ព័ត៌មានកម្សាន្តប្លែកៗ
រសនិយម
តន្រ្តី
ភាពយន្ត
មាតិកាឌីជីថល
បើកសោជីវិត
ចង់ដឹងរឿងគេ
វនយាត្រា
Cicada Agent
ព្រះនាងកង្កែប
ក្នុងរង្វង់សិល្បៈនាពេលបច្ចុប្បន្ន មានសិល្បករ-សិល្បការនីមួយចំនួនដែលបាត់បង់មនុស្សជាទីគោរពស្រលាញ់ ដោយសារតែជំងឺមហារីក។ ជាក់ស្តែង តារាស្រី៣ដួងរួមមាន តារាចម្រៀង អ៊ីវ៉ា, តារាម៉ូដែល និងជាពិធីការនី កញ្ញា សោម ស្រីនាថ និងពិធីការនី ឌួង ហ្សូរីដា សុទ្ធតែបាត់បង់អ្នកម្តាយដោយសារជំងឺដ៏កាចសាហាវនេះដូចគ្នា។
១. តារាចម្រៀង អ៊ីវ៉ា ឈ្មោះពិត ឃីន ស្រីនាថ៖ តារាចម្រៀងរូបស្រស់នេះបាត់បង់អ្នកម្តាយជាទីគោរពដោយសារជំងឺមហារីក នៅថ្ងៃទី១ ខែធ្នូ ឆ្នាំ២០១៣ ដោយគិតមកទល់ពេលនេះរយៈពេលប្រមាណ៨ឆ្នាំហើយដែលនាងស្ពាយឈ្មោះជាកូនកំព្រាម្តាយ។ តារាចម្រៀងប្រចាំផលិតកម្មសាន់ដេរូបនេះ តែងតែគោរពថ្នូរម្តាយគ្រប់ពេលបុណ្យប្រពៃណីធំៗ។ កន្លងមក អ៊ីវ៉ា ក៏ធ្លាប់ស្រែកច្រៀងចម្រៀងខ្លះពាក់ព័ន្ធខ្សែជីវិតដ៏កម្សត់របស់អ្នកម្តាយនាងផងដែរ។
ពាក់កណ្តាលឆ្នាំ២០២៣នេះ ចំណងស្នេហារបស់ អ៊ីវ៉ា ជាមួយលោក លី សេងហួរ ប្រធានក្លឹបបាត់ទាត់សៀមរាបយូណាយធីត កាន់តែបើកចំហរឡើង ធ្វើឱ្យនាងមើលទៅហាក់ស្រស់បស់ជាងពេលមុនឆ្ងាយណាស់។ ពេលនេះហ្វេនៗកំពុងទន្ទឹងចាំអ៊ុតមើលថា អ៊ីវ៉ា នឹងមានដំណឹងល្អដូចសិល្បករផ្សេងៗទៀតនៅពេល ខណៈដែលនាងនិងគូស្នេហ៍មើលទៅផ្អែមល្អែមមិនចាញ់គូស្នេហ៍ផ្សេងទៀតប៉ុន្មានឡើយ។
២. តារាម៉ូដែល និងជាពិធីការនី កញ្ញា សោម ស្រីនាថ៖ ស្រីនាថ បានកំព្រាម្ដាយតាំងពីថ្ងៃទី១០ ខែមិថុនា ឆ្នាំ២០១៧ ដោយសារជំងឺមហារីកសុដន់បានឆក់យកជីវិតអ្នកម្តាយរបស់នាងឱ្យលង់លក់រហូតទៅ។ នាងបានក្លាយជាជន្ទល់គ្រួសារ និងត្រូវរ៉ាប់រងចិញ្ចឹមប្អូន២នាក់ទៀតដែលកំពុងរៀន ខណៈឪពុកនាងក៏មានជំងឺទឹកនោមផ្អែមផងដែរ។
ទោះជាយ៉ាងនេះក្តី ស្រីនាថ មិនបានផ្តេកផ្តួលតាមព្រេងវាសនាឡើយ ផ្ទុយទៅវិញនាងជានារីរឹងមាំងើបមកធ្វើការរកស៊ី ដើម្បីរកប្រាក់ចំណូលផ្គត់ផ្គង់ក្រុមគ្រួសាររបស់នាង។ ទឹកចិត្តបងស្រីរូបនេះ ធ្វើឱ្យសិល្បករ-សិល្បការនីក្នុងរង្វង់សិល្បៈកោតសរសើរជាខ្លាំង ចំណែកប្អូនៗក៏ដឹងគុណនាងប្រៀបដូចជាអ្នកម្តាយដូច្នោះដែរ។ ដោយត្រូវដើរតួជាម្តាយផងឪពុកផង និងជាបងស្រីផង ធ្វើឱ្យតារាសម្តែងរូបនេះ សុខចិត្តបន្តភាពនៅលីវ និងចង់រកគ្រួសារដ៏រុងរឿងមួយសម្រាប់ប្អូនៗរបស់ខ្លួនសិន មុន នឹងសម្រេចចិត្តរៀបចំជីវិតគូសម្រាប់ខ្លួនឯង ។
ថ្មីៗនេះ ស្រីនាថ ត្រូវបានជ្រើសរើសជា Miss Bird’s Nest Cambodia តំណាងឱ្យសមាគមអ្នកផលិត និងនាំចេញ សំបុកត្រចៀកកាំកម្ពុជា ចេញទៅប្រកួតក្នុងកម្មវិធី Bird’s Nest Divisionនៅទីក្រុងគង់ចូវ ប្រទេសចិន។ ជាលទ្ធផលនាងទទួលបានជយលាភីចំណាត់ថ្នាក់លេខ១ ក្នុងការប្រកួត Bird’s Nest Division ជាមុខមាត់ឱ្យកម្ពុជា និងសមាគមអ្នកផលិត និងនាំចេញ សំបុកត្រចៀកកាំកម្ពុជា។
៣. ពិធីការនី ឌួង ហ្សូរីដា៖ ពិធីការនីល្បីឈ្មោះរូបនេះបានបាត់បង់អ្នកម្តាយ យ៉ាលីន សុខលីម កាលពីថ្ងៃទី១ ឧសភា ឆ្នាំ២០២៣ ដោយសារតែជំងឺមហារីក។ ហ្សូរីដា និងក្រុមគ្រួសារ ចំណាយពេលព្យាបាលអ្នកម្ដាយនៅប្រទេសថៃជាច្រើនឆ្នាំមកហើយ តែអកុសលនាងមិនអាចជួយឱ្យអ្នកម្តាយគេចផុតពីជំងឺដ៏កាចសាហាវនេះបាន។
រយៈពេលជិត៣ខែមកនេះ ឌួង ហ្សូរីដា និង ឌួង ហ្សូរីម៉ា នៅតែនឹករឭក អាឡោះអាល័យអ្នកម្តាយឥតឈប់ឈរ ដោយគេតែងតែឃើញអ្នកទាំងពីរបង្ហោះសារបែបក្រៀមក្រំពីការបាត់បង់អ្នកម្តាយជាទីគោរពស្រលាញ់ ក្រោយ ព្យាយាមព្យាបាលប្រឆាំងជំងឺដ៏កាចសាហាវនេះរយៈពេលជាង៥ឆ្នាំមក។ យ៉ាងណាបងប្អូនស្រីទាំងពីរនៅតែរឹងប៉ឹង ក្រោកមករកស៊ី ដើម្បីជីវភាពគ្រួសារធូធារ តែអារម្មណ៍អ្នកទាំងពីរនៅតែរឭកដល់អ្នកម្តាយគ្រប់ពេលវេលា។
ក្រៅពីតារាស្រីដែលបានរៀបរាប់ខាងលើ ក៏មានតារាចម្រៀង រិន សាវ៉េត ដែលបានបាត់បង់ភរិយាទី១ ដោយសារជំងឺមហារីកសុដន់ កាលពីថ្ងៃទី២៣ ខែមេសា ឆ្នាំ២០១៧ កន្លងទៅផងដែរ ខណៈបច្ចុប្បន្នតារាសម្ដែង អេង វ៉ាណង ក៍កំពុងធ្លាក់ខ្លួនឈឺជំងឺមហារីកសុដន់ ដំណាក់កាល៣ តែគ្រូពេទ្យបានប្រាប់ថា បើមានលទ្ធភាព និងអាចទប់អារម្មណ៍ ពង្រឹងស្មារតីបានល្អប្រឆាំងជំងឺកាចសាហាវនេះនាងអាចនឹងព្យាបាលជា ៕
Account
Security
Favourite Content