Warner Bros ប្រកាសផលិត The Conjuring ភាគថ្មី ក្រោមចំណងជើងថា The Conjuring: First Communion ក្រោយពីភាពយន្តរឿង The Conjuring: Last Rites ដែលក្រុមហ៊ុនធ្លាប់អះអាងថាជាភាពយន្តបិទចក្រវាលបានចាក់បញ្ចាំង កាលពីខែកញ្ញា ឆ្នាំ២០២៥ កន្លងទៅ។

កាលពីថ្ងៃទី១៦ ខែមករា នេះ ផលិតកម្មយក្ស Warner Bros និង New Line Cinema បានប្រកាសផលិត Prequel របស់ចក្រវាលភាពយន្តរន្ធត់ The Conjuring ដែលគ្រោងនឹងចាក់បញ្ចាំងជូនទស្សនិកជនជាផ្លូវការ នៅថ្ងៃទី១០ ខែកញ្ញា ឆ្នាំ២០២៧។
សូមបញ្ជាក់ថា Prequel គឺសាច់រឿងប្រវត្តិ ឬដើមចម ដែលកើតឡើងមុនសាច់រឿងដើម។ យ៉ាងណាមិញ ព័ត៌មានលម្អិត និងដំណើររឿង Prequel របស់ The Conjuring: First Communion នៅមិនទាន់បង្ហាញឱ្យទស្សនិកជនបានដឹងនៅឡើយទេ។ ខណៈមានការរំពឹងទុកថា ភាពយន្តនេះទំនងជាផ្ដោតទៅលើសាច់រឿងពីវ័យក្មេងរបស់តួអង្គ Ed និង Lorraine Warren ដែលសម្ដែងដោយ Patrick Wilson និង Vera Farmiga។

គួរឱ្យដឹងផងដែរថា ភាពយន្ត The Conjuring: Last Rites ដែលដើមឡើយក្រុមហ៊ុនបញ្ជាក់ថា ជាភាពយន្តចុងក្រោយនៃចក្រវាល អាចរកចំណូលបានរហូតដល់ទៅ ៤៩៤.៧ លានដុល្លារអាមេរិក ខណៈមានដើមទុនផលិតត្រឹមតែ ៥៥លានដុល្លារប៉ុណ្ណោះ។
ភាពជោគជ័យនេះ បានធ្វើឱ្យ The Conjuring: Last Rites បានក្លាយជាភាពយន្តដែលរកចំណូលបានច្រើនបំផុត ប្រចាំចក្រវាលភាពយន្តផ្អែកលើហេតុការណ៍ពិត The Conjuring៕


























Account
Security
Favourite Content