ជាធម្មតា ទូរស័ព្ទ ឬរបស់ប្រើប្រាស់ គ្រាន់តែទិញ និងយកចេញពីហាងតម្លៃរបស់វានឹងធ្លាក់ចុះភ្លាមៗ។ ប៉ុន្តែមានករណីពិសេសមួយចំនួន ដូចជានៅក្នុងការដេញថ្លៃមួយនៅសហរដ្ឋអាមេរិក ទូរស័ព្ទដៃ iPhone 4GB មិនទាន់បើកប្រអប់មួយគ្រឿង ដែលផលិតតាំងពីឆ្នាំ ២០០៧ មក ស្រាប់តែអាចលក់ចេញក្នុងតម្លៃកប់ពពក ពោលគឺជាង ១៩ម៉ឺនដុល្លារអាមេរិក។
iPhone 4GB ត្រូវបានចរាចរណ៍លើទីផ្សារដំបូងកាលពី ១៦ឆ្នាំមុន ក្រោយការចេញផ្សាយដោយផ្ទាល់ពី នាយកប្រតិបត្តិ Apple លោក Steve Jobs នាពេលនោះ។ iPhone ម៉ូដែល 4GB ត្រូវបានបញ្ឈប់ការលក់ផលិតត្រឹមតែ ២ខែ ដោយសារតែការលក់មិនល្អ ហេតុដូច្នេះហើយបានជា ម៉ូដែលនេះត្រូវបានគេចាត់ទុកថាជារបស់កម្រ និងអាចលក់ក្នុងតម្លៃខ្ពស់លើការដេញថ្លៃនាពេលបច្ចុប្បន្ន។

កាលពីឆ្នាំ ២០០៧ ក្រុមហ៊ុន Apple សម្រេចផ្អាកការផលិតទូរស័ព្ទដែលមានទំហំផ្ទុក 4GB ដោយសារតែពេលនោះ អតិថិជនភាគច្រើនជ្រើសរើសយក iPhone 4 ដែលមានទំហំផ្ទុក 8GB ច្រើនខ្លាំងជាង។
ចេញលក់ដំបូង iPhone ទំហំ 4GB មានតម្លៃប្រមាណ ៤៩៩ដុល្លារអាមេរិក។ តែមកដល់ឆ្នាំ ២០២៣ វាត្រូវបានលក់ចេញក្នុងតម្លៃជាង ១៩មុឺនដុល្លារ ឬស្មើនឹងការគុណប្រមាណ ៣០០ដងទៅនឹងតម្លៃដើម។
បច្ចុប្បន្ននេះ ជារៀងរាល់ ២ ឬ៣ខែម្តង ផលិតផលអនុស្សាវរីយ៍កម្រៗរបស់ Apple ឬវត្ថុអនុស្សាវរីយ៍នៃជីវិត និងអាជីពរបស់លោក Steve Jobs តែងតែត្រូវបានដាក់ដេញថ្លៃ។ ជាក់ស្តែង សូម្បីតែកំណាព្យដែល Steve បានសរសេរនៅក្នុងសៀវភៅកាលនៅវិទ្យាល័យ រូបថត Steve នៅមហាវិទ្យាល័យ និងសូម្បីនាមប័ណ្ណពីឆ្នាំ ១៩៧៨ របស់ស្ថាបនិកក្រុមហ៊ុន Apple សុទ្ធតែក្លាយជាវត្ថុមានតម្លៃទាំងអស់។
ក្រុមហ៊ុន Apple បាននិយាយថា៖ «Steve គឺជាប្រភពនៃការច្នៃប្រឌិតរាប់មិនអស់ ដែលធ្វើអោយជីវិតមនុស្សប្រសើរឡើង និងបានធ្វើអោយពិភពលោកកាន់តែប្រសើរឡើង»។
គួរជម្រាបថា សហស្ថាបនិក Apple លោក Steve Jobs បានទទួលមរណភាពនៅអាយុ ៥៦ ឆ្នាំ កាលពីឆ្នាំ ២០១១ ដោយសារជំងឺមហារីកលំពែង។ Steve Jobs គឺជាកំពូលមនុស្សបច្ចេកវិទ្យាមួយរូបដែលបានកែច្នៃ កុំព្យូទ័រ iMac iPod ទូរស័ព្ទ iPhone និង iPad មកកាន់ពិភពលោក៕


























Account
Security
Favourite Content