAP Games ឬជាភាសាខ្មែរ កីឡាឧបទ្វីបអាស៊ីអាគ្នេយ៍។ ដោយយល់ថាអាស៊ីអាគ្នេយ៍គួរមានព្រឹត្តិការណ៍កីឡារបស់ខ្លួន កីឡាឧបទ្វីបអាស៊ីអាគ្នេយ៍ត្រូវបានសម្រេចព្រមព្រៀងបង្កើតឡើងនៅក្នុងឆ្នាំ ១៩៥៨ ដោយគណៈប្រតិភូមកពីបណ្ដាប្រទេសនៅអាស៊ីអាគ្នេយ៍ ចំនួន ៦ គ្រាដែលពួកគេចូលរួមការប្រកួតកីឡាអាស៊ីនៅទីក្រុងតូក្យូ ប្រទេសជប៉ុន។
ប្រទេសចំនួន ៦ដែលជាស្ថាបនិកគ្រានោះមាន ប្រទេសភូមា (បច្ចុប្បន្នមីយ៉ាន់ម៉ា) ឡាវ កម្ពុជា Malayu (បច្ចុប្បន្នម៉ាឡេស៊ី) ថៃ សាធារណៈរដ្ឋវៀតណាម (វៀតណាមខាងត្បូង) និងមានសមាជិកសិង្ហបុរីសុំចូលរួមបន្ទាប់មក។ ព្រឹត្តិការណ៍នេះត្រូវបានបង្កើតឡើងដោយមានលក្ខណៈឯករាជ្យ ស្វ័យភាពពីនយោបាយ ស្របតាមស្មារតីអូឡាំពិក និងគោលបំណងសំខាន់ ២គឺដើម្បីលើកកម្ពស់កិច្ចសហប្រតិបត្តិការ និងពង្រឹងទំនាក់ទំនងរវាងប្រទេសក្នុងតំបន់អាស៊ីអាគ្នេយ៍។
មួយឆ្នាំក្រោយការសម្រេចព្រមព្រៀងបង្កើត កីឡាឧបទ្វីបអាស៊ីអាគ្នេយ៍បានផ្ដើមប្រារព្ធព្រឹត្តិការណ៍កីឡាដំបូងរបស់ខ្លួននៅទីក្រុងបាងកក ប្រទេសថៃ ចាប់ពីថ្ងៃទី១២ ដល់ថ្ងៃទី ១៧ ខែធ្នូ ឆ្នាំ ១៩៥៩ ដោយមានអត្តពលិក និងប្រតិភូកីឡាជាង ៥២៧នាក់មកពី ៦ប្រទេសចូលរួម លើកលែងកម្ពុជាដែលគ្រានោះមិនទាន់មានរចនាសម្ព័ន្ធគ្រប់គ្រងកីឡា និងគណៈកម្មការកីឡាអូឡាំពិកទើបមិនអាចចូលរួមប្រកួតប្រជែងបាន។
ក្រោយមក មកទល់នឹងការប្រារព្ធឡើងលើកទី៨ ក្នុងឆ្នាំ១៩៧៥ គណៈកម្មការ SEAP បានពិចារណាដាក់បញ្ចូលប្រទេស៣ បន្ថែមទៀតចូលរួមប្រកួតប្រជែងរួមមាន ប្រ៊ុយណេ ឥណ្ឌូណេស៊ី និងហ្វីលីពីន។ ក្នុងឆ្នាំ ១៩៧៧ ប្រទេសទាំងនេះត្រូវបានអនុញ្ញាតឲ្យចូលរួមជាផ្លូវការ ហើយឈ្មោះ កីឡាឧបទ្វីបអាស៊ីអាគ្នេយ៍ ក៏ត្រូវបានផ្លាស់ប្ដូរមកជាកីឡាអាស៊ីអាគ្នេយ៍ ឬ SEA Games ជាផ្លូវការចាប់តាំងពីពេលនោះមក។
សូមជម្រាបថា មុនឆ្នាំ ២០២៣នេះ កម្ពុជាធ្លាប់ទទួលបានសិទ្ធិធ្វើម្ដងរួចមកហើយកាលពីឆ្នាំ ១៩៦៣ គ្រាដែលព្រឹត្តិការណ៍នេះនៅឈ្មោះកីឡាឧបទ្វីបអាស៊ីអាគ្នេយ៍ តែកម្ពុជាបានលុបសិទ្ធិនេះចោលដោយសារបញ្ហាការទូត ពោលគឺជម្លោះព្រំដែនប្រាសាទព្រះវិហារ រវាងខ្មែរ និងថៃ។
គួរបញ្ជាក់ផងដែរថា ព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះមានប្រទេសចំនួន ១១ ចូលរួមនិងមានប្រភេទកីឡាអនុម័តចុងក្រោយចំនួន ៣៧ប្រភេទ ដោយក្នុងនោះមានវិញ្ញាសាសរុបចំនួន ៥៨១វិញ្ញាសា ហើយចាប់ផ្ដើមប្រកួតប្រជែងចាប់ពីថ្ងៃសុក្រ ទី៥ ខែឧសភា ឆ្នាំ២០២៣ ដល់ ថ្ងៃពុធ ទី១៧ ខែឧសភា ឆ្នាំ២០២៣៕




























Account
Security
Favourite Content