ថ្មីៗនេះមានការភ្ញាក់ផ្អើលយ៉ាងខ្លាំងក្រោយស្រ្ដីអាយុ ១០៥ ឆ្នាំម្នាក់ឡើងទទួលសញ្ញាប័ត្រអនុបណ្ឌិតពីសាលា Stanford Graduate School of Education (GSE) ក្រោយខកខានដំណើរនៃការសិក្សាអស់រយៈពេលជាង ៨០ ឆ្នាំ។ នេះបើយោងតាម ABC News។

ក្នុងទស្សវត្សរ៍ឆ្នាំ ១៩៣៦ លោកយាយ Ginnie Hislop ធ្លាប់បានចូលរៀននៅសាលា Stanford ម្ដងរួចមកហើយ។ ជាអកុសល មុនពេលលោកយាយបញ្ចប់និក្ខេបបទចុងក្រោយក្នុងថ្នាក់អនុបណ្ឌិត សង្គ្រាមលោកលើកទី ២ ក៏បានផ្ទុះឡើងដែលធ្វើឱ្យប៉ះពាល់ដល់ការសិក្សារបស់លោកយាយជាខ្លាំង។
មិត្តប្រុសរបស់លោកយាយ George Hislop ត្រូវបានគេហៅឱ្យចូលក្នុងជួរកងទ័ពដើម្បីធ្វើសង្គ្រាម ដោយពេលនោះលោកយាយបានចាកចេញពីសាលដើម្បីរៀបការជាមួយមិត្តប្រុស។ នៅពេលដែលសង្គ្រាមបានបញ្ចប់ លោកយាយ Ginnie Hislop បានប្រឹងប្រែងអស់ពីលទ្ធភាពដើម្បីថែទាំគ្រួសារ។

ខណៈពេលកំពុងរស់នៅជាមួយក្រុមគ្រួសាររបស់លោកយាយដែលមានកូន ២ នាក់ ចៅ ៤ បួន និងចៅទួត ៩ នាក់ លោកយាយ Ginnie Hislop ក៏បានបម្រើការនៅសាលា និងមហាវិទ្យាល័យក្នុងរដ្ឋ Washington អស់រយៈពេលជាច្រើនទសវត្សរ៍មកហើយដែរ។
លុះដល់ពេលដែលសាលា Stanford បានទម្លាក់ពីលក្ខខណ្ឌ និងតម្រូវការនៃនិក្ខេបបទ លោកយាយ Ginnie Hislop ក៏បានចាប់ឱកាសសាជាថ្មីម្ដងទៀតត្រលប់ទៅបញ្ចប់និក្ខេបបទរបស់គាត់ ហើយក៏សម្រេចបានដោយជោគជ័យផងដែរ។ ជាលទ្ធផលនៅថ្ងៃទី១៦ ខែមិថុនា ឆ្នាំ២០២៤ ជាថ្ងៃដែលលោកយាយទន្ទឹងចាំអស់រយៈពេលជាយូរ ហើយលោកយាយពិតជាបានដើរលើកម្រាលព្រំក្នុងក្ដីស្រមៃដើម្បីទទួលយកសញ្ញាប័ត្រអនុបណ្ឌិតដោយមានការចូលរួមអបអរពីសំណាក់ក្រុមគ្រួសារលោកយាយផងដែរ៕

























Account
Security
Favourite Content